Read Jamaican Patois Matyu 28 Bible Online

Matyu 28 - Jamaican Patois bible

Matyu 28

¹ Nou afta Sabat don, orli Sonde maanin, di fos die a di wiik kom, Mieri Magdaliin an di neks Mieri go fi go luk pan di tuum.

² An aal av a sodn wan wikid wikid ortkwiek shiek op di plies kaa wan a Gad ienjel dem kom dong fram evn an kom ruol we di stuon an sidong pan it.

³ Im did luk brait laka laitnin an im kluoz did wait laik sunuo.

⁴ Di gyaadi dem did so fraitn dem a shiek iina dem buon. Dem jrap a grong an tif out laka ded dem ded.

⁵ Bot di ienjel se tu di uman dem se, “No fried; mi nuo se a Jiizas unu a luk fa, di wan we dem kil pan di kraas.

⁶ Im no de ya, kaa Gad mek im kom bak alaiv, jos laik wa im did se. Kom luk wich paat im did a lidong.

⁷ Den ori op an go tel im falara dem se, ‘Im ded an kom bak alaiv. Im a go a Gyalalii til unu kom. Unu wi si im de wen unu riich.’ Mi tel unu we mi did fi tel unu!’ Lisn wa mi se an du wa mi se unu fi du.”

⁸ Di uman dem tek aaf kwik kwik! Dem fraitn an glad siem taim, an dem ron go tel Jiizas falara dem.

⁹ Bot Jiizas miit dem op an se tu dem se, “Iel!” Dem kom tu im, ben dong a grong, uol aan pan im fut an worship im.

¹⁰ Den Jiizas se tu dem se, “No fried. Gwaan go tel mi breda dem se dem kyan go a Gyalalii. Dem wi si mi de.”

¹¹ Siem taim dem a go de-so, som a di gyaadi dem go iina di toun go tel di ed priis dem evriting we apm.

¹² Afta dat, di ed priis dem miit op wid di elda dem an kuk op wan plan. Dem gi di suoja dem wan uol iip a moni

¹³ an se tu dem se, “A dis unu fi tel evribadi se, ‘Im falara dem kom iina di nait an kom tiif im badi wen wi weehn a sliip.’

¹⁴ Ef di govana ier da tuori ya, wi wi wok it out an mek shuor se unu no get iina no chobl.”

¹⁵ So dem tek di moni an du wa dem tel dem fi du. An piipl stil a taak da tuori ya mongks di Juu dem op tu tide die ya.

¹⁶ So Jiizas ilevn falara dem go a Gyalalii a di mountn we im did tel dem fi go.

¹⁷ Wen dem si im, dem worship im, bot som a dem neehn tuu shuor ef a im.

¹⁸ Den Jiizas kom kom se tu dem se, “Gad gi mi powa uova evriting we a liv iina evn an pan ort.

¹⁹ So gwaan, yuuz fi mi powa, tiich mi mesij tu piipl evriwe, so dem kyan ton mi falara tu. An yuuz di powa we di Faada, di Bwai Pikni an di Uoli Spirit gi an baptaiz dem.

²⁰ Gwaan go tiich dem fi lisn an fala aal a di ruul dem we mi gu’unu. An memba, mi no lef unu non at aal, mi de wich paat unu de til taim don.”