Read Jamaican Patois Matyu 20 Bible Online

Matyu 20 - Jamaican Patois bible

Matyu 20

¹ “Gad kindom komiin laik wan man we uon wan faam. Im go we orli iina di maanin go tek aan som wokman fi im griep faam.

² Im an dem wok out se im wi pie dem wan naamal die wok pie, an den im sen dem go pan im griep faam fi staat di wok.

³ “Bout nain aklak iina di maanin, im go we agen an si som muo man a tan op iina di maakit naa du notn.

⁴ So im go tu dem an se, ‘Unu gwaan dong a di griep faam tu, an mi wi pie unu wat-eva unu fi get.’

⁵ So dem go. “Im go bak out bout migl die, an chrii aklak tu, an im du di sed ting.

⁶ An bout faiv aklak im go out agen an fain som muo man jos a tan op bout di plies naa du a ting. So im aks dem se, ‘Wa mek unu tan op ya-so uol die naa du notn?’

⁷ “Dem ansa bak, ‘Kaaz nobadi naa gi wi no wok sa.’ “So im se tu dem se, ‘Unu gwaan go wok pan mi griep faam tu.’

⁸ “Wen iivnin kom dong nou di faam uona se tu im manija se, ‘Kaal di wokman dem an pie dem. Staat wid di laas set a man dem we mi tek aan, an pie aal a dem dong tu di fos set.’

⁹ “Wen di wan dem we staat wok bout faiv aklak kom fi fi dem pie, aal a dem get wan uol a die pie.

¹⁰ Wen di wan dem we di faam uona did tek aan fos kom nou fi get fi dem pie, dem tingk se dem wuda get muo moni. Bot evri wan a dem get di naamal die pie tu.

¹¹ So wen dem get dem pie, dem staat grombl grombl bout wa di faam uona did du;

¹² ier dem no, ‘Dem wokman, we kom iin laas, a onggl wan owa dem wok fa an yu pie dem siem laik wi, afta wi du muos a di wok an bon op iina son uol die.’

¹³ “Di faam uona ansa wan a dem, ‘Fren, afta mi no tiif unu notn. Wi neehn kom tugeda an se a di naamal die pie mi fi gi unu? Iihn?

¹⁴ So tek wa unu fi get an gwaan bout unu bizniz. A mi waahn gi di man we mi tek aan laas di siem moni we mi gi unu.

¹⁵ Mi kyaahn du we mi waahn du wid fi mi uona moni? Iihn? Ar a red yai unu red yai kaa mi kain?’

¹⁶ “So di wan we no luk so impuotant we de a bak, Gad a-go push dem op a front, an di wan dem we luk laik se a dem impuotant, we de op a front, a dem a-go get push a bak.”

¹⁷ Wen Jiizas did a go op a Jeruusilem, pan di wie, im tek im twelv speshal falara dem wan said an se tu dem se,

¹⁸ “Luk ya no, wi a go op a Jeruusilem, an dem a-go tek di Man we Gad Pik an ton im uova tu di ed priis an di Laa tiicha dem. Dem a-go joj im an se im gilti an fi ded.

¹⁹ Dem a-go gi’im tu di piipl dem we a no Juu fi dem laaf aafa im an tek im mek preke, biit im wikid wikid an afta dat dem a-go kil im pan di kraas. Bot chrii die afta dem kil im, im a-go kom bak alaiv.”

²⁰ Den Zebidii bwai pikni dem mada kom tu Jiizas wid ar bwai dem. Shi niil dong a grong an aks im fi du sitn fi ar.

²¹ So im se tu ar se, “Wa yu waahn?” Shi ansa bak, “Mi waahn yu fi lou mi tuu bwai dem fi sidong iina yu kindom, wan a yu rait-an-said an di neks wan a yu lef-an-said.”

²² So Jiizas se tu ar se, “Yu no nuo wa yu a aks mi se! Unu kyan jringk wa mi bout fi jringk? A sofa mi a-go sofa yu no.” Di bwai dem se, “Ye, wi kyan du dat!”

²³ So Jiizas se tu dem se, “Unu wi sofa ye; mmhm — unu wi jringk mi kop, bot fi sidong a mi rait-an-said an mi lef-an-said, a no mi wok out da wan de. Kaaz dem pozishan de don put op aredi fi di wan dem we mi Faada se fi get dem.”

²⁴ Nou wen di ada ten falara dem ier dis, dem did beks wid di tuu breda dem.

²⁵ Bot Jiizas kaal dem an se, “Unu nuo se di piipl dem we a no Juu, fi dem ruula dem lov kanchuol dem an lov shuo se a dem av powa, an aal dem ed ruula — dem lov baas baas op di piipl dem tu.

²⁶ A no so it fi go mongks unu! Insted-a dat, ef nobadi waahn av tap pozishan mongks unu, dem afi sorv unu,

²⁷ an nobadi we de mongks unu an waahn big op a front, dem afi ton unu sorvant.

²⁸ A so it fi go, jos laik ou di Man we Gad Pik neehn kom ya fi nobadi sorv im; a kom im kom ya fi sorv piipl an fi gi op im laif so piipl kyan get frii fram dem sin.”

²⁹ Wen Jiizas did a lef Jeriko, wan bag a piipl fala baka im.

³⁰ Tuu blain man did sidong a di ruod-said a beg. Wen dem ier se a Jiizas a paas chuu, dem shout out, “Laad, Dievid pikni, tek piti pan wi du!”

³¹ Di piipl dem tel dem fi shet dem mout an tap dem naiz, bot a da taim de dem staat shout out, “Laad, Dievid pikni, tek piti pan wi du!”

³² Jiizas tap. Im kaal dem an se, “Wa unu waahn mi fi du fu’unu?”

³³ Dem se tu im se, “Laad uopm op wi yai dem, du.”

³⁴ Jiizas fiil sari fi dem an toch dem yai — Braps! Dem yai get beta an dem kuda si, an di man dem fala Jiizas.