Read Jamaican Patois Matyu 2 Bible Online

Matyu 2 - Jamaican Patois bible

Matyu 2

¹ Jiizas did baan iina Betliyem, wan toun iina Judiya. Dem taim de, a Erad did a king iina Judiya. Nou, iina dem siem taim de, som waiz man fram di Iis said did kom a Jeruusilem an a aks,

² “We di pikni de we baan di ada die, we fi kom ton king fi di Juu piipl dem? Wi si im staar iina di Iis, we shuo se im baan, an wi kom fi shuo im nof rispek.”

³ Nou wen King Erad ier dis ya, dis bada bada im ed, an it bada uol iip a piipl iina Jeruusilem tu.

⁴ Erad kaal evribadi tugeda iina wan miitn — aal a di ed priis an di man dem we tiich Muoziz Laa — an im aks dem a wich paat di Krais — di king we Gad pramis, fi baan.

⁵ Dem ansa se, “Iina Betliyem, kaaz a dat di prafit did rait dong:

⁶ ‘An yu Betliyem we iina Judiya, wen yu luk pan aal di ada toun dem we a liid, yu no wot no les dan dem — yu op de mongks di tap-a-tap toun dem; kaaz a fram outa yu wan liida a-go kom we a-go protek an liid mi piipl dem we iina Izrel.’”

⁷ Den Erad sen kaal di waiz man dem fi kom kom chek im anda di kwaiyat, an fain out fram dem a wa taim dem did si di staar.

⁸ Im sen dem go a Betliyem an se, “Gwaan go luk fi di pikni. Luk gud gud, an wen unu fain im, kom tel mi, so mi kyan go shuo im nof rispek tu.”

⁹ Afta dem don lisn di king, dem lef go we. Az dem a go bout dem bizniz so, no di sed staar we dem did si iina di Iis said kom bak agen! It galang infronta dem til it riich wich paat di pikni did de, an a uova de-so it tap.

¹⁰ Wen dem did si di staar agen dem glad-bag bos!

¹¹ Dem kom iina di ous an si di pikni wid im mada, Mieri, an dem go dong pan dem nii an priez im. Dem tek out di prezent we dem did bring, an gi di pikni — guol, frangkinsens an mor.

¹² Nou, chuu Gad did don waan dem aaf, an tel dem iina wan jriim se dem no fi go baka Erad, dem tek wan neda wie go baka dem konchri.

¹³ Afta dem go we, wan a di Laad ienjel dem jriim Juozif an se, “Git op! Tek di pikni an im mada an ron we go a Iijip. Tan de til mi tel yu, kaa Erad a-go luk fi di pikni fi kil im.”

¹⁴ So im get op, tek op di pikni an im mada an lef go a Iijip iina di nait.

¹⁵ An im tan de til Erad ded. Da wie de, wa di Laad did yuuz di prafit fi se did kom chuu. Im did se, “A outa Iijip mi kaal mi bwai pikni.”

¹⁶ Wen Erad si se di waiz man dem did chrik im op, im beks til im nieli bos! Im sen out aada, an kil aaf aal a di bwai pikni dem we did iina Betliyem an di plies dem we did de nier Betliyem, aal a di pikni dem we did a tuu ier uol an anda tuu. Im du dat azkaadn tu di taim wen di waiz man did se dem si di staar.

¹⁷ Den wa di Laad did yuuz di prafit Jerimaiya fi se, kom chuu:

¹⁸ “Piipl did ier sumadi a baal iina Raama, dem did a ala an baal loud loud, A Riechel did a baal fi ar pikni dem, an shi no waahn nobadi fi osh ar, kaa ar pikni dem gaan.”

¹⁹ Afta Erad ded, luk ya no: wan a di Laad ienjel dem no jriim Juozif wen im de a Iijip.

²⁰ Di ienjel se, “Git op, tek di pikni an im mada an gwaan a Izrel, kaa uu did a chrai fi kil di pikni, dem ded.”

²¹ So Juozif get op, tek di pikni an im mada an go baka Izrel.

²² Bot wen im ier se a Erad pikni, Arkelos, tek uova an did a ruul Judiya, im kech im fried an neehn waahn go de-so. An kaa Gad did waan im aaf iina wan jriim, im lef go Gyalalii insted.

²³ Im kom a wan toun niem Nazaret an tan de-so. A so kom wa di prafit dem did se kom chuu. Azkaadn tu di prafit dem, dem a-go kaal Jiizas wan Nazariin man.