Read Jamaican Patois Matyu 15 Bible Online

Matyu 15 - Jamaican Patois bible

Matyu 15

¹ Den som Farisii an som Laa tiicha kom tu Jiizas fram Jeruusilem. Dem kom kom aks im se,

² “Wa mek yu falara dem no ier wa wi faada faada dem tiich wi fi du? Kaaz dem no wash dem an bifuo dem nyam.”

³ Jiizas se tu dem se, “An wa mek unu a lisn so aad tu wa unu faada faada dem se, so til unu no du wa Gad se unu fi du?

⁴ Kaaz Gad se, ‘Rispek unu faada an unu mada’ an ‘Enibadi we kos out an disrispek dem faada an mada, kil dem.’

⁵ Bot ier wa unu se no, ‘Ef sumadi tel im faada an mada se, “Di elp we mi wuda gi unu, mi don gi Gad aredi,”

⁶ da sumadi de no niid fi du notn agen fi shuo dem mada an faada no rispek’ — a dat unu se. Unu no si se, jos fi fala wa fu’unu faada faada dem tiich, unu no pie Gad wod no main, an unu mek Gad Laa komiin laik se it no miin notn.

⁷ Unu oul ipokrit unu! Di prafit, Aizaiya, did rait wen im se,

⁸ “‘Aal dem set a piipl ya du a tek dem mout big mi op, bot iina dem aat dem no waahn av notn fi du wid mi.

⁹ An it no mek sens dem worship mi, wen dem a tiich man-mek ruul laik se dat a fi mi ruul.’ ”

¹⁰ Den Jiizas kaal di piipl dem wich paat im de an se, “Ier wa mi a se an andastan dis:

¹¹ Wen sumadi doti, a no siek-a wa dem put iina dem mout; a wa kom outa dem mout mek dem doti.”

¹² Den im falara dem kom kom se tu im se, “Yu nuo se di Farisii dem did fiil a wie wen dem ier wa yu se? Dem tek it tu aat an beks.”

¹³ Ier Jiizas no, “Evri plaant we mi Faada iina evn neva plaant a-go ruut op.

¹⁴ Lou dem, mek dem gwaan. Dem a blain piipl we a liid blain piipl. Ef blain a liid blain, di tuu a dem no boun fi jrap iina uol?”

¹⁵ So Piita se, “Di tuori we yu weehn tel di Farisii piipl dem, a wa yu did miin?”

¹⁶ Jiizas se, “Yu miin se unu stil no get wa mi a se?

¹⁷ Unu no si se evriting we unu put iina unu mout, go iina unu beli fos, den kom outa unu badi go iina di tailit?

¹⁸ Bot di sitn dem we kom outa unu mout, a outa unu aat dem kom fram. An a dem sitn de wi mek piipl doti an no kliin iina Gad yai.

¹⁹ Kaaz a outa di aat aal kain-a wikidnis we piipl tingk op kom fram. Wen sumadi go kil, go sliip wid sumadi we dem no marid tu ar gwaan wid aal kain-a ada seks sin, wen piipl tiif, tel lai, ar tek dem mout tier dong ada piipl — a di aat dem sitn de kom fram.

²⁰ A dem sitn de mek piipl doti. Wen unu nyam an no wash unu an, an no dat kaaz piipl fi no kliin iina Gad yai.”

²¹ Afta Jiizas lef de-so, im go iina di Taiya an Saidan ieriya.

²² Outa di bluu wan Kienanait uman we did liv iina da ieriya de kom kom a baal out, “Laad, Dievid pikni, tek piti pan mi du! Mi daata ful op a diiman bad bad sa.”

²³ Jiizas neva se a wod. Den im falara dem kom beg im se, “Ron ar we no, kaa shi jos a fala baka wi an a mek wan bag a naiz.”

²⁴ Jiizas se, “Gad onggl sen mi tu di shiip dem fram Izrel we laas.”

²⁵ Bot di uman kom niil dong infronta Jiizas an se, “Laad elp mi, du.”

²⁶ Jiizas se, “It no rait fi tek di pikni dem fuud gi daag.”

²⁷ “Laad, dat a chuu,” shi ansa bak, “bot iivn di daag dem get di kromz we jrap aafa dem maasta tiebl.”

²⁸ Wen Jiizas ier dat, im se, “Bwai uman, yu riili riili chos iina mi. Wat-eva yu waahn fi apm, Gad a-go mek it apm.” Siem taim ar daata get beta.

²⁹ Wen Jiizas lef fram de-so, im go a Gyalalii sii-said. Den im klaim op wan mountn, an go sidong.

³⁰ Wan big big kroud a piipl kom tu im. Dem bring piipl we kyaahn waak, we blain, kripl, dom an we sik iina aal saat a ada wie. Dem put dem dong a Jiizas fut, an im mek di wol a dem get beta.

³¹ Evribadi did fraitn fi si dom piipl a taak, uu kripl get beta, uu kudn waak a waak an blain piipl a si. An dem priez Izrel Gad.

³² Den Jiizas kaal im falara dem tugeda an se, “Mi fiil sari fi dem piipl ya. Kaaz a uol a chrii die nou dem de ya wid mi, an dem naa notn fi nyam. Mi no waahn sen dem we onggri; neks ting dem go jrap dong a ruod.”

³³ So im falara dem se, “A wich paat wi kyan get inof fuud iina dis ya dezot plies fi fiid so moch piipl?”

³⁴ So Jiizas se tu dem, “Umoch bred unu av?” Dem se, “Sevn — an wan an tuu lili fish.”

³⁵ Afta Jiizas tel di piipl dem fi sidong pan di grong,

³⁶ im tek di sevn bred an di fish dem, gi tangks, brok dem op an staat gi im falara dem, an dem gi di piipl dem.

³⁷ Evribadi nyam til dem beli ful, an wen dem pik op wa did lef bak, it ful sevn baaskit.

³⁸ Ef yu no kount uman an pikni, a bout fuo touzn man did nyam fuud.

³⁹ Afta Jiizas sen we di piipl dem, im go iina wan buot an kraas go Magadan.