Read Jamaican Patois Matyu 26 Bible Online

Matyu 26 - Jamaican Patois bible

Matyu 26

¹ Wen Jiizas don se aal a dem sitn ya, im se tu im speshal falara dem se,

² “Unu nuo se tuu die fram nou di Paasuova alidie we piipl nyam bred widout yiis a kom, an dem a-go an uova di Man we Gad Pik so dem kyan kil im pan di kraas.”

³ Den di ed priis an di Juu elda dem miit op wich paat di liida fi di priis dem liv — di liida fi di priis dem did niem Kaiyafas.

⁴ Di gruup a dem plan ou dem wuda fain som chrikifai wie an uol aan pan Jiizas so dem kuda kil im.

⁵ Bot dem se, “Mek wi no dwi’it pan di Paasuova alidie, kaa di piipl dem mait-a kaaz el-an-pouda-ous!”

⁶ Jiizas did de a Betani, a Saiman yaad. Saiman a wan a dem we did av di siknis we mek yu skin fasi-fasi.

⁷ Nou wen Jiizas did de de-so, wan uman kom tu im wid wan dier porfyuum iina wan likl stuon jaar. Jiizas did de roun di tiebl wen shi tek di stuon jaar an chuo out di porfyuum pan im ed.

⁸ Wen im falara dem si dis ya, dem beks so til dem bout fi bos, ier dem no, “We shi wies di porfyuum so fa?

⁹ It kuda did sel fi uol iip, an tek di moni gi puo piipl!”

¹⁰ Jiizas did don nuo wa dem did a se, so im se tu dem se, “We unu a bada di uman fa? A sitn gud shi du tu mi.

¹¹ Kaaz unu a-go eva av puo piipl roun unu, bot unu naa go av mi roun ya wid unu fi eva.

¹² Wen shi chuo di porfyuum pan mi badi, shi a get mi redi fi wen dem a-go beri mi.

¹³ Ier mi no, an a chuu mi a taak, enitaim piipl priich da Gud Nyuuz ya roun di worl, dem a-go memba ar an taak bout wa shi du.

¹⁴ Den wan a Jiizas twelv falara dem, di wan we niem Juudas Iskyariyat, lef go wich paat di ed priis dem de.

¹⁵ Ier im tu dem no, “Wa unu wi gi mi, ef mi elp unu ares Jiizas?” So dem kount out toti silva kain an se a dat im wi get.

¹⁶ Fram da taim de Juudas staat luk fi wan chaans fi sel out Jiizas.

¹⁷ Nou di alidie wen piipl nyam bred widout yiis did kom. Pan di fos die a da alidie de, Jiizas speshal falara dem kom tu im an se, “We yu waahn wi fi luk aafa di Paasuova fuud fi yu nyam?”

¹⁸ So Jiizas se, “Go tu suo-an-so iina di toun an tel im dis, ‘Di Tiicha se, “Mi taim suun kom. Mi a-go nyam di Paasuova fuud wid mi speshal falara dem a fi yu ous.”

¹⁹ Im falara dem du wa im tel dem fi du, an dem luk bout di Paasuova fuud.

²⁰ Wen iivnin kom, im go sidong a di tiebl wid im twelv falara dem.

²¹ An wen dem de de a nyam a gwaan, im se tu dem se, “Mi tel unu dis, an a chuu mi a taak, wan a unu a-go sel mi out.”

²² Dem aat get evi, an evri wan a dem staat se tu im se, “A kyaahn mi, Laad?”

²³ Jiizas ansa bak, “Di wan we dip im an iina di boul wid mi, a im a-go sel mi out.

²⁴ Di Man we Gad Pik mos go siem ou Gad wod se im a-go go, bot yu si di man we sel im out — chobl fi’im mi tel yu! Im wuda betaraaf ef im neehn baan.”

²⁵ Den Juudas, di sed wan we did a go sel out Jiizas, ier im no, “A kyaahn mi, Tiicha?” Jiizas se, “Yu se so yuself.”

²⁶ Wen taim dem de de a nyam, Jiizas tek di bred, gi tangks an brok it gi im falara dem. Im se, “Tek dis an nyam it. Dis a mi badi.”

²⁷ Den afta im tek di kop an gi tangks, im gi dem an se, “Aal a unu, jringk fram it.

²⁸ Kaaz dis a mi blod. A da blod ya yuuz fi set op di nyuu plan we Gad mek wid unu. A da blod ya ron fi evribadi, so dem kyan get paadn fi dem sin.

²⁹ Ier wa mi a se, mi naa jringk no muo wain til da die de kom wen mi jringk it wid unu wan nyuu wie iina mi Faada Kindom.”

³⁰ Afta dem sing wan im don, dem lef go a Mount Aliv.

³¹ Den Jiizas se tu dem se, “Tinait, tinait, di uol a unu a-go ron we lef mi siek-a wa a-go apm tu mi, kaa it rait dong iina Gad wod se: “‘Mi a-go lik dong di shepad, an aal a di shiip dem a-go ron aal bout di plies.’

³² Bot afta mi kom bak alaiv, mi a-go go iina Gyalalii bifuo unu.”

³³ Piita se, “Aal ef di uol a dem ron we gaan siek-a wa a-go apm tu yu, mi naa go no we!”

³⁴ Jiizas se tu im se, “Mi a tel yu dis an a chuu mi a taak, tinait tinait, bifuo di ruusta kruo, yu a-go se yu no nuo mi, chrii taim.”

³⁵ So Piita se, “Aal ef dem afi kil mi wid yu, mi wi neva se mi no nuo yu.” An aal a im speshal falara dem se di siem ting.

³⁶ Den Jiizas an im falara dem lef go wan plies we niem Getsemini, an im se tu dem se, “Sidong ya-so wail mi go uova de-so go prie.”

³⁷ Im tek Piita an Zebidii tu bwai dem wid im. Im did wel sad. Im aat did evi.

³⁸ Den im se tu dem se, “Mi aat evi so til mi fiil laik da presha ya a go kil mi. Tan ya-so an no bada go sliip pan mi.”

³⁹ Jiizas go out likl forda an dash imself a grong, ton dong im fies an im prie. Im se, “Mi Faada, ef yu kyan dwi’it, du, tek da kop ya fram mi! Bot a no wa mi waahn stil, a wa yu waahn.”

⁴⁰ Den im kom bak tu im falara dem an kom fain dem a sliip. Im se tu Piita se, “So unu kudn tan wid mi an kip wach fi wan owa — unu gaan gaan sliip?

⁴¹ No sliip. Kip wach an prie so unu no fies notn we wi kaaz unu fi sin. Kaaz iina unu aat unu waahn du wa rait, bot unu a jos piipl an dat mek unu wiik.”

⁴² Im go we wan sekan taim go prie. Im se, “Mi Faada, ef dis a di onggl wie, an mi afi jringk fram da kop ya, den mi afi du wa yu waahn.”

⁴³ Im kom bak agen an kom kech dem a sliip. Dem kudn kip op. Sliip did a kil dem; dem yai did evi.

⁴⁴ So im lef dem agen an go we go prie wan tord taim. Im se di sed ting agen.

⁴⁵ Den im kom bak tu im speshal falara dem an se, “Unu stil a sliip an a res? Si ya, di taim a kom nou wen dem sel out di Man we Gad Pik an an im uova tu di wikid piipl dem.

⁴⁶ Git op! Mek wi go nou! Si ya no! Di wan we sel mi out kom nou!”

⁴⁷ Wen Jiizas did stil de de a taak, Juudas, wan a im twelv speshal falara dem, kom. Wan bag a piipl kom wid im. Dem did kom wid suod an big tik, an a di ed priis an Juu liida dem did sen dem.

⁴⁸ (Nou di wan we sel out Jiizas did gi dem wan sain. Im se, “Di wan we mi kis, a im a di man. Ares im!”)

⁴⁹ So siem taim im go op tu Jiizas an se, “Oudi Tiicha,” an kis im.

⁵⁰ Jiizas se tu im se, “Fren, du wa yu kom ya fi du.” Den dem kom kom uol aan pan Jiizas an ares im.

⁵¹ Bot wan a Jiizas falara dem grab im suod an tek it chap aaf di iez a di sorvant fi di liida fi di priis dem.

⁵² Den Jiizas se tu im se, “Put op bak yu suod! Kaaz enibadi we tek op suod fait, a suod a-go kil dem.

⁵³ Ar a tingk unu tingk se mi kyaahn kaal pan mi Faada? An im wudn sen wan bag a ienjel kom elp mi rait ya nou — muo dan twelv big gruup a dem.

⁵⁴ Bot ef mi du dat, ou wa rait dong iina Gad wod, we se a so it fi go, wuda kom chuu, iihn?”

⁵⁵ Da taim de, Jiizas se tu di kroud a piipl se, “A kom unu kom wid suod an big tik fi ares mi laik se mi a oul tiif an mordara?” Die iin die out unu si mi iina di yaad we Gad ous de a tiich, an unu no ares mi.

⁵⁶ Bot dis ya apm so wa di prafit dem se iina Gad wod kyan kom chuu.” Den aal a im speshal falara dem ron we lef im.

⁵⁷ Nou di piipl dem we ares Jiizas, tek im kyari im go a Kaiyafas. Im did a di liida fi di priis dem, an a fi im ous di Laa tiicha an elda dem did gyada op.

⁵⁸ Bot Piita did de likl forda aaf a fala Jiizas. Im fala im go aal di wie tu wich paat di liida fi di priis dem liv. Im go iin de an go sidong out iina di yaad wid di gyaad dem fi si wa a-go apm tu Jiizas.

⁵⁹ Di ed priis an aal a di Juu liida dem did a chrai kom op wid aal kain-a lai fi tel pan Jiizas so dem kuda kil im.

⁶⁰ Bot dem kudn fain notn fi yuuz kil im, iivn duo wan bag a piipl kom op kom tel lai pan im. Den tuu piipl kom op.

⁶¹ Ier dem no, “Da man ya se, ‘Mi kyan mash op Gad ous an bil it bak iina chrii die.’ ”

⁶² So di liida fi di priis dem tan op an se tu Jiizas se, “Yu naa notn fi se? A wa kain-a sitn dem ya, dem a se bout yu?”

⁶³ Bot Jiizas no se notn. Di liida fi di priis dem se tu im se, “Infronta di Gad we liv, mi de kaal pan yu fi taak chuut, yu a di Krais, Gad Pikni?”

⁶⁴ So Jiizas se tu im se, “Yu se it yuself. Bot ier mi no, fram nou aan yu a-go si di Man we Gad Pik a sidong a di rait an a di wan we powaful, an a kom dong pan kloud we kom outa evn.”

⁶⁵ Wen di liida fi di priis dem ier dat de, im tier im kluoz an se, “Im tingk se im an Gad a wan! Im disrispek Gad! Wa wi waahn muo piipl fi pruuv notn fa? Unu ier im a dis op Gad!

⁶⁶ Wa di kuot se?” Dem se, “Im gilti. A ded im fi ded.”

⁶⁷ Den dem pit iina im fies an tomp im op. An som a dem slap im op

⁶⁸ an se, “Yu no prafit? Iihn Krais Jiizas? So tel wi a uu lik yu!”

⁶⁹ Nou Piita did a sidong out iina di yaad we di liida fi di priis dem liv. Wan sliev gyal kom op tu im an se, “Di man fram Gyalalii, Jiizas, yu did de mongks im tu.”

⁷⁰ Bot Piita se a lai shi a tel infronta aal a dem: “Mi no nuo we ya’a chat se!”

⁷¹ Wen im go outa di giet wan neda sliev gyal si im an se tu di piipl dem we did out de se, “Da man ya did de mongks Jiizas we kom fram Nazaret.”

⁷² Im se a lai shi did a tel tu. Da taim ya im swier. Ier im no, “Mi? Nuo sa! Mi swier se mi no nuo di man!”

⁷³ Likl lieta, di piipl dem we tan op de kom tu Piita an se, “Yu a riili wan a dem tu — aal ou yu chat gi yu we man, yu soun laik dem!”

⁷⁴ Piita staat kos an kaal dong aal kain-a kraasiz pan imself. An im swier an se, “Mi no nuo di man!” Sed taim wan kak kruo.

⁷⁵ Den Piita memba we Jiizas did se: “Bifuo di ruusta kruo, yu a-go se yu no nuo mi, chrii taim.” Piita go outsaid an im baal, an im baal, an im baal so til.