Read Jamaican Patois Matyu 27 Bible Online

Matyu 27 - Jamaican Patois bible

Matyu 27

¹ Orli orli iina di maanin, aal a di ed priis an Juu elda dem miit op an mek op dem main fi kil Jiizas.

² Dem tai im op, kyari im go we an an im uova gi Pailat, di govana.

³ Wen Juudas, di wan we did sel im out, si se dem gi uova Jiizas fi dem kil im, im sari bout wa im did du, an kyari bak di toti silva kain dem go gi di ed priis an elda dem.

⁴ Ier im no, “Mi sin, mi sin, kaa mi sel out sumadi we neehn du notn rang!” Bot dem se tu im se, “Wa dat av fi du wid wi? A fi yu prablem dat, gwaan go diil wid dat yuself!”

⁵ So Juudas chuo dong di silva kain dem iina Gad ous an lef de-so. Den im go we go eng imself.

⁶ Di ed priis dem tek op di moni an se, “It no rait fi wi put da moni ya wid Gad moni, kaa a blod moni dis.”

⁷ So dem taak wid dem wan aneda an mek op dem main fi tek di moni bai piis a lan we bilang tu sumadi we mek klie pat, an dem yuuz da lan de beri farina.

⁸ A so kom, aal a nou, piipl kaal da piis a lan de ‘Blod Fiil.’

⁹ Siek-a dat, we di prafit Jerimaiya did se kom chuu. Im did se: “Dem tek di toti silva kain dem, a dat di Izrel piipl dem se im wot,

¹⁰ an dem tek dat bai di piis a lan we bilang tu sumadi we mek klie pat, a siem so di Laad tel mi it fi go.”

¹¹ Nou Jiizas tan op infronta di govana, an di govana aks im se, “Yu a di Juu dem king?” Jiizas se, “A yu se so.”

¹² An wen di liida fi di priis dem an di Juu liida dem se im du aal kain-a rang sitn, im neehn ansa bak.

¹³ Den Pailat se tu im se, “Yu no ier umoch bad sitn dem se yu du?”

¹⁴ Bot Jiizas no ansa no iivn wan a dem; dat did sopraiz di govana.

¹⁵ Nou iina di Paasuova Alidie, di govana aalwiez frii wan prizna; enibadi we di kroud waahn.

¹⁶ Dis ya taim dem did lak op wan wikid prizna. Evribadi did nuo im. Im did niem Jiizas Barabas.

¹⁷ So afta di kroud a piipl gyada op, Pailat se tu dem se, “Uu unu waahn mi le’go fu’unu nou, Jiizas Barabas ar Jiizas di wan we dem kaal Krais?”

¹⁸ (Kaaz Pailat nuo se dem onggl bring iin Jiizas kaa dem bad main.)

¹⁹ Wen Pailat de de a sidong iina im speshal siit az joj fi di kies, im waif sen im da mesij ya: “No av notn fi du wid da man de kaa im no du notn rang. Mi av wan bad bad jriim bout im tide. Laaks! It mek mi sofa.”

²⁰ Bot di ed priis an Juu elda dem push di piipl dem fi aks fi Barabas an fi mek dem kil Jiizas.

²¹ Di govana aks dem, “Outa di tuu a dem, wich wan unu waahn mi le’go?” An di piipl dem se, “Barabas!”

²² Pailat se tu dem se, “Den wa mi fi du wid Jiizas we dem kaal Krais?” Di uol a dem se, “Niel im pan di kraas!”

²³ So im se, “Fi wa? Wa rang im du?” Bot dem shout louda dan dem did a shout fos, “Niel im pan di kraas!”

²⁴ Wen Pailat si se im neva did a go no we wid dis ya, bot did onggl a rail op di kroud muo, im tek waata wash im an infronta dem an se, “A no mi mek da man ya ded. Fi’im blod de pan fu’unu ed!”

²⁵ Aal a di piipl dem se, “Ye, bliem wi! Mek im blod kom dong pan wi an wi pikni dem!”

²⁶ Den im let go Barabas gi dem. Im mek dem tek wip biit Jiizas, an den gi im uova fi dem niel im pan di kraas.

²⁷ Den di govana suoja dem tek Jiizas wich paat di govana liv an kaal op di ada suoja dem fi gyada op roun im.

²⁸ Dem tier aaf im kluoz an put aan wan brait red ruob pan im.

²⁹ Afta dem mek wan kroun outa makabush, dem put it pan im ed. Dem put piis a tik iina im rait an, an dem niil dong infronta im, an a muuv laik se dem did waahn tek im fi iidiyat. Ier dem no, “Manaz an rispek tu di Juu dem King!”

³⁰ Dem pit pan im an tek big tik biit im iina im ed, uova an uova.

³¹ Afta dem mak im don, dem tek aaf di ruob an put aan bak fi im uona kluoz. Den dem kyari im go we fi niel im pan di kraas.

³² Wen dem a go we wid Jiizas, dem fain wan man fram Sairiin, we niem Saiman. Dem fuos im fi kyari Jiizas kraas.

³³ Dem kech a wan plies we niem Golgota (we miin di Skol Plies)

³⁴ an di suoja dem gi im wain miks op wid sitn bita fi jringk, bot wen Jiizas ties likl im neehn waahn jringk it.

³⁵ Wen dem don niel im pan di kraas, dem chuo dais fi shier op im kluoz.

³⁶ Den dem sidong rait de-so an gyaad im.

³⁷ Uova im ed dem put op wan sain we shuo a wa im du mek dem kil im. It se, “DIS A JIIZAS, DI JUU DEM KING.”

³⁸ Wen dem did a niel im pan di kraas, dem did niel op tuu tiif tu. Wan did de pan im rait-an-said an wan pan im lef-an-said.

³⁹ Di piipl dem we did a paas se aal kain-a torbl sitn bout im. Dem shiek dem ed.

⁴⁰ Ier dem no, “Yu, we kyan mash op Gad ous an bil it bak iina chrii die, siev yuself no! Ef ya’a Gad Bwai Pikni, kum dong aafa di kraas!”

⁴¹ A no dem wan, aal di ed priis, plos di Laa tiicha an elda dem did a laaf aafa Jiizas. Ier dem no,

⁴² “Im siev ada piipl, bot im kyaahn siev imself! Im a di King fi Izrel? A wa kain-a king im bi? Im a Izrel king! Mek im kom dong aafa di kraas nou an wi wi biliiv wa im se.

⁴³ Im se im chos iina Gad, den mek Gad siev im ef a dat Gad waahn du, kaa im no se, ‘Mi a Gad pikni!’ ”

⁴⁴ Aal di tiif dem we did niel pan di kraas wid im did kos im out tu.

⁴⁵ Nou fram migl die di uol plies get daak til chrii aklak.

⁴⁶ Wen it kech bout chrii aklak, Jiizas shout out loud loud, “Eli, Eli, lema sabaktanai?” Dat miin, “Mi Gad, mi Gad, wa mek yu lef mi an gaan?”

⁴⁷ Wen som a di piipl dem we did tan op de ier im, dem se, “Da man ya a kaal fi Ilaija.”

⁴⁸ Sed taim, wan a dem ron go get wan sponj an ful it op wid sowa wain an put it pan wan piis a tik an gi im fi jringk.

⁴⁹ Bot di res a dem se, “Lef im an mek wi si ef Ilaija a-go kom kom siev im.”

⁵⁰ Den Jiizas baal out agen loud loud an put im spirit iina Gad an.

⁵¹ Siem taim, di kortn we did eng op iina Gad ous plit iina tuu, fram tap tu batam. Di ort shiek op an di rakstuon dem plit uopm.

⁵² Tuum flai uopm, an uol iip a Gad piipl dem we did ded kom bak alaiv.

⁵³ Dem kom outa dem tuum. An afta Jiizas ded an kom bak, dem go iina Jeruusilem, an uol iip a piipl si dem.

⁵⁴ Wen di ed fi onjrid suoja, an di suoja dem we did de wid im a gyaad Jiizas, si di ortkwiek an aal we did a apm, dem kech dem fried wikid wikid. Ier dem no, “Fi riil, da wan ya did a Gad Bwai Pikni fi chuu!”

⁵⁵ Uol iip a uman did tan op forda out a wach we a gwaan. Dem did kom wid Jiizas fram Gyalalii an did a luk aafa im.

⁵⁶ Iina di gruup, yu did av Mieri Magdaliin, Mieri — dat a Jiemz an Juozif mada, an Zebidii bwai pikni dem mada did de de tu.

⁵⁷ Nou wen iivnin kech, wan rich man fram Arimatiya we niem Juozif, kom. Im did a wan a Jiizas falara dem tu.

⁵⁸ Im go a Pailat go aks im fi Jiizas badi, an Pailat se dem fi gi im it.

⁵⁹ Juozif tek di badi, rap it op iina wan kliin linin klaat

⁶⁰ an put it iina wan nyuu tuum — dat a did fi im uona tuum we did iina di rak. Den im ruol wan big big stuon kraas infronta di tuum.

⁶¹ Mieri Magdaliin an di ada Mieri did a sidong de, kraas fram di tuum.

⁶² Di neks die, dat a did di Sabat die, di ed priis dem an di Farisii dem miit op tugeda infronta Pailat.

⁶³ Dem se, “Sa, wi memba wen da oul laiyad de did stil a liv, ou im weehn se, ‘Afta chrii die mi a-go kom bak alaiv.’

⁶⁴ So tel dem sa fi mek shuor se di tuum gyaad gud gud til di tord die, so im falara dem no kom kom tek we im badi an tel di piipl dem se, ‘Im kom bak alaiv.’ Ef dem se so an chrik op piipl, dat de lai wuda wos dan di fos wan, wen im did kliem se a im a di Krais.”

⁶⁵ So Pailat se tu dem se, “Tek wan gruup a suoja fi go gyaad di tuum, an mek shuor se dem gyaad it di bes wie dem kyan gyaad it.”

⁶⁶ So dem lef go we wid di suoja dem, an dem maak di stuon so dem wuda nuo ef nobadi muuv it.