Read Jamaican Patois Matyu 16 Bible Online

Matyu 16 - Jamaican Patois bible

Matyu 16

¹ Nou wen di Farisii an Sadyusii piipl dem kom kom tes Jiizas, dem aks im fi wan sain fi pruuv se a Gad sen im kom.

² So im se, “Wen iivnin kom ef di skai red unu se, ‘Di weda a-go gud tumaro kaa di skai red’

³ Bot ef it red an daak op iina di maanin, unu se, ‘Rien a-go faal tide, kaa di plies daak op.’ So unu nuo fi luk pan di skai an tel ou di weda a-go tan. Bot unu kyaahn andastan di sain dem we a shuo aal we a gwaan nou.

⁴ Di piipl dem iina da taim ya, a wan wikid set a piipl. Dem aks fi wan sain we wuda pruuv se a Gad sen mi. Dem naa get non! Di onggl sain dem a-go get a sopm laik we did apm wid Juona.” Den Jiizas lef dem an go we.

⁵ Wen Jiizas falara dem go kraas di neda said, dem did figet fi kyari bred.

⁶ “Wach out!,” Jiizas se tu dem. “Gyaad unuself gens di Farisii an Sadyusii piipl dem yiis.”

⁷ So dem staat taak bout dis mongks dem wan aneda, “Yu nuo se a kaa wi no bring no bred.”

⁸ Jiizas did don nuo wa dem a se, so im se tu dem, “Bwai, wat a likl bit a chos unu put iina mi! Mek unu a taak mongks unu wan aneda bout ou unu naa no bred, iihn?

⁹ Unu stil no andastan? Unu no memba di faiv bred we fiid di faiv touzn piipl dem an umoch baaskit a nyam-an-lef unu tek op, iihn?

¹⁰ Wa bout di sevn bred we fiid di fuo touzn piipl dem an umoch baaskit unu tek op wid lef-uova fuud?

¹¹ So ou kom unu kudn si se a no fuud mi did a taak tu unu bout? Bot a tel mi a tel unu fi wach out fi di Farisii an Sadyusii piipl dem yiis!”

¹² A da taim de Jiizas falara dem kech se im neehn a taak tu dem bout yiis fi mek bred, bot im did a taak gens di sitn dem we di Farisii an Sadyusii piipl dem tiich.

¹³ Wen Jiizas kech a di Sesuriiya Filipai ieriya, im aks im falara dem se, “A uu di piipl dem se di Man we Gad Pik bi?”

¹⁴ Dem ansa bak, “Som se Jan di Baptis, ada piipl se Ilaija, den yu av som we se Jerimaiya ar wan a di prafit dem.”

¹⁵ So im se tu dem se, “Bot wa bout unu? Uu unu tingk mi bi?”

¹⁶ Saiman Piita se, “Yu a di Krais, di Gad we alaiv Bwai Pikni.”

¹⁷ So den Jiizas se tu im se, “Saiman, Juona bwai pikni, yu bles, kaa a no naamal piipl mek yu nuo dat, bot a fi mi Faada we iina evn tel yu dat!

¹⁸ An ier wa mi a se no, yu a Piita, wan rak. An a pan dis ya rak mi a-go bil fi mi choch, an no powa dong a el naa go kyan mash dat op.

¹⁹ Mi a-go gi yu di kii fi Gad kindom. Eniting we yu se no fi gwaan pan ort a dat Gad wuda se aredi. An eniting we yu se: ye, dat kyan gwaan, Gad wuda lou dat fi gwaan aredi.”

²⁰ Den Jiizas waan im falara dem no fi tel nobadi se a im a di wan we Gad sen fi siev piipl — se a im a di Krais.

²¹ Fram da taim de, Jiizas staat mek im falara dem nuo se im afi go a Jeruusilem, an di elda, ed priis an Laa tiicha dem a-go mek im sofa uol iip a sitn. Dem a-go kil im, bot chrii die afta dat im a-go kom bak alaiv.

²² So Piita tek im wan said an staat ries im op fi se sitn laka dat: “Laad, mi prie se Gad neva mek sitn laka dat apm! Dis mosn apm tu yu!”

²³ Bot Jiizas ton tu Piita an se, “Gu we fram mi Sietan! Yu dis a blak op mi wie so, kaa yu naa tingk bout di sitn dem we Gad waahn; a onggl wa piipl waahn de pan yu main!”

²⁴ Den Jiizas se tu aal a im falara dem se, “Ef sumadi waahn fi ton wan a mi falara dem, dem afi figet bout wa dem waahn, tek op dem kraas an fala mi.

²⁵ Sumadi we waahn siev dem laif a-go luuz it, bot enibadi we luuz dem laif siek-a mi, dem a-go get fi fain dem laif.

²⁶ Kaaz wa gud it a-go du sumadi ef dem get di uol worl bot dem luuz dem laif? An wa sumadi kyan gi fi get bak dem laif?

²⁷ Kaaz di Man we Gad Pik a-go kom wid im ienjel dem an im a-go av powa we kom fram im Faada. Im a-go gi evribadi wa dem fi get bies pan di sitn dem we dem du.

²⁸ Mi a tel unu dis, an a chuu mi a taak, som a unu we tan op ya-so naa go ded bifuo unu si di Man we Gad Pik a kom ruul az king.”