Read Jamaican Patois Matyu 8 Bible Online

Matyu 8 - Jamaican Patois bible

Matyu 8

¹ Afta Jiizas kom aafa di mountn, wan bag a piipl fala im.

² Den wan man no kom tu Jiizas, im did av wan siknis we mek im skin fasi-fasi. Di man go dong pan im nii infronta Jiizas an se, “Laad ef yu waahn fi kyuor mi an mek mi kliin, yu av di powa fi dwi’it.”

³ Jiizas chrech out im an, toch di man an se, “Mi waahn yu fi get kliin. Gwaan yu beta nou!” An siem taim di man skin get kliin kliin.

⁴ Den Jiizas se tu im se, “Mek shuor se yu no tel nobadi, bot galang a wan priis an mek im si yu. Kyari di sakrifais we Muoziz Laa se yu fi gi wen yu skin get beta. Dat wi shuo evribadi se yu aarait nou.”

⁵ Wen Jiizas go Kyaporniyom, wan ed fi onjrid suoja kom tu im a luk elp.

⁶ “Laad, mi sorvant de a yaad a lidong an kyaahn muuv. Som wikid pien a lik im.”

⁷ Jiizas se tu im se, “Mi wi kom an mek im get beta.”

⁸ Bot di ed suoja se, “Laad, mi no gud inof fi yu kom anda fi mi ruuf, bot jos se di wod an mi sorvant wi get beta.

⁹ Kaaz mi tek aada fram dem we uova mi tu, an mi av suoja we mi kanchuol. Mi tel da wan ya, ‘Go de-so’ an im go, an wan neks wan, ‘Kum ya’ an im kom. An mi tel mi sorvant, ‘Du dis’ an im dwi’it.”

¹⁰ Jiizas jaa jrap wen im ier dis ya, an im se tu di piipl dem we did a fala im se, “Mek mi tel unu dis, an a chuu mi a taak, mi no fain nobadi iina Izrel we chos iina mi so!

¹¹ Ier mi no, uol iip a piipl fram iis an wes a-go kom sidong iit big dina wid Iebriyam, Aizak an Jiekob op a evn iina Gad kindom.

¹² Bot di wan dem we did fi bi paat a Gad kindom, Gad a-go chuo dem out go wan plies we blak laka midnait. De-so, piipl a-go a baal an a grain dem tiit di wie pien a waks dem.”

¹³ Den Jiizas se tu di ed suoja se, “Gwaan baka yu yaad, di siem ting yu biliiv se a-go apm, a dat a-go apm.” An di sorvant get beta da sed taim de.

¹⁴ Wen Jiizas riich a Piita yaad, im si se Piita mada-in-laa did lai dong iina bed. Shi did av fiiva.

¹⁵ Im toch ar an, an di fiiva brok, an shi get op siem taim an staat luk aafa dem.

¹⁶ Wen iivnin kom, dem kyari uol iip a piipl we av iin diiman kom wich paat Jiizas did de. Im jos se wan wod an diiman kom outa piipl, an aal a uu did sik, im mek dem get beta.

¹⁷ Da wie ya, wa di prafit Aizaiya did se, wuda kom chuu. Aizaiya did se: “Aal a di sitn dem we wi sofa wid, im kom tek dem we, an aal a wi siknis dem, im tek put pan imself.”

¹⁸ Nou wen Jiizas si wan big big kroud a piipl roun im, im tel im falara dem se fi go uova di ada said a di liek.

¹⁹ Den wan Laa tiicha kom tu im an se, “Tiicha, mi wi ton wan a yu falara dem an go wid yu eniwe yu go.”

²⁰ Jiizas se tu im se, “Faks av uol, an di bod dem av nes, bot di Man we Gad Pik no av no we fi pudong im ed.”

²¹ Wan neks wan we a fala im se, “Laad mek mi go beri mi faada fos.”

²² Bot Jiizas tel im se, “Fala mi, an mek di ded galang go beri uu ded fi dem.”

²³ Den Jiizas go iina di buot an im falara dem fala baka im.

²⁴ Widoutn waanin wan wikid wikid staam kom dong pan di liek so di wiev dem staat flod di buot. Bot Jiizas did a sliip.

²⁵ So im falara dem kom wiek im op. Dem se, “Laad siev wi! A ded wi a go ded nou!”

²⁶ Bot im se tu dem se, “Ou unu friedi-friedi so? Unu chos iina Gad likl bit iihn?” Den im get op an tel di briiz an di sii fi sekl demself. An evriting jos sekl bak dong.

²⁷ An di man dem jaa jrap a grong, dem se, “Bot a wa kain-a man dis ya? Aal briiz an sii lisn im an du wa im se!”

²⁸ Wen Jiizas riich a di neks said, iina di konchri we di Gyadariinz piipl dem liv, tuu man we did av iin diiman kom op tu im. Dem did a kom fram beriyin grong. Nobadi kudn kanchuol dem man de. Dem did rof an tof an a bier waar dem did push. Siek-a dat, nobadi kudn paas de-so.

²⁹ Di man dem baal out, “Gad Bwai Pikni, lef wi no! A kom yu kom ya fi mek wi sofa bifuo taim, ehn?”

³⁰ Wan uol iip a ag did a nyam likl wie fram wich paat dem did de.

³¹ Den di diiman dem beg Jiizas, ier dem no, “Ef yu a go ron wi out, du, sen wi go iina dem pig de.”

³² An im se, “Gwaan!” So dem kom outa di man dem an go iina di ag dem, an di uol a di ag dem tek aaf dong di stiip stiip il-said go chriet iina di liek an joun iina di waata.

³³ Di man dem we luk aafa di ag dem ron go iina di toun go pred evriting we apm tu di man dem we did av iin diiman.

³⁴ Den di uol toun kom kom miit Jiizas, an wen dem si im dem beg im fi lef dem ieriya.