Read Jamaican Patois Matyu 21 Bible Online

Matyu 21 - Jamaican Patois bible

Matyu 21

¹ Nou wen dem riich nier Jeruusilem an kom a Betpiej, rait a Mount Aliv de-so, Jiizas sen tuu a im falara dem,

² im se tu dem se, “Gwaan a di dischrik infronta unu, az unu kech de-so unu a-go fain wan dangki tai op, an wan yong dangki a-go de de wid ar. Luus di tuu a dem an kyari dem kom.

³ Ef nobadi se notn tu unu, unu fi se, ‘Di Laad niid dem,’ an dem wi sen dem sed taim.”

⁴ Dis apm fi mek wa di prafit did se kom chuu. Di prafit did se,

⁵ “Tel di piipl dem we kom fram Zaiyan se, ‘Luk ya, unu king a kom tu unu, im a kom jengkl an ombl, a sidong pan wan big dangki, an pan wan yong dangki tu — dat a di mada dangki biebi.’”

⁶ Jiizas falara dem go we an du wa im tel dem fi du.

⁷ Dem bring di mada dangki an di likl dangki go gi Jiizas. Dem put dem jakit pan di dangki dem bak, an Jiizas sidong pan dem.

⁸ Wan bag a piipl pred out dem jakit pan di ruod. Som ada piipl kot aaf chrii branch an pred dem out pan di ruod tu.

⁹ Di kroud a piipl dem we waak infronta Jiizas, an di wan dem baka im did kip aan a shout out, “Priez Gad! Priez Dievid pikni!” “Gad bles di wan we im sen kom — im sen im wid fi’im powa!” “Priez Gad we iina evn!”

¹⁰ Wen im riich iina Jeruusilem di uol toun kech a faiya, evribadi a se, “A uu dis ya?”

¹¹ An di kroud a piipl dem we did a fala baka Jiizas did a se, “A di prafit Jiizas dis ya we kom fram Nazaret iina Gyalalii.”

¹² Den Jiizas go iina Gad ous an staat fling out aal a di piipl dem we did iin de a sel an a bai. Di piipl dem we did a chienj out moni, Jiizas pich uova fi dem tiebl, an ton uova di chier fi aal uu did de de a sel dov.

¹³ Im se tu dem se, “It rait dong iina Gad wod se, ‘Fi mi ous a-go bi wan ous we piipl kom fi prie,’ bot unu ton it iina wan aid out fi tiif’!”

¹⁴ Blain an kripl piipl kom tu Jiizas iina di yaad we Gad ous de, an im get dem beta.

¹⁵ Bot wen di ed priis an Laa tiicha dem si di mirikl dem we im du, an ier di pikni dem iina di yaad we Gad ous de a baal out se, “Priez im! Mek wi priez Dievid pikni” dem beks kyaahn don,

¹⁶ an dem se tu Jiizas se, “Yu ier wa dem a se?” So Jiizas se, “Ye man. Yu neehn riid iina Gad wod se, ‘Im mek pikni an likl biebi priez im ou im fi get priez’?”

¹⁷ An wen im lef dem, im kom outa di toun go Betani an tan de fi di nait.

¹⁸ Nou orli iina di maanin, wen Jiizas a go baka di toun, im did onggri.

¹⁹ So im si wan fig chrii a di ruod-said an go kraas wich paat it de, bot im neehn si notn at aal pan it, jos suo-so liif. Jiizas se tu di chrii se, “Yu naa go eva bier fruut agen!” an siem taim di fig chrii jrai op.

²⁰ Wen im falara dem si wa im du, dem yai uopm op waid waid. Dem se, “Ou di fig chrii jrai op so faas?”

²¹ Jiizas ansa bak, “Mi tel unu dis, an a chuu mi a taak, ef unu jos chos iina Gad likl, an no if-an-bot an wanda-wanda, unu naa go jos du wa mi du tu da fig chrii de, bot aal ef unu se tu da moutn ya, ‘Git op go fling yuself iina di sii, it wi apm.

²² An eniting we unu prie an aks Gad fa, ef unu biliiv se im gu’unu, unu wi get it.”

²³ Nou afta Jiizas did go bak iina di yaad we Gad ous de, wen im did a tiich, di ed priis an di elda fi di piipl dem kom tu im. Dem aks im se, “Wa rait yu av fi du dem sitn ya, an a uu gi yu di rait fi du dem?”

²⁴ So Jiizas ansa bak, “Mek mi aks unu wan kwestiyan. Ef unu ansa mi, mi wi tel unu a uu gi mi di rait fi du dem sitn ya.

²⁵ Wen Jan did a baptaiz piipl, a uu did sen im fi dwi’it, Gad ar man?” So dem staat wok it out mongks dem wan aneda. Ier dem no, “Ef wi se, ‘A Gad’, im a-go aks wi se, ‘Den wa mek unu neva biliiv im?’

²⁶ Bot ef wi se, ‘A man’, di kroud a piipl no wi ton dong pan wi, kaa di uol a dem tek Jan fi wan prafit — wi fried dat go apm.”

²⁷ So dem se tu Jiizas se, “Wi no nuo.” So Jiizas se tu dem se, “Den mi naa tel unu a uu gi mi di rait fi du dem sitn ya niida.

²⁸ “Tel mi wa unu tingk? Wan man did av tuu bwai pikni. Im go tu di fos wan an se, ‘Mi bwai, gwaan go wok pan mi griep faam tide.’

²⁹ “Di bwai se, ‘Mi naa go no we.’ Bot lietaraan im chienj im main an go.

³⁰ “Di Faada go tu im neks pikni an tel im di sed ting. Dis ya wan se, ‘Mi a-go go dadi,’ bot im no go no we.

³¹ “So tel mi, wich wan a dem du wa im faada waahn?” Dem se, “Di fos wan.” So Jiizas se tu dem se, “Mi tel unu dis, an a chuu mi a taak, taks kalekta an seks woka a-go go iina Gad kindom bifuo unu!

³² Kaaz Jan kom shuo unu di rait wie, an unu neehn biliiv im. Bot di taks kalekta dem an seks woka did biliiv. Unu si dis apm, bot unu stil neehn chienj unu main an biliiv im.

³³ “Ier da tuori ya tu: Yu weehn av wan man we uon wan griep faam an di man plaant op im faam. Im put op wan waal aal roun it, dig out wan uol iina di grong fi krosh out di griep fi mek wain, an bil op wan plies pan tap a di waal fi di gyaad wach uova di faam. Den im rent it out tu som faama an go farin.

³⁴ Wen di griep dem raip op nou, an a taim fi pik dem, im sen im sorvant dem go a im tenant dem fi kalek wa im fi get fram im faam.

³⁵ “Bot di tenant dem uol aan pan di sorvant dem, biit wan, kil wan, an stuon di neda wan.

³⁶ So im sen som ada sorvant, muo dan wa im did sen di fos taim. An di tenant dem chriit dem di siem wie.

³⁷ So di man riich di laas schraa nou an sen im uona bwai pikni go tu dem. Ier im no, ‘Dem wi rispek mi bwai.’

³⁸ “Bot eh eh, wen di tenant dem si di bwai, dem se tu dem wan aneda se, ‘A da wan ya a-go get evriting wen im faada ded. Kom mek wi kil im an tek wa im wuda get.’

³⁹ So dem grab im, chuo im aafa di faam an kil im.

⁴⁰ “Nou wen di uona fi di faam kom bak, wa unu tingk im a-go du wid dem tenant de?”

⁴¹ Dem ansa se, “Im a-go kil aaf dem uol wikid de! An tek im faam an rent it tu ada tenant we a-go gi’im wa im fi get wen im griep dem redi.”

⁴² Jiizas se tu dem se, “Unu neehn riid iina Gad wod se: “‘Di rakstuon di bilda fling we, a it a uol op di bildin nou. A di Laad du dis, an wi yai uopm op waid waid wen wi si di sitn we im du’?

⁴³ “A dat mek mi tel unu se Gad kindom a-go tek we fram unu an gi di piipl dem we a-go bier fruut.

⁴⁴ Uu jrap pan da stuon ya a-go brok op iina piisiz, an uu it jrap pan a-go mash op bad bad.”

⁴⁵ Wen di ed priis an Farisii piipl dem ier Jiizas tuori dem we soun laik rigl, dem kech se a dem im did a chuo wod pan.

⁴⁶ Dem did waahn lak im op, bot di kroud a piipl dem mek dem kech dem fried. Kaaz di piipl dem did tek Jiizas fi wan prafit.