Read Jamaican Patois Matyu 18 Bible Online

Matyu 18 - Jamaican Patois bible

Matyu 18

¹ Roun da taim de Jiizas speshal falara dem kom tu im an aks im se, “A uu av di tap-a-tap pozishan iina Gad Kindom?”

² Jiizas kaal wan pikni an mek im tan op mongks dem.

³ Den im se tu dem se, “Mi tel unu dis ya, an a chuu mi de taak, ef unu no chienj ou unu tan an staat ombl unuself laik pikni, non a unu naa go put unu fut iina Gad kindom.

⁴ Bot ef unu ombl unuself laik da lili pikni ya, den a unu a-go bi tap-a-tap iina Gad kindom.

⁵ “An enibadi we welkom pikni laik da wan ya, kaa di pikni chos iina mi, dem welkom mi tu.

⁶ Bot enibadi we mek wan a dem likl pikni ya, we biliiv iina mi, sin, dem wuda betaraaf ef wan big big rakstuon did tai roun dem nek an dem go joun dong a di batam a di sii.

⁷ “Chobl fi da worl ya, siek-a aal a di sitn dem we de ya fi mek piipl du rang! Tingz afi kom fi mek piipl sin yu no, bot yu si di piipl dem we mek ada piipl du rang, chobl fi dem!

⁸ Ef unu an an fut mek unu sin, chap dem aaf an dash dem we. Kaaz it beta fi unu kripl ar kyaahn waak an liv fi eva wid Gad dan fu’unu av tuu an ar tuu fut an get dash dong a el we di faiya no tap bliez.

⁹ An ef unu yai mek unu sin, tier it out an dash it we. Aftaraal, unu betaraaf a liv fi eva wid unu wan yai, dan fi av tuu, an get dash dong a el iina di faiya.

¹⁰ “Mek shuor se unu no luk dong pan non a dem likl pikni ya. Kaaz mi tel unu dis, dem av dem uona ienjel, an fi dem ienjel we iina evn a si mi Faada fies aal di taim.

¹² “Wa unu tingk? Supuoz sumadi uon wan onjrid shiip an wan a dem laas. Im naa go lef di nainti-nain pan di mountn tap an go luk fi di wan we laas?

¹³ An ef im fain di shiip, mi a tel unu dis, im api bout di nainti-nain we neehn chrie, bot im wuda muo api bout da wan de we im fain bak.

¹⁴ A siem so unu Faada we iina evn no waahn dem likl wan ya fi go chrie.

¹⁵ “Nou, ef wan a unu breda ar sista du unu notn, go wan said, an mek dem nuo wa dem du rang. Ef dem lisn, den tingz gaan bak gud agen wid unu an dem.

¹⁶ Bot ef dem naa pie unu no main, den unu fi kyari wan ar tuu ada piipl go bak wid unu. Da wie de nou, tuu ar chrii piipl wi de de fi si we gwaan an fi pruuv wa unu se.

¹⁷ Ef di breda ar sista no waahn lisn di piipl dem we unu kyari, go tel di choch. An ef dem no pie dong tu di choch main, den diil wid dem laik ou unu wuda diil wid sumadi we no siev ar wan taks kalekta.

¹⁸ “Mi a tel unu dis, an a chuu mi a taak, eniting we unu se no fi gwaan ya-so pan ort, Gad wuda don se it no fi gwaan niida. An eniting we unu se: ye, dat kyan gwaan, Gad a-go don lou dat fi gwaan aredi.

¹⁹ “Mi a tel unu dis tu an a chuu mi a taak, ef tuu a unu we de ya-so pan ort kom tugeda an se unu a aks Gad fi sitn, mi Faada we iina evn a-go dwi’it fu’unu.

²⁰ Kaaz eniwe tuu ar chrii a mi falara dem gyada fi prie, mi de rait de wid dem.”

²¹ Den Piita kom se tu im se, “Laad a umoch taim mi fi paadn mi breda ar sista we du mi sopm? Aal a sevn taim?”

²² Jiizas se tu im se, “No iivn sevn taim mi a go tel yu, bot uol a sevnti sevn taim!

²³ “Mi a tel unu dat, kaaz a dis Gad kindom komiin laik: it komiin laik wan king we did waahn chek aaf umoch aal a im sorvant dem did uo im.

²⁴ Wen di king de de a chek aaf, dem bring wan man kom we uo im umoch umoch miliyan.

²⁵ Nou, kaa di sorvant kudn pie it bak, di king aada dem fi sel im, an sel im waif an pikni tu, plos aal we im uon so im kuda get bak im moni.

²⁶ “Di sorvant jrap pan im nii infronta di king an beg im, ‘Du tek taim wid mi sa, gi mi som taim an mi wi pie bak evriting.’

²⁷ Di king fiil sari fi im an mek im gwaan. An aal we im did uo, di king se im na’afi pie bak notn agen.

²⁸ “Afta im go we nou, da sed sorvant de si wan neks sorvant we uo im wan lili bit a moni wen yu tingk bout umoch im did uo di king. Di sorvant grab di neda wan chuot an staat chuok out im die lait. Im se, ‘Gi mi di moni we yu uo mi!’

²⁹ “Di neda wan we a wan sorvant jos laik im jrap pan im nii an beg im, ‘Du, tek taim wid mi. Gi mi som taim an mi wi pie bak aal a we mi uo yu.’

³⁰ “Bot im neehn tek dat. Im se nuo, an go we go fling di neda sorvant iina prizn til im pie im bak evriting.

³¹ Wen ada sorvant laik im si wa apm, dem beks bad bad an go we go tel di king evriting.

³² “So di king kaal di fos sorvant an se tu im se, ‘Yu wikid sorvant yu! Mi paadn yu umoch umoch miliyan kaa yu beg mi!

³³ Yu miin se yu kudn tek piti pan sumadi we a sorvant jos laka yu di siem wie ou mi tek piti pan yu?’

³⁴ An di king get beks an gi im tu di prizn gyaad dem fi dem taament im til im pie bak evri red sent we im did uo di king.

³⁵ “A siem so mi Faada iina evn wi du unu ef unu uol op unu breda ar sista dem iina unu aat, an no paadn dem.”