Read Jamaican Patois Matyu 17 Bible Online

Matyu 17 - Jamaican Patois bible

Matyu 17

¹ Siks die lieta Jiizas tek Piita, Jiemz an Jiemz breda, Jan, an kyari dem go op a wan ai mountn, im an dem wan.

² Aal av a sodn Jiizas staat fi chienj rait infronta dem. Im fies staat shain laik di son an im kluoz ton wait wait laik lait.

³ Aal av a sodn Muoziz an Ilaija shuo op infronta dem tu, an a chat wid Jiizas.

⁴ So Piita se tu Jiizas se, “Laad, a gud ting se wi de ya man! Ef yu waahn, mi wi mek chrii shed — wan fi yu, wan fi Muoziz an wan fi Ilaija.”

⁵ Luk ya no, siem taim Piita a chat, wan brait kloud kom dong kom kova dem op, an wan vais iina di kloud se, “Dis a fi mi Bwai Pikni, mi lov im, an im mek mi api. Unu fi lisn we im se!”

⁶ Wen di falara dem ier di vais, dem kech dem fried, dash demself a grong an ton dong dem fies.

⁷ Bot Jiizas kom kom toch dem. Im se, “Git op. No fried.”

⁸ Wen dem luk op, dem no si nobadi, jos Jiizas wan.

⁹ Wen dem a kom dong di mountn, Jiizas waan dem aaf se, “No tel nobadi bout wa unu si til di Man we Gad Pik ded an kom bak alaiv.”

¹⁰ Im falara dem aks im se, “So wa mek di Laa tiicha dem se Ilaija afi kom fos?”

¹¹ So Jiizas ansa dem se, “Ilaija kom fos fi chuu an a-go get evriting redi.

¹² Mi tel yu dis ya, Ilaija kom aredi. Bot dem neehn kech se a Ilaija dat, an dem did du im wat-eva dem did waahn fi dwi’im. A siem so, dem a-go mek di Man we Gad Pik sofa.”

¹³ A so im falara dem kech se a Jan di Baptis im did a tel dem bout.

¹⁴ Wen dem kom dong wich paat di kroud de, wan man kom kom niil dong infronta Jiizas,

¹⁵ im se, “Laad, tek piti pan mi bwai an mek im get beta du. Somtaim a laik se im a get mad. Im kech fits an it du im bad bad sa. An no wan an tuu taim im jrap dong iina faiya, an iina waata.

¹⁶ Mi bring im kom tu yu speshal falara dem bot dem kudn mek im get beta.”

¹⁷ Jiizas se, “Unu piipl we liv iina da taim ya! Unu no biliiv an unu no du we unu fi du. Umoch langga mi afi tan ya wid unu? Umoch langga mi afi put op wid unu? Kyari di bwai kom tu mi.”

¹⁸ Jiizas ron out di diiman, an it kom outa di bwai. Di pikni get beta fram da taim de.

¹⁹ Den im falara dem kom tu im wan said an se, “Wa mek wi kudn ron out di diiman?”

²⁰ So im se tu dem se, “Kaaz unu neehn riili biliiv se Gad wuda dwi’it. Ier wa mi a se, an a chuu mi a taak, ef unu biliiv, iivn fi likl bit — likl laik di liklis siid dem, unu wi se tu da moutn ya, ‘Muuv fram ya-so go de-so,’ an it muuv. Notn naa de bout we unu naa go kyan du.”

²² Wen dem kom tugeda a Gyalalii, Jiizas se tu dem se, “Dem a-go tek di Man we Gad Pik, sel im out an gi im tu piipl we iet im.

²³ Dem a-go kil im, bot chrii die afta dat im a-go kom bak alaiv.” An im falara dem aat staat at dem wen dem ier dis.

²⁴ Afta Jiizas an im falara dem riich Kyaporniyom, di man dem we kalek di taks fi Gad ous kom tu Piita an se, “Di taks we piipl pie fi tek kier a Gad ous, yu tiicha pie it, no chuu?”

²⁵ So Piita se, “Ye man.” Wen Piita kom iina di ous, bifuo im kuda se notn Jiizas se tu im se, “Wa yu tingk Saiman? Di king dem fi da ort ya, a uu dem kalek tuol ar taks fram: dem uona piipl ar farina?”

²⁶ “Fram farina,” Piita ansa bak. “So dem uona piipl na’afi pie taks den,” Jiizas se.

²⁷ “Bot, kaa wi no waahn nobadi beks, go dong a di sii an chuo out yu lain fi kech fish, an di fos fish yu kech wen yu uopm op im mout yu a-go fain wan silva kain. Gi dem dat fi fi mi an fi yu taks fi Gad ous.”