Read Jamaican Patois Matyu 4 Bible Online

Matyu 4 - Jamaican Patois bible

Matyu 4

¹ Den di Uoli Spirit tek Jiizas iina di dezot so di devl kuda chrai fi mek im du rang.

² Afta Jiizas neehn nyam notn fi uol-a faati die an faati nait, im beli did a baal tu ou im onggri.

³ A da taim de di devl, we eva a chrai mek piipl du rang, kom se tu im se, “Ef yu a Gad Bwai Pikni, tel dem rakstuon ya fi ton bred.”

⁴ Jiizas ansa bak, “It rait dong iina Gad wod se, ‘Man no liv pan bred wan. Bot wi niid evri wod we kom outa Gad mout fi riili liv.”

⁵ Afta dat, di devl tek Jiizas kyari im go Jeruusilem, di uoli siti. Im mek im go tan op pan di taalis paat a Gad ous,

⁶ an im se tu im se, “Ef yu a Gad Bwai Pikni, jomp aafa ya-so. Kaaz it rait dong se, ‘Gad wi tel im ienjel dem fi tek gud kier a yu,’ an dat ‘Dem a-go kech yu, so yu no lik op yu fut pan rakstuon.’ ”

⁷ Jiizas ansa im se, “Bot it rait dong tu, se ‘No tes di Laad we a yu Gad.’”

⁸ Den di devl kyari im go wan taal taal mountn an shuo im aal a di konchri dem iina di worl an shuo im ou dem luk gud an ting.

⁹ Den im se tu Jiizas se, “Mi wi gi yu aal a dem sitn ya ef yu go dong pan yu nii an se mi a Gad, an worship mi.”

¹⁰ Jiizas ansa bak, “Muuv an gu we fram mi Sietan! It rait dong se, ‘Yu fi worship di Laad we a yu Gad, an a im wan yu fi sorv.’”

¹¹ Afta dat di devl lef im, an ienjel kom kom luk aafa im.

¹² Nou wen Jiizas ier se dem lak op Jan, im lef go a Gyalalii.

¹³ Wen im de a Gyalalii, im lef fram Nazaret an kom liv a Kyaporniyom, a di sii-said, iina di Zebyulan an Naftali ieriya,

¹⁴ da wie de, wa di prafit Aizaiya did se wuda kom chuu:

¹⁵ “Zebyulan an Naftali, di plies dem we yu afi paas wen ya’a go a Gyalalii sii, di plies dem we de kraas fram Riva Jaadn, di siem Gyalalii we di piipl dem we a no Juu liv —

¹⁶ di piipl dem we sidong iina di daak Gad shuo dem wan nyuu laif — a laka wan brait lait dem si. An aal uu weehn a liv, bot neehn riili a liv fi chuu, a laik nait don an di son a kom op, kaa Gad kom kom siev unu ya nou.”

¹⁷ Fram da taim de, Jiizas staat priich da mesij ya: “Ton we fram unu sin an chienj unu wiez, kaa di die suun kom wen evn a-go ruul uova di worl iina evri wie!”

¹⁸ Wen Jiizas did a waak saida Gyalalii sii, im si tuu breda: Saiman, we dem kaal Piita, an Saiman breda, Anju. Di tuu a dem did a fling out dem net iina di sii fi kech fish, kaa dem did a fishaman.

¹⁹ Jiizas se tu dem se, “Fala mi, an mi a-go mek unu ton fishaman we kech piipl.”

²⁰ Dem lef dem net sed taim an fala Jiizas.

²¹ Wen im lef de-so an go forda out im si tuu ada breda: Jiemz an Jan — Zebidii bwai pikni dem. Di tuu a dem did de iina di buot wid dem faada a fiks op dem net. Jiizas kaal dem.

²² Dem no bada lie-lie, dem lef dem buot an dem faada sed taim, an fala Jiizas.

²³ Da taim de, Jiizas did go aal uova Gyalalii a tiich iina di Juu dem choch. Im did a priich di gud nyuuz bout Gad kindom an a get piipl beta — piipl we av aal kain-a siknis an we sik iina aal saat a wie.

²⁴ So piipl staat ier bout im muo an muo aal roun Siriya, an dem kyari aal saat a piipl kom we sik iina dis ya wie ar dat de wie. Dem kyari piipl we pien op an a sofa fram aal saat a kraasiz, an aal uu did a sofa fram sitn we mek dem kech fits dem kyari dem kom tu. Dem kyari piipl we kyaahn waak, piipl we av diiman iina dem, an Jiizas get di uol a dem beta.

²⁵ Siek-a dat, wan bag a piipl staat fala baka im: piipl fram Gyalalii, di ten toun dem we dem kaal Dikyapolis, piipl fram Jeruusilem, Judiya an di plies dem we de paas Riva Jaadn.