Read Jamaican Patois Matyu 23 Bible Online

Matyu 23 - Jamaican Patois bible

Matyu 23

¹ Den Jiizas ton tu di kroud an tu im speshal falara dem tu. Ier im no:

² “Di Laa tiicha an di Farisii dem sidong iina Muoziz siit.

³ So unu fi lisn dem an du aal we dem tel unu fi du. Bot no du wa dem du, kaa dem no du wa dem priich se.

⁴ Dem tai aan evi luod pan piipl shuolda we aad fi kyari, bot dem no iivn waahn lif op wan fingga fi elp dem.

⁵ “Dem jos shuo aaf! Dem du aal we dem du fi mek piipl si dem. Unu si ou dem mek fi dem leda baks wid difrant difrant vors outa Gad wod wel big, ye, di siem wan we dem tai aan pan dem ed an dem an. An luk pan dem tasl, luk ou lang it bi!

⁶ A bier impuotant siit dem lov sidong iina wen dem go a big dina an iina dem choch.

⁷ Dem lov wen piipl gi dem speshal oudi wen dem go a maakit, an wen dem kaal dem, ‘Tiicha’.

⁸ “Bot nobadi no fi kaal unu, ‘tiicha,’ kaa a onggl wan Tiicha de bout, plos di uol a unu a breda an sista; nobadi no aiya dan nobadi.

⁹ An unu no fi kaal nobadi ya-so pan ort unu ‘faada,’ kaa a onggl wan Faada de bout an im de a evn.

¹⁰ An mi se, nobadi no fi kaal unu ‘tiicha,’ kaa a onggl wan Tiicha unu av an dat a di wan we Gad sen fi siev piipl, di Krais.

¹¹ Di wan mongks unu we a di muos impuotant sumadi, a dem a-go sorv unu.

¹² An enibadi we kom kom a big op demself, dem a-go get sitn fi kwaiyat dem. An di wan dem we ombl demself, a dem Gad a-go big op.

¹³ “Bot yu si aal dem Laa tiicha ya an di Farisii piipl dem, chobl fu’unu! Uol ipokrit! Unu shot Gad kindom iina piipl fies! Unu no go iin de, an unu naa lou piipl we a chrai fi go iin de, fi go iin.

¹⁵ “Mi se di Laa tiicha an Farisii piipl dem chobl fu’unu! Unu ipokrit unu! Unu kraas uova lan an sii fi chrai chienj wan sumadi fi go fu’unu wie, an wen da wan sumadi de staat worship Gad fu’unu wie, unu mek dem fit fi go el tuu taim muo dan unu!

¹⁶ “Chobl fu’unu we a liid piipl an kyaahn si wan ting. Bout unu a se, ‘Ef nobadi swier pan Gad ous dat no mata, bot ef dem swier pan di guol fi Gad ous — a dat mata.’

¹⁷ Unu blain fuul unu! A wich wan muo impuotant, iihn? Di guol? Ar Gad ous? No kaa a Gad ous di guol yuuz fa iina di fos plies mek it komiin so impuotant?

¹⁸ Ier dis tu no, unu se, ‘Enibadi we swier pan di alta, ef dem no du wa dem swier fi du, it no mata, bot ef dem swier pan di aafrin we sumadi bring go a di alta dem afi du wa dem pramis fi du.’

¹⁹ Unu blain sa! Wich wan muo impuotant? Di aafrin, ar di alta we mek di aafrin wot sitn?

²⁰ So enibadi we swier pan di alta swier pan it an pan evriting we de pan it.

²¹ An enibadi we swier pan Gad ous, swier pan it an swier pan Gad we liv iin de tu.

²² An ef nobadi a swier an kaal evn niem, dem a swier pan Gad chuon an pan di wan we sidong pan di chuon tu.

²³ “A se chobl fu’unu Laa tiicha, an aal unu Farisii — chobl! Ipokrit! Unu gi Gad wan outa evri ten mint, spais laik dil, an ada siiznin laik kyuumin, bot di sitn dem we muo impuotant iina Gad Laa unu no bizniz wid dem de. Im se unu fi chriit piipl fier, unu fi gud an kain tu dem an fi mek shuor se im kyan chos unu kaa unu du wa im se unu fi du, bot unu no pie dem paat a di Laa de no main. A dem paat a di Laa de unu fi fala, bot unu fi stil memba fi du di ada wan dem tu.

²⁴ Unu blain no bat, bout unu a liid piipl! Unu chrien out evriting we unu jringk fi mek shuor se no iivn wan lili flai no iin de, bot unu siem wan swala wan uol-a kyamil an no iivn nuo!

²⁵ “Yu si aal dem Laa tiicha ya, an di Farisii piipl dem, chobl fu’unu! Uol Ipokrit! Unu wash outsaida kop an pliet kliin kliin, bot wa unu put iina dem doti, kaaz a griidi unu griidi. Unu yuuz wikidnis an tek dem fram piipl. Unu jos bizniz bout unuself wan.

²⁶ Blain Farisii! Kliin insaida di kop fos, so di outsaid paat kyan kliin op tu!

²⁷ “A se, yu si unu Laa tiicha an Farisii — chobl fu’unu! Set a ipokrit unu! Unu tan laik tuum we dem pient wait a ier taim — priti pan di outsaid bot insaida dem ful op a ded man buon an aal kain-a doti, ratn sitn.

²⁸ A siem so pan di outsaida unu luk laik gud gud piipl we du evriting we mek Gad api, bot iina unu aat unu a big big ipokrit — wikid an ful op a sin!

²⁹ “A se chobl fu’unu Laa tiicha an Farisii piipl, unu set a ipokrit unu! Unu bil op tuum fi di prafit dem. An di piipl dem we did liv gud iina Gad yai, unu priti op dem griev.

³⁰ An ier unu no, ‘Ef wi did liv iina wi faada faada dem taim wi wuda neva ron wid dem go kil aaf di prafit dem.’

³¹ Bot wen unu se dem sitn de, a taak unu taak gens unuself, an a pruuv unu a pruuv se unu riili kom fram piipl we did kil di prafit dem.

³² So gwaan go don wa unu piipl dem weehn staat.

³³ “Unu set a siniek an siniek pikni unu! Ou unu fi eva get we, an no get ponish dong a el, iihn?

³⁴ A dat mek mi a-go sen prafit tu unu, mi a-go sen som man we waiz kom, an som piipl we tiich Gad wie, som a dem unu a-go kil an niel pan di kraas, an som, unu a-go biit dem iina di Juu dem choch an ron dem dong fram toun tu toun laik wail animal.

³⁵ So aal a di piipl dem we did a liv rait iina Gad yai an unu kil dem, fi dem blod a-go de pan fu’unu shuolda. Fram Iebl we did a liv rait iina Gad yai, tu Zakaraiya — Barakiya bwai pikni. A im unu kil aaf bitwiin Gad ous an di alta wich paat dem bon sakrifais.

³⁶ A tel unu dis ya, an a chuu mi a taak, da set a piipl ya, we a liv iina da taim ya, a unu a-go pie fi aal a dem sitn ya!

³⁷ “Ai Jeruusilem, Jeruusilem, yu we kil di prafit dem an stuon di wan dem we Gad sen tu unu, mi lang fi gyada yu piipl roun mi, laik ou foul gyada fi ar pikni dem anda ar wing, bot unu neva waahn mi fi dwi’it!

³⁸ Bot luk ya, Gad tek we im ous fram mongks unu. So wa unu bil op an kaal Gad ous, im no de de no muo.

³⁹ Mi a tel unu dis, unu naa si mi agen til unu se, ‘Gad bles di wan we im sen.’”