Read Jamaican Patois Matyu 13 Bible Online

Matyu 13 - Jamaican Patois bible

Matyu 13

¹ Pan da siem die de afta Jiizas lef di yaad, im go a di liek-said go sidong.

² Wan big big kroud a piipl gyada op roun im. Im did afi go iina wan buot go sidong wail di iip a piipl dem tan op pan di liek-said.

³ Jiizas tel dem uol iip a tuori we soun laik rigl. Im se, “Wan faama did go fi plaant som siid.

⁴ Wen im did a skyata di siid dem, som jrap wich paat piipl waak, an di bod dem kom kom nyam dem.

⁵ Som jrap we bier rakstuon de. Dem neehn av moch dot fi gruo iina. Nou, kaaz no uol iip a dot neehn de de, di ruut kudn go dong diip diip so di plaant dem kom op faas faas.

⁶ Wen di son kom op it skaach op di plaant dem, an, chuu dem ruut neehn lang inof, dem jrai op an ded.

⁷ Som ada siid jrap mongks makabush, an wen dem pap op, di makabush chuok dem.

⁸ Bot som a di siid dem jrap pan gud grong an kom bier fuud. Som bier wan onjrid taim muo dan wa di faama did plaant, som siksti an som toti.”

⁹ Enibadi we av iez fi ier — beta lisn gud!”

¹⁰ Den Jiizas speshal falara dem kom se tu im se, “Wa mek yu chat tu dem a yuuz tuori we soun laik rigl?”

¹¹ Jiizas se, “Unu get di chaans fi nuo di siikrit sopm dem bout Gad kindom, bot no dem.

¹² Kaaz enibadi we andastan di siikrit sopm dem bout Gad kindom, Gad a-go mek dem andastan muo, bot enibadi we no andastan, aal di likl we dem did andastan, Gad a-go tek we dat fram dem.

¹³ A dat mek mi yuuz tuori we soun laik rigl: “So iivn duo dem kyan si, dem naa si a ting, an iivn duo dem kyan ier, dem naa ier notn, an dem no andastan no iivn wan sitn niida.

¹⁴ So wa Gad did mek Aizaiya se, dem piipl ya mek it kom chuu. Aizaiya did se: “‘Unu wi lisn gud gud, bot unu wi neva andastan, Unu wi luk aad aad, bot stil unu naa go si’it.

¹⁵ Kaaz dem piipl ya aat get tof, an dem kyaahn lorn notn. Dem aad-iez, an dem yai lak op tu. So dem kyaahn si notn wid dem yai an dem kyaahn ier notn wid dem iez, an dem aat naa andastan notn niida, ar dem wuda ton tu mi, an mi wuda siev dem.’

¹⁶ Bot Gad bles fu’unu yai an iez dem, kaa dem si an ier!

¹⁷ Kaaz mi a tel unu dis, an a chuu mi de taak, nof prafit an piipl we du rait did wel waahn fi si wa unu si, an ier wa unu ier bot dem neehn si ar ier it.

¹⁸ “So lisn tu wa di tuori bout di faama a se:

¹⁹ Wen nobadi ier di mesij bout Gad kindom an no andastan it, di wikid wan kom siem taim kom tek we wa get plaant iina dem aat. Dis a di siid we did jrap wich paat piipl waak.

²⁰ Di siid we jrap wich paat bier rakstuon de, a di sumadi we ier di wod an glad fi it siem taim.

²¹ Bot siem laik di plaant uufa ruut no go dong diip iina di grong, im no mek Gad wod go diip iina im aat, so im no laas no taim. Bot wen tof taim lik im siek-a Gad wod, im gi op an ton bak siem taim — siem laik ou di plaant jrai op an ded.

²² Di wan we jrap iina makabush, a uu ier Gad wod bot im staat fret bout laif, an aal im kyan tingk bout a ou fi mek moni an get rich. Dem sitn de blak Gad wod, so it no du notn difrant iina dem laif.

²³ Bot di siid we jrap pan gud grong nou, da sumadi de ier Gad wod an andastan it. So, laik di siid we plaant pan gud grong im bier wan onjrid, siksti ar toti taim muo fruut dan wa di faama did plaant op.”

²⁴ Den Jiizas mek dem ier wan neks tuori we soun laik rigl. Im se, “Gad nyuu worl, komiin laik sumadi we plaant op som gud siid pan im lan.

²⁵ Bot wen evribadi a sliip, wan a im enimi dem kom kom plaant op wiid mongks im wiit dem an go we.

²⁶ Wen di plaant dem pap op an staat bier, di wiid no shuo op tu.

²⁷ “So di uona sorvant kom se tu im se, ‘Sa, yu neehn plaant gud siid iina yu fiil? Den a we dem de wiid kom fram?”

²⁸ “Im se, ‘A wan enimi du dis man.’ “So di sorvant ansa bak, ‘Yu waahn wi go jraa out di wiid dem?’

²⁹ “Bot im se, ‘Nuo, kaa yu mait de de a pap out wiid an go ruut op di wiit dem tu.’

³⁰ Mek di tuu a dem gruo til a taim fi gyada we plaant op. Wen da taim de kom mi wi tel di wokman dem fi gyada op di wiid an tai dem iina wan bonggl fi bon. Bot di wiit dem, dem a-go gyada dem op an put dem iina mi bochri.’ ”

³¹ Jiizas gi dem wan neda tuori we soun laik rigl: “Gad kindom a laik wan lili siid we wan man tek an plaant iina im fiil.

³² Da siid de likla dan evri ada siid, bot wen it gruo, it gruo biga dan evri ada plaant we did iina di gyaadn. It gruo an kom ton chrii, so bod kom kom bil op nes iin de.”

³³ Im tel dem wan neda tuori we soun laik rigl: “Gad kindom komiin laik yiis we wan uman tek miks iina uol iip a flowa — se fifti poun — an miks it til it swel op.”

³⁴ Jiizas tel di kroud a piipl dem aal a dem sitn ya, an a yuuz tuori we soun laik rigl wen im a taak. Im no tel dem notn an no yuuz tuori we no soun laik rigl.

³⁵ Da wie ya, wa di prafit did se, kom chuu: “Mi wi yuuz tuori we soun laik rigl wen mi de taak, an chat di sitn dem we aid op fram di taim wen di worl did a mek.”

³⁶ Den Jiizas lef di kroud a piipl dem an go iina di ous. Im falara dem kom tu im a se, “Tel wi wa di tuori bout di wiid iina di fiil miin?”

³⁷ Jiizas ansa se, “Di wan we plaant di gud siid a di Man we Gad Pik.

³⁸ Di fiil — a di worl, an di gud siid dem a di piipl we bilang tu Gad kindom. Di wiid dem, dat a di piipl dem we bilang tu di Wikid wan,

³⁹ an di wan we plaant op di wiid dem, a di devl dat. Di taim we wi go pik, dat a taak bout di laas die, wen di worl don. An di wan dem we gyada op we did plaant op, a di ienjel dem.

⁴⁰ “Jos laik ou di wiid a-go gyada op an get bon op, a siem ting a-go apm pan di laas die dem.

⁴¹ Di Man we Gad Pik a-go sen out im ienjel dem, an dem a-go tek outa im kindom evriting we mek piipl du rang an aal a di rang-duwa dem.

⁴² An dem a-go dash dem dong a el we di faiya a bon at at. De-so, piipl a-go a baal out dem yai an a grain dem tiit di wie pien a lik dem.

⁴³ Bot di piipl dem we du rait, a-go shain laik di son iina dem Faada kindom. Ef unu av iez, unu beta lisn gud!

⁴⁴ “Gad kindom komiin laik wan chrezha we did aid we iina wan fiil. Sumadi fain it an aid it agen. Dem so glad, dem sel evriting we dem av an go bai di fiil.

⁴⁵ “An den tu, Gad kindom a laik wan biznizman we aalwiez a luk fi gud porl.

⁴⁶ Wen im fain wan we wot uol iip a moni, im sel evriting we im uon an go bai it.

⁴⁷ “Gad kindom komiin laik dis tu — wan net we fishaman chuo outa sii. An da net de kech aal kain-a fish.

⁴⁸ Wen di net ful op, dem aal it go lan. An dem sidong an saat out di fish dem. Dem put di gud wan dem iina bokit, an dash we di bad wan dem.

⁴⁹ A siem so it a-go go pan di laas die. Ienjel a-go tek out di wikid piipl fram di wan dem we liv rait.

⁵⁰ An dem a-go dash dem dong a el we di faiya a bon at at. De-so, piipl a-go baal so til, an dem a-go grain dem tiit di wie ou pien a bait dem.

⁵¹ “Unu andastan aal we mi a se?” Dem se, “Ye.”

⁵² Den im se tu dem se, “So, aal a di Laa tiicha dem we ton wan falara fi Gad kindom, dem komiin laik sumadi we uon wan ous an im tek outa im bochri uol sitn an nyuu sitn.”

⁵³ Nou wen Jiizas don taak aal a dem tuori ya we soun laik rigl, im muuv fram de-so.

⁵⁴ Wen im kech a Nazaret, we im kom fram, im staat tiich di Juu dem iina dem choch. Di piipl dem kudn biliiv dem iez. Dem se, “A ou da man ya so waiz? A we im get di powa fi du dem mirikl de?

⁵⁵ “Wiet! No di kyaapinta bwai dis? No Mieri im mada niem? An im breda dem a no Jiemz, Juozif, Saiman an Juudas?

⁵⁶ An aal a im sista dem no liv rait ya-so wid wi? A we im get aal a dem sitn ya fram?”

⁵⁷ An so dem did beks an neehn waahn diil wid Jiizas non at aal. Bot Jiizas se tu dem se, “Piipl eva rispek an big op prafit yu no, onggl di piipl dem we im baan an gruo mongks an uu im liv wid no shuo im da rispek de.”

⁵⁸ An so Jiizas neva du no uol iip a mirikl de-so kaa di piipl dem neehn biliiv iina im.