Read Jamaican Patois Matyu 24 Bible Online

Matyu 24 - Jamaican Patois bible

Matyu 24

¹ Jiizas did lef di yaad we Gad ous de an a go we, wen im falara dem kom kom a shuo im di bildin dem we mek op Gad ous.

² Jiizas se tu dem se, “Unu si aal a dem sitn ya? Ier mi no, an a chuu mi a taak, no iivn wan a dem stuon ya a-go lef pan tap a dem wan aneda. Di uol a dem a-go lik dong!”

³ Wen Jiizas did a sidong pan Mount Aliv im falara dem kom tu im wan said an se, “Tel wi, a wen aal dem sitn ya a-go apm? An a wa kain-a sain a-go shuo se yu a kom bak an di worl suun don?”

⁴ So Jiizas se tu dem se, “Wach out, no mek nobadi fuul unu op.

⁵ Kaaz a uol iip a piipl a-go kom yuuz op yuuz op mi niem, an a se, ‘Mi a Krais, a mi Gad sen fi siev piipl,’ an dem a-go fuul op nof piipl.

⁶ Unu a-go ier se waar a gwaan a woi woi an waar a gwaan anda unu nuoz. Bot mek shuor se unu no fraitn yu no, kaa aal a dem sitn ya afi gwaan, bot non a dem de no miin di worl don yet.

⁷ Kaaz wan set a piipl a-go waar gens wan neks set a piipl, an kindom a-go fait gens kindom. Fuud a-go shaat iina nof nof plies an uol iip a piipl a-go staav, pan tap a dat ortkwiek a-go kom shiek op difrant difrant plies.

⁸ Aal a dem sitn ya a jos di fos set a lieba pien we unu a-go fiil wen di nyuu worl a baan.

⁹ “Wen dat apm, dem a-go tek unu, an gi unu uova tu di piipl dem we a-go ponish unu an kil unu. An kaa unu a fala mi, piipl fram aal bout a-go iet unu.

¹⁰ Uol iip a piipl a-go gi op an tap fala mi. Dem a-go sel out dem wan aneda an iet dem wan aneda.

¹¹ Nof nof faalz prafit a-go kom bout an chrik chrik op uol iip a piipl,

¹² an kaa wikidnis a-go pred laik wail faiya, muos piipl aat a-go ton kuol an dem naa bada lov piipl laik wan taim.

¹³ Bot aal uu eng aan an tan op chrang no mata wa, a dem a-go get siev.

¹⁴ An da Gud Nyuuz ya bout Gad Kindom afi go priich aal uova di worl. So evribadi wi get di chaans fi ier di chuut. A onggl afta dat, di worl a-go don.

¹⁵ “Bot bifuo dat apm, unu gweehn si wa di prafit Daniyel weehn taak bout, wen im did a chat bout di ‘wikid wikid sitn we go gens Gad an doti op Gad ous,’ ou it tan op iina Gad plies (mek shuor se evribadi we riid dis ya andastan we it miin).

¹⁶ Dem taim de, uu de a Judiya fi ron we go op a di mountn dem.

¹⁷ Uu de pan ruuf tap, no fi kom dong kom tek out notn outa dem ous.

¹⁸ An di wan dem we did gaan a bush, no fi ton bak fi no jakit.

¹⁹ Wat a sitn iina dem taim de fi uman we av biebi iina beli an fi mada we av yong biebi!

²⁰ Prie se unu na’afi go ron we wen staam a kom ar iina rieni taim, an pan di Sabat die niida.

²¹ Dem taim de piipl a-go sofa bad bad. Sofarieshan neva so wikid fram di worl a mek til nou, an nobadi naa go eva sofa so agen.

²² An ef Gad neehn mek op im main se im a kot dong ou lang da taim de fi laas, nobadi wudn liv. Bot siek-a di piipl dem we im pik, im mek op im main se im a-go kot it dong.

²³ Da taim de, ef nobadi kom an a se, “Luk ya, si Krais ya!” ar “Luk! Si im de!” No fala dem.

²⁴ Kaaz piipl a-go kom kom se dem a di wan we Gad sen fi siev piipl, wen notn no go so. An som faalz prafit a-go shuo op tu. Dem piipl de a-go wok aal kain-a mirikl an shuo aal kain-a sain fi chrik op piipl, dong tu aal di piipl dem we Gad pik, di faalz prafit dem wi chrik op tu ef dem get di chaans.

²⁵ Unu beta memba se mi weehn tel unu dem sitn ya bifuo dem apm.

²⁶ “So ef sumadi go se, ‘Luk ya, im iina di dezot.’ No go out de. Ar ef dem se, ‘Luk ya! luk ya! Im a aid ya-so!’ No lisn dem.

²⁷ Kaaz jos laik ou laitnin flash fram iis go wes an evribadi si it, a siem so di Man we Gad Pik a-go kom bak — evribadi a-go si im.

²⁸ Eniwe di ded badi de, a de-so jangkro a-go gyada.

²⁹ “Bot iina dem taim de, likl afta di sofarieshan don, “Di son a-go daak op, di muun naa go shain an di staar dem a-go jrap outa di skai. Evriting we iina di skai a-go get shiek outa dem plies.

³⁰ “Den, yu av sitn we mek evribadi nuo se di Man we Gad Pik a kom, piipl a-go si da sitn de op iina di ier, an piipl fram aal uova a-go staat baal. Dem a-go si di Man we Gad Pik a kom pan kloud we kom outa evn, an im a-go av powa, an wan brait brait lait we kom fram Gad a shain roun im.

³¹ Im wi sen im ienjel dem fi kom bluo di chompit loud loud, an dem gweehn gyada op di piipl dem we im pik fram naat, sout, iis an wes, fram aal uova di worl.

³² “Nou lorn sopm fram di fig chrii: Wen taim unu si dem branch get wel saaf an griin, an dem staat sen out nyuu liif, unu nuo se soma suun kom.

³³ A siem so, enitaim unu si aal a dem sitn ya, nuo se di wan we Gad sen fi siev piipl suun kom; a laik im de rait outsaida unu duor.

³⁴ Mi a tel unu dis an a chuu mi a taak, di piipl we a liv iina dem taim ya naa go ded til aal a dem sitn ya apm.

³⁵ Evn an ort naa go de bout fi eva, bot fi mi wod a-go laas fi eva.

³⁶ “Nobadi no nuo di die an di taim wen aal a dem sitn de a-go apm, nobadi no nuo a wen, no iivn di ienjel dem iina evn — onggl Faada Gad wan nuo dat.

³⁷ Siem ou tingz did tan iina Nowa taim, a siem so it a-go bi wen di Man we Gad Pik kom bak.

³⁸ Kaaz iina da taim de bifuo di flod kom, piipl did a nyam an jringk, uman a marid an man a marid rait op tu di die wen Nowa go iina di aak.

³⁹ An dem neehn nuo notn til di flod kom kom tek we di uol a dem. A siem ting a-go apm wen di Man we Gad Pik kom bak.

⁴⁰ Dem taim de, tuu man wi outa bush an wan get tek we, lef di neks wan.

⁴¹ Tuu uman wi a grain grien an wan get tek we lef di neda wan.

⁴² “So mek shuor se unu eva a wach an a luk out, kaa unu no nuo a wich die unu Laad a-go kom bak.

⁴³ Bot andastan dis: Ef di uona fi di ous did nuo a wa taim a nait di tiif a kom, im wudn mek di tiif brok iina im ous.

⁴⁴ A siem so unu fi redi, kaa di Man we Gad Pik naa go kom wen unu tingk im a kom.”

⁴⁵ “So den, a uu a di waiz sorvant we di maasta kyan chos fi dwi’im wok? Uu a di wan we di maasta put inchaaj a im uol ous, an mek shier out di sorvant dem fuud wen a taim fi dem nyam?

⁴⁶ It a-go gud fi di sorvant we di maasta kom fain a du im wok.

⁴⁷ Mi tel unu dis, an a chuu mi a taak, di maasta a-go put im inchaaj a evriting im uon.

⁴⁸ Bot ef da sorvant de wikid an go aal se tu imself se, ‘Mi maasta naa kom bak fi nou.’

⁴⁹ An im staat biit di ada sorvant dem, an nyam an jringk wid jongkad,

⁵⁰ an im maasta go kom bak wan die wen im naa luk fi im an wan taim wen im naa chek se im wuda riich bak.

⁵¹ Di maasta a-go chap im iina tuu an fling im we di ipokrit dem de. De-so piipl a-go baal an a grain dem tiit di wie pien a waks dem.”