Read Jamaican Patois Matyu 5 Bible Online

Matyu 5 - Jamaican Patois bible

Matyu 5

¹ Wen Jiizas si di kroud a piipl dem, im go op pan di mountn go sidong, an im falara dem kom tu im.

² Im uopm op im mout an staat fi tiich dem. A dis im se:

³ “Aal a unu we nuo se unu niid Gad iina evri wie, Gad bles unu, kaa di gud sitn dem we Gad gi wen im ruul piipl laif iina evri wie, a unu a-go get dem.

⁴ Aal a uu a baal nou, Gad bles dem, kaaz di taim a-go kom wen Gad a-go osh dem an mek dem api agen.

⁵ Aal a uu ombl demself, Gad bles dem, kaa yu si di ort, a dem piipl de a-go kom get it.

⁶ Uu waahn du wa rait iina Gad yai so bad, dat it komiin laik se a ded dem a ded fi onggri an dem chuot jrai laik se dem no jringk waata ou lang, Gad bles unu, kaa unu a-go get unu beli ful

⁷ Unu we paadn piipl, Gad bles unu, kaaz im a-go paadn unu tu.

⁸ Aal a uu onggl waahn fi du di sitn dem we mek Gad api, Gad bles unu, kaaz wan die, wan die, unu a-go get fi si Gad.

⁹ Gad bles aal a uu elp piipl fi liv iina piis, kaaz a piipl laik dem de Gad a-go kaal fi im pikni dem.

¹⁰ Di piipl dem we ada piipl mek sofa jos kaaz dem liv ou Gad waahn piipl fi liv, Gad bles unu, kaa di gud sitn dem we Gad gi wen im ron piipl laif ou im waahn ron it, a dem sitn de unu a-go get.

¹¹ Gad bles unu wen piipl shiem unu, wen dem mek unu sofa an wen dem se aal kain-a wikid sitn bout unu we no chuu — bot se it jos kaaz unu fala mi.

¹² Mek unuself api wen dem sitn de apm tu unu; jomp op an dong wid jai iina unu aat, kaa nof gud sitn pudong iina evn fi unu. A siem so dem yuus tu chriit Gad prafit dem we did de ya bifuo unu kom.

¹³ “Unu a laik saalt fi di uol worl yu no. Bot ef di ties gaan outa di saalt, ou it fi ties bak laik saalt? It no wot notn nou. It fi jos dash we an tep tep op pan.

¹⁴ “Unu a laik lait we di uol worl niid. Wan siti we de pan di il tap, it kyaahn aid.

¹⁵ Nobadi no lait lamp an kova it op anda wan boul — nuo sa! Lamp pudong we it kyan lait op di uol ous.

¹⁶ A siem so unu fi shain unu lait mek evribadi si, da wie de dem kyan si di gud sitn we unu du an big op unu Faada we de a evn.

¹⁷ “No bada tingk se mi kom ya fi mash op we di Laa tiich an we di prafit dem did tiich, an se dem sitn de naa no yuus agen. A no dat mi kom ya fa, az a matarafak, a kom mi kom ya fi mek di uol a dem kom chuu.

¹⁸ Mek mi tel unu dis, an a chuu sitn mi a taak: evn an ort wuda afi mash op fos bifuo di liklis leta we mek op di Laa, ar iivn wan piis a wan a di leta dem, no miin notn agen. An bifuo dat kyan gwaan, evriting we fi apm, afi apm fos.

¹⁹ So ier mi nou, enibadi we brok dong tu di liklis Laa, an go tiich piipl se di Laa no mata an mek dem brok it tu, outa aal di piipl dem we Gad ruul uova, da sumadi de naa go mata so moch iina Gad yai. Bot enibadi we lisn di Laa an du wa it se, an tiich piipl fi du dat tu, dem a-go get tap-a-tap pozishan iina Gad kindom.

²⁰ Mek mi tel unu sopm, ef unu no du di sitn dem we Gad waahn muo dan di Laa tiicha an di Farisii dem, unu kyaahn ton wan a di piipl dem we Gad ruul uova.

²¹ “Unu nuo se dem weehn tel unu faada faada dem se, ‘No kil nobadi’ an ‘nobadi we kil nobadi, dem a-go go a kuot ous an di joj a-go se dem gilti an rait dem aaf.’

²² Bot ier wa mi a se, jos beks wid unu breda ar unu sista, an unu afi go a kuot, an di joj a-go se unu gilti an rait unu aaf! An enibadi we shiem dem breda ar sista an tel dem ou dem woklis an dem sitn de, unu a-go afi go a di tap-a-tap joj dem, an enibadi we kaal dem breda ar sista wan woklis gud fi notn fuul — el faiya a-go riich dem.

²³ “So ier mi den, ef unu a go a di alta go gi unu aafrin an unu memba se unu breda ar sista beks wid unu bout sitn,

²⁴ unu fi lef unu aafrin a di alta — no gi it op yet. Go mek it op wid unu breda ar sista fos an den kom bak kom gi unu aafrin.

²⁵ “Ef sumadi de kyari yu go kuot, sekl unu aagiment pan di wie, sekl it faas faas, ar di sumadi mait-a an yu uova gi di joj, an di joj an yu uova gi di poliis an di poliis wi go lak yu op iina prizn.

²⁶ Mi a tel yu dis, yu naa go kyan kom out til yu pie op evri laas sent.

²⁷ “Unu did ier se Gad se, ‘No sliip wid nobadi yu no marid tu.’

²⁸ Bot ier wa mi a tel unu se, unu jos waahn luk pan wan uman we unu no marid tu an waahn ar badi, an a sliip unu don sliip wid ar aredi iina unu aat.

²⁹ Ef unu rait yai a mek unu sin, tier it out an dash it we! Aftaraal it beta fi luuz onggl wan badi paat, dan di wol a di badi get fling dong a el.

³⁰ Ef unu rait an mek unu sin, chap it aaf man an dash it we! Aftaraal it beta fi luuz onggl wan badi paat, dan di wol badi get fling dong a el.

³¹ “It rait dong se, ‘Eni man we lef dem waif fi gi ar di piepa we shuo se dem no marid agen.’

³² Bot ier wa mi a se: eni man we brok op wid im waif, an a no laik se shi did a kip man wid im ar a gwaan wid no ada seks sin, ef da uman de go marid wan neks man, a di fos ozban wuda mek shi a liv iina sin kaa nou shi wudaana sliip wid wan neks man. An di man we marid da uman de afta ar ozban lef ar, im a liv iina sin tu, kaa im a sliip wid wan neks man waif.

³³ “Unu nuo se dem did tel unu faada faada dis tu, ‘Wen unu gi unu wod an swier se unu a-go du sitn, unu no fi brok unu pramis, bot go du di sitn dem we unu tel di Laad se unu a-go du.’

³⁴ Bot a dis mi a tel unu se, unu no fi swier at aal at aal. No bada swier an kaal pan evn fi shuo se wa unu a se a chuu, kaaz a evn Gad tan an ruul fram.

³⁵ An no bada swier an kaal pan ort niida, kaa ort a laik wan stuul we Gad put op im fut pan; no kaal pan Jeruusilem tu kaa dat a fi Gad siti, an im a di bigis king.

³⁶ No bada swier an kaal pan unuself, kaa non a unu kyaahn mek no iivn wan schraan a ier blak ar wait.

³⁷ Ef a ‘yes’ unu a se, se ‘yes’ an don, ef a ‘nuo’ — den se ‘nuo’ an don. Ef unu put notn muo pan dat, a siek-a di wikid wan.

³⁸ “Unu did ier se Gad se, ‘Ef sumadi juk out yu yai, yu kyan juk out fi dem uon, an ef dem lik out yu tiit, yu kyan tomp out bak fi dem uon.’

³⁹ Bot ier wa mi a tel unu se, di piipl dem we du aal saat a wikidnis tu unu, lou dem mek dem gwaan. Ef sumadi baks unu kraas unu fies, pan di rait an said, ton di neks said gi dem.

⁴⁰ An ef nobadi waahn kyari unu go kuot fi tek unu shot, gi dem yu jakit tu.

⁴¹ An ef nobadi fuos unu fi kyari dem bag fi wan mail, unu fi kyari it fi aal tuu mail.

⁴² Sumadi beg unu sitn, gi dem, an no ton unu bak pan di piipl dem we waahn baro sitn fram unu.

⁴³ “Unu did ier se Muoziz did rait se, ‘Lov unu nieba’ an ‘Iet unu enimi.’

⁴⁴ Bot dis a wa mi a se, lov unu enimi dem an prie fi di piipl dem we chriit unu bad an mek unu sofa.

⁴⁵ Wen unu du dat, unu wi komiin jos laik unu Faada we de a evn. Yu si ou im mek di son raiz op an shain pan wikid piipl an gud piipl? An a siem so im mek rien faal pan piipl we du wa rait iina im yai an di wan dem we no lisn wa im se.

⁴⁶ Aftaraal, ef unu onggl lov di piipl dem we lov unu, wa unu a-go get outa dat?

⁴⁷ An ef unu onggl tel fu’unu piipl dem oudi, a wa unu wuda du so we nobadi els no du? Iihn? Dong tu di rang-duwa du dat tu, no chuu?

⁴⁸ So ier mi nou, unu no fi gud onggl somtaim an onggl tu som piipl; nobadi no fi av notn bad fi se bout unu, tan jos laik unu faada we iina evn — im gud aal di wail, tu evribadi, an nobadi kyaahn se notn bad bout im an a taak chuut.”