Read Jamaican Patois Matyu 25 Bible Online

Matyu 25 - Jamaican Patois bible

Matyu 25

¹ “Da taim de, Gad kindom a-go komiin laik ten yong gyal we tek dem lamp go miit di man we a get marid.

² Faiv a dem did fu-fuul, an di neks faiv did av sens.

³ Wen di fu-fuul wan dem tek fi dem lamp, dem neehn bring ekschra ail.

⁴ Bot di wan dem we av sens did waak wid ekschra ail fi fi dem lamp.

⁵ Di braidgruum did a tek lang fi kom, an sliip did staat fi uol dem dong an di uol a dem jrap a sliip.

⁶ “Bot iina di migl a di nait sumadi shout out: ‘Ei, di braidgruum de ya! Kom kom miit im.’

⁷ “Di yong gyal dem get op an staat fiks op dem lamp so it kuda bon gud.

⁸ Ier di fu-fuul wan dem tu di waiz wan dem no, ‘Gi wi som a unu ail no, kaa fi wi lamp suun out.’

⁹ “‘Nuo, nuo,’ dem ansa bak. ‘Wi na’av inof fi shier fi wi an fi unu. Go tu uu sel it an go bai som.’

¹⁰ “Bot wen dem go we go bai di ail, di braidgruum go kom, an di wan dem we did redi go wid im wich paat di wedn dina did a kip. Den di sorvant dem lak di duor.

¹¹ “Likl muo, di ada yong gyal dem kom bak. Ier dem no, ‘Laad, laad, uopm di duor fi wi no!’

¹² “Bot im ansa bak, ‘Ier mi no, an a chuu mi a taak, mi no iivn nuo unu!’

¹³ “So ier wa, mek shuor se unu eva redi an a luk out, kaa unu no nuo a wich die ar a wa taim di Man we Gad Pik a-go kom bak.

¹⁴ “Mek mi se dis tu, da taim de, Gad kindom a-go komiin laik wan man we a go wan faar plies, so im kaal op im sorvant dem an gi dem aal we im uon fi tek kier a til im kom bak.

¹⁵ Im gi wan a dem faiv bag a guol, im gi wan neks wan tuu bag, an im gi wan neks wan wan bag a guol. Im gi dem bies pan wa dem kyan manij. Den im lef go wich paat im a go.

¹⁶ Di wan we get di faiv bag a guol, im lef go we sed taim an yuuz da faiv bag de mek wan neks faiv bag a guol.

¹⁷ Di wan we did av tuu bag mek tuu muo tu.

¹⁸ Bot di wan we did get di wan bag a guol neehn du a ting dan go we go dig wan uol iina di grong an aid im maasta guol iin de.

¹⁹ “Lang afta dat, di maasta fi di sorvant dem kom bak an kom kom fain out a wa dem weehn du wid im guol dem.

²⁰ Di wan we did get di faiv bag kom bring faiv muo, ier im no, ‘Sa, yu gi mi faiv bag a guol fi tek kier a. Si mi mek faiv muo pan tap a it de.’

²¹ “Im maasta se, ‘Yu du gud mi sorvant! Yu a wan gud sorvant an mi kyan chos yu. Yu tek gud kier a wan likl sitn, so mi a-go mek yu tek chaaj a biga tingz! Kom kom nyam fuud an daans an praans wid mi.’

²² “Di wan we did get di tuu bag a guol dem kom tu im tu kom se, ‘Sa, yu did gi mi tuu bag a guol fi tek kier a. Si de, mi mek tuu muo pan tap a we yu did gi mi.’

²³ “Di maasta se tu im se, ‘Yu du gud mi sorvant! Yu a wan gud sorvant an mi kyan chos yu. Yu tek gud kier a wan likl sitn, so mi a-go mek yu tek chaaj a biga tingz! Kom kom nyam fuud an daans an praans wid mi.’

²⁴ “Den di sorvant we did get di wan bag a guol kom kom se, ‘Sa, mi nuo se yu a wan aad man. Yu pik we yu no plaant op an gyada we yu neehn skyata no siid,

²⁵ siek-a dat mi did fried, so mi aid yu guol iina di grong. Si de, yu get wa a fi yu uon.’

²⁶ “Bot im maasta ansa bak, ‘Yu woklis, gud fi notn, wikid sorvant yu! So yu nuo se mi pik we mi no plaant an gyada we mi neehn skyata no siid?

²⁷ So wa mek yu neehn put mi moni iina di bangk? Da wie de, wen mi kom bak, mi wuda get muo moni pan mi moni!

²⁸ “Ier mi no, tek di guol fram im an tek it gi di wan we av ten.

²⁹ Kaaz di wan we av, a-go get muo. Bot di wan we na’av notn, aal we im av a-go get tek we fram im.

³⁰ An tek da woklis sorvant ya dash im out wich paat it blak laka migl nait. A de-so piipl a-go a baal an grain dem tiit di wie pien a waks dem.’

³¹ “Wen di Man we Gad Pik kom wid di powa we im av kaa im a king, an aal a di ienjel dem kom wid im, im a-go sidong pan im tap-a-tap chuon.

³² Evribadi pan ort a-go kom tugeda infronta im, an im a-go plit op di piipl dem laik ou sumadi we tek kier a shiip, muuv di shiip dem fram wich paat di guot dem de.

³³ Im a-go put di shiip dem pan im rait-an-said an di guot dem pan im lef.

³⁴ “Den di king a-go se tu di wan dem pan im rait-an-said se, ‘aal a unu we mi Faada bles, kom kom tek Gad Kindom, a fu’unu uon. Gad did fiks it op fu’unu fram im a mek di worl.

³⁵ Kaaz mi did onggri an unu gi mi fuud. Mi chuot did jrai an unu gi mi sitn fi jringk. Unu neehn nuo mi an unu tek mi iin siem wie.

³⁶ Mi neehn av aan no kluoz an unu gi mi kluoz fi put aan. Mi did sik an unu tek kier a mi. Mi did de iina prizn an unu kom luk fi mi.’

³⁷ “Den di piipl dem we du rait iina Gad yai a-go ansa bak se, ‘Laad, a wen wi did si yu onggri an fiid yu, ar a wen fi yu chuot weehn jrai an wi gi yu sitn fi jringk?

³⁸ A wen wi si yu, no nuo yu, an weehn tek yu iina wi ous?

³⁹ A wen wi weehn si yu sik sa, ar a wen yu did iina prizn an wi did kom kom luk fi yu?’

⁴⁰ “An di king a-go ansa bak, ‘Mi tel unu dis, an a chuu mi a taak, di taim dem wen unu weehn du dem sitn de fi wan a mi breda an sista dem we piipl se no wot notn, a laik se a mi unu did dwi’it fa.’

⁴¹ “Den di king a-go se tu aal uu de pan im lef-an-said se, ‘Gwe fram saida mi! Gwaan go bon op iina di faiya we a bliez fi eva an eva. A it Gad did fiks op fi di devl an im ienjel dem, bot im a sen unu go de tu!

⁴² Kaaz mi did onggri an unu neehn gi mi notn fi nyam. Wen mi chuot weehn jrai unu neehn gi mi notn fi jringk.

⁴³ Unu neehn nuo mi an unu neehn tek mi iin wen mi did kom mongks unu. Mi neva av aan no kluoz an unu neehn gi mi non fi put aan. Mi weehn sik, mi did de iina prizn an unu neehn kom luk fi mi.’

⁴⁴ “Den dem tu a-go se, ‘Laad a wen wi did si yu an yu weehn onggri ar yu chuot weehn jrai? A wen yu neehn av aan no kluoz Laad, an a wen yu weehn sik ar iina prizn an wi neehn elp yu, iihn? A wen dat?’

⁴⁵ “Den im a-go ansa bak, ‘Mi tel unu dis an a chuu mi a taak, di siem wie unu neehn du dem sitn de fi wan a mi breda an sista dem we piipl se no wot notn, a siem so unu neehn du dem fi mi, kaa a laik a mi unu neehn elp wen unu neva elp dem.’

⁴⁶ “An dem piipl ya, dem a-go go wich paat dem get ponish fi eva, bot di wan dem we du we rait iina Gad yai, Gad a-go mek dem liv fi eva.”