Read Jamaican Patois Matyu 12 Bible Online

Matyu 12 - Jamaican Patois bible

Matyu 12

¹ Da taim de, Jiizas did go chuu wan wiit fiil pan wan Sabat die. Im speshal falara dem did onggri an staat pik som a di wiit an nyam dem.

² Bot wen di Farisii si wa a gwaan dem se tu im se, “Luk! Yu speshal falara dem a du wa di Laa se wi no fi du pan di Sabat.”

³ Jiizas ansa dem se, “Unu no riid wa Dievid du wen im an im fren dem did onggri?

⁴ Ou im go iina Gad ous, an im an im fren dem nyam di uoli bred, wich bies pan di Laa, a onggl di priis dem fi get?”

⁵ “Ar, uol aan de, unu no riid iina di Laa ou di priis dem wok iina Gad ous pan Sabat die an so dem a brok wa di Laa se bout di Sabat, bot dem no du notn rang iina Gad yai.

⁶ Ier mi no, sopm we muo impuotant dan Gad ous de ya.

⁷ Ef unu did nuo wa dis ya miin: ‘Mi waahn piipl fi gud an kain tu piipl, no fi piipl kom kom bon sakrifais gi mi,’ unu wudn rait aaf piipl we no du notn rang an gwaan laik se dem a sina.

⁸ Kaaz di Man we Gad Pik, a im ruul uova di Sabat.”

⁹ Den Jiizas lef de-so an go iina di Juu dem choch.

¹⁰ Wan man did de de uufa an did shrivl op shrivl op. An som piipl aks Jiizas, “Bies pan Muoziz Laa, it aarait fi piipl get iil pan di Sabat die?” Dem aks im dat kaa dem did a luk fi wan riizn fi se im did a brok di Laa.

¹¹ Im se tu dem se, “Ef non a unu av wan shiip an it faal dong iina wan pit pan di Sabat, unu naa go grab it an aal it out?

¹² So wach ya, piipl no wot uol iip muo dan wan shiip? So yu naa brok no laa ef yu du gud pan di Sabat.”

¹³ Den im se tu di man, “Chrech out yu an.” Di man chrech out im an, it get beta, an kom bak gud gud laik di neks wan.

¹⁴ Bot di Farisii dem go we an staat plan ou dem mait-a kil Jiizas.

¹⁵ Bot Jiizas did nuo se dem a plan fi kil im an lef de-so. Wan bag a piipl fala im, an im get di uol a dem beta.

¹⁶ Bot im waan dem se dem mosn tel nobadi bout im.

¹⁷ Da wie ya, wa Aizaiya di prafit did se, wuda kom chuu:

¹⁸ “Si mi sorvant ya we mi pik, di wan we mi lov, di wan we mek mi api so til. Mi a-go gi’im mi Spirit, an im a-go mek evribadi, aal di piipl dem we a no Juu, nuo se Gad a-go joj dem fier.

¹⁹ Fi mi sorvant naa go a kos-kos ar a ala, an nobadi naa go ier im mout outa chriit.

²⁰ Jos laik ou im wuda neva pap out piis a graas we evribadi kom tep tep op pan, ar out wan lamp we bieli a lait op, im naa go rof op piipl we wiik an ort di wan dem we no chrang. An im a-go gwaan til im mek piipl si se mi kyan siev dem.

²¹ An piipl we a no Juu wi chos iina im fi siev dem.

²² Den dem kyari wan man we did av diiman iina im kom tu Jiizas. Di man did blain an im kudn chat niida. Jiizas mek im get bak beta, so di man kuda taak an si.

²³ Evribadi we si wa apm jaa jrap a grong di wie dem fraitn. Dem se, “A kuda Dievid pikni dis?”

²⁴ Bot wen di Farisii piipl dem ier dis, ier dem no, “Im kyaahn ron out no diiman ef a no Belzibul, di diiman ruula, gi im powa fi ron dem out.”

²⁵ Nou, Jiizas did nuo wa de iina dem main, so im se tu dem se, “It no mata wich kindom, ef di piipl dem we liv iin de a fait gens dem wan aneda, it naa go laas. An no toun ar fambili we av piipl a fait gens dem wan aneda kyan tan op chrang.

²⁶ Ef Sietan a ron out Sietan, im a fait gens imself. So ou im kindom a-go laas?

²⁷ An ef a Belzibul gi mi powa fi ron out diiman, den a uu gi fi unu falara dem powa fi ron dem out? Di sitn dem we unu uona falara dem du, pruuv se unu rang.

²⁸ Bot ef a Gad gi mi powa fi ron out diiman, dat miin se Gad a ruul mongks unu aredi.

²⁹ “Ou sumadi fi go iina wan chrang man ous an tiif im sitn dem ef dem no tai im op fos? Wen dem tai im op, a da taim de dem kyan tek we evriting.

³⁰ “Enibadi we no de pan fi mi said, a fait gens mi, an aal a uu naa elp mi gyada, a skyata dem a skyata.

³¹ A dat mek mi tel unu se piipl a-go get paadn fram evri wikid an torbl sitn we dem du an evri wikid sitn we dem se bout Gad, bot enibadi we se wikid sitn bout Gad Spirit dem naa get paadn.

³² Enibadi we chat bad gens di Man we Gad Pik, Gad wi paadn dem. Bot enibadi we chat bad gens di Uoli Spirit, dem naa go get paadn. Dem naa get paadn iina da laif ya ar di laif we a-go kom.

³³ “Mek wan chrii gud, an di fruut we it bier a-go gud tu; mek wan chrii no gud, an di fruut we it bier naa go gud. Unu kyan nuo bout wan chrii siek-a di kain-a fruut we it bier.

³⁴ Unu likl siniek pikni unu! Ou unu kyan se notn we gud, wen unu wikid an tan bad? Kaaz wa kom outa yu mout, a wa de iina yu aat.

³⁵ Di gud man du gud sitn siek-a di gud we stuor op iina im aat. An di wikid man du wikid sitn siek-a aal a di wikidnis we iina im aat.

³⁶ A tel unu dis, pan jojment die, piipl a-go afi ansa fi evri wikid sitn we dem se, we dem shuda neva se iina di fos plies.

³⁷ Kaaz a di wod we yu se wi mek yu rait wid Gad, an a di wod we yu se wi mek Gad rait yu aaf.”

³⁸ Den som a di Laa tiicha an di Farisii dem se tu Jiizas se, ‘Tiicha wi waahn fi si yu shuo wi wan sain.’

³⁹ Bot Jiizas ansa dem se, “Di piipl dem iina da taim ya, a wan wikid set a piipl. Dem aks fi wan sain we wuda pruuv se a Gad sen mi. Dem naa get non! Di onggl sain dem a-go get a sopm laik wa did apm wid Juona di prafit.

⁴⁰ Jos laik ou Juona did de iina di big fish beli fi chrii die an fi chrii nait, a siem so di Man we Gad Pik a-go beri diip iina di grong fi chrii die an chrii nait.

⁴¹ Di piipl fram Ninive, a-go tan op pan jojment die wid di piipl dem fram da taim ya an shuo dem se dem rang. Kaaz di Ninive piipl dem did sari fi di rang we dem du an chienj dem wiez wen Juona did kom priich tu dem. An nou, sitn we biga dan Juona de rait ya-so.

⁴² Di kwiin we kom fram Shiiba iina di sout, shi a-go kom bak alaiv wid di piipl dem fram da taim ya an shuo se dem rang, kaa shi did kom fram faar faar jos fi ier di waiz sitn dem we Salaman did av fi se. An nou, sitn we biga dan Salaman de rait ya-so.

⁴³ “Wen wan wikid spirit kom outa sumadi, it go chuu dezot a luk plies fi res bot no fain no we.

⁴⁴ Den it se, ‘Mi a ton bak go a di ous we mi lef.’ Wen it kech bak de-so, it fain se di ous emti. Di ous swiip kliin an evriting niit an taidi.

⁴⁵ Den di wikid spirit go we go bring bak sevn muo spirit we wosa dan it an di uol a dem go iin de go liv. So nou, da sumadi de wosaraaf dan bifuo. A siem so it a-go go fi di wikid set a piipl dem fram da taim ya!”

⁴⁶ Wen Jiizas did de de a chat tu di kroud a piipl dem, im mada an breda dem kom tan op outsaid a aks fi chat tu im.

⁴⁷ So sumadi se tu Jiizas se, “Oi de, yu mada an breda dem tan op outa duor. Dem waahn chat tu yu.”

⁴⁸ Jiizas ansa di man se, “A uu a mi mada, an a uu a mi breda?”

⁴⁹ Im paint pan im falara dem an se, “Si mi mada an mi breda dem ya!

⁵⁰ Kaaz enibadi we du wa mi Faada iina evn waahn dem fi du, a dem a mi breda, sista an mada.”