Read Jamaican Patois Matyu 19 Bible Online

Matyu 19 - Jamaican Patois bible

Matyu 19

¹ Nou wen Jiizas did don se we im a se, im lef Gyalalii go paas Riva Jaadn an go iina di Judiya ieriya.

² Wan bag a piipl fala im, an im get dem beta rait de-so.

³ Den, som Farisii piipl kom fi kom tes Jiizas. So dem kom kom aks im se, “Wan man kyan go brok op wid im waif fi eni an eniting? Muoziz Laa lou dat?”

⁴ Jiizas ansa se, “Unu no riid se fram Gad mek di worl im mek man an uman,

⁵ an im se, ‘Siek-a dis, wan man a-go lef im faada an mada an jain op wid im waif an di tuu a dem wi ton wan sumadi’?

⁶ So dem a no tuu agen, dem ton wan. So wa Gad jain op, nobadi no fi plit op.”

⁷ Den dem se tu Jiizas se, “So wa mek Muoziz Laa se, wi kyan gi wi waif wan piepa we shuo se wi no marid no muo, an ron ar outa wi ous?”

⁸ Jiizas se tu dem se, “Muoziz lou unu fi lef unu waif kaa unu aat did tof! Bot wen Gad did fos mek man an uman a no so tingz did set op.

⁹ Nou ier we mi a se, enibadi we brok op wid dem waif an go marid sumadi els, an a no se dem waif did sliip wid nobadi els, a gi dem a gi ar bon an a brok dem brok di Laa!”

¹⁰ Jiizas speshal falara dem se tu im se, “Bwai ef a so it go bitwiin wan man an im waif, den it beta fi piipl no marid den.”

¹¹ So Jiizas ansa bak, “A no evribadi kyan tek wa mi jos se yu no — dat a no fi evribadi; a fi onggl uu it go fa.

¹² Kaaz yu av man we kyaahn marid fi difrant difrant riizn. Som man no get marid kaaz fram dem baan dem kyaahn av seks — a jos so Gad mek dem. Dem kyaahn du notn so dem no marid. Som man kyaahn av seks kaaz piipl kot aaf dem tingz, dem kyaahn du notn so dem no get marid niida. An som man, dem no bada get marid so dat dem kyan spen muo taim a du Gad wok. Uu kyan tek dis fi tek it.”

¹³ Den piipl kyari di likl pikni dem kom a Jiizas fi im put im an pan dem an prie fi dem. Bot Jiizas speshal falara dem staat tel aaf di piipl dem we bring di pikni dem kom, an staat ron dem.

¹⁴ Bot Jiizas se, “Lou di likl pikni dem, mek dem kom tu mi. No chrai tap dem, kaaz Gad kindom a fi piipl we komiin laik dem likl pikni ya.”

¹⁵ An im put im an pan dem, an den go bout im bizniz.

¹⁶ Wan man kom tu Jiizas kom aks im se, “A wa kain-a gud sitn mi fi du so mi kyan liv fi eva?”

¹⁷ So Jiizas se tu im se, “A wa mek yu kom a aks mi bout wa gud? A onggl wan sumadi de bout we gud yu no. Bot ef yu waahn fi liv fi eva kip di Laa dem we Gad did gi Muoziz.

¹⁸ “Wich wan a dem?” im aks Jiizas. So Jiizas ansa bak, “‘No kil, no sliip wid nobadi we yu no marid tu, no tiif, no tel lai pan piipl,

¹⁹ rispek yu faada an mada’ an ‘Lov yu nieba siem laik ou yu lov yuself.’”

²⁰ So di yong man se tu im se, “Mi a fala dem de wid aal a mi aat. So a wa muo mi niid?”

²¹ So Jiizas se, “Ef yu waahn bi evriting we Gad waahn yu fi bi, gwaan go sel evriting we yu av an gi di moni tu di puo piipl dem, an yu wi rich iina evn. Wen yu du dat, kom fala mi.”

²² Bot wen di yong man ier dis ya, im aat jrap an im go we sad, kaa im did wel rich.

²³ Den Jiizas se tu im speshal falara dem se, “Mi tel unu dis an a chuu mi a taak, it a-go wel aad fi rich piipl go iina Gad kindom!

²⁴ Ier dis tu no: It iiziya fi wan kyamil go chuu wan niigl yai dan fi sumadi we rich go iina Gad kindom.”

²⁵ Jiizas falara dem did wel shak wen dem ier dis. Dem se, “Den a uu kyan get siev?”

²⁶ So Jiizas luk pan dem an se, “Wa piipl kyaahn du, Gad kyan du, kaaz notn no de we Gad kyaahn du.”

²⁷ Den Piita se tu im se, “Si ya! Wi lef evriting we wi av fi fala yu! So wa wi a-go get?”

²⁸ So Jiizas se tu dem se, “Ier mi no, an a chuu mi a taak: Wen Gad mek evriting nyuu agen, an di Man we Gad Pik sidong pan im tap-a-tap chuon, aal a unu, we fala mi, a-go sidong pan unu uona chuon tu. Unu a-go sidong pan twelv chuon a joj Izrel twelv chraib dem.

²⁹ An enibadi we lef dem yaad, dem breda, sista, faada, mada, pikni ar dem lan siek-a mi, dem wi get bak onjrid taim muo dan wa dem did av; plos dem a-go get fi liv fi eva tu.

³⁰ Bot nof a uu de a front nou a-go de a bak, an uu de a bak a-go de a front.”