Read Jamaican Patois Matyu 3 Bible Online

Matyu 3 - Jamaican Patois bible

Matyu 3

¹ Nou iina dem die de, wan man niem Jan di Baptis kom iina di dezot paat a Judiya an staat priich Gad wod.

² Im se, “Ton we fram unu sin, kaa di die suun kom wen evn a-go ruul uova di worl iina evri wie!”

³ A im Aizaiya, di prafit, did a taak bout wen im se: “Sumadi a shout iina di dezot, ‘Klier di wie fi di Laad kom chuu, mek di chrak we im fi waak pan chriet.’”

⁴ Nou a kluoz we mek outa Kyamil ier Jan did wier, an im did av wan leda belt roun im wies. An fi im fuud a did graasapa an oni we im get outa di dezot.

⁵ Piipl fram Jeruusilem, piipl fram di uol a Judiya an aal a di plies dem nier Jaadn riva did a go tu im,

⁶ an wen dem taak infronta evribadi bout aal a di rang sitn we dem du, an ou dem sari se dem du dem sitn de, im baptaiz dem iina di Jaadn Riva.

⁷ Bot wen im si uol iip a piipl fram di Farisii an Sadyusii gruup a kom fi im baptaiz dem, im se tu dem se, “Unu siniek pikni unu! A uu waan unu fi ron we fram di jojment we a kom?

⁸ Du di sitn dem we shuo se unu riili tap sin.

⁹ An no bada se dis an tingk se unu sief: ‘A Iebriyam a wi faada.’ Mek mi tel unu sopm, Gad kyan mek pikni fi Iebriyam outa dem rakstuon ya ef im waahn!

¹⁰ Rait ya nou di aks de a di chrii ruut. An evri wan a di chrii dem we naa bier gud fruut a-go chap dong an bon op iina faiya.

¹¹ “Mi tek waata baptaiz unu fi shuo se unu ton we fram sin. Bot sumadi a kom we muo powaful dan mi. Mi no iivn gud inof fi aal kyari im slipaz. Im wi tek di Uoli Spirit an faiya, an baptaiz unu.

¹² Im av im faak iina im an redi, an im a-go riek op di fluor wich paat di grien chrash out. Im a-go gyada op di grien an put it iina di bochri, bot im a-go bon op di chrash iina wan faiya we kyaahn out.”

¹³ Den Jiizas kom fram Gyalalii fi Jan baptaiz im iina Jaadn Riva.

¹⁴ Bot Jan chrai fi tap im. Jan se, “A yu fi a baptaiz mi, an yu kom fi mi baptaiz yu?”

¹⁵ So Jiizas ansa im se, “Rait ya nou, du wa mi aks yu fi du, da wie ya wi wi du aal we Gad waahn wi fi du!” So Jan se aarait den an du it.

¹⁶ Az Jiizas don baptaiz so, wen im a kom op outa di waata, aal av a sodn evn uopm op an im si Gad Spirit a kom dong pan im laka wan dov.

¹⁷ An wan vais fram evn se, “Dis a mi wan dege-dege Bwai Pikni, mi lov im, an im mek mi aat glad.”