Read Jamaican Patois Matyu 9 Bible Online

Matyu 9 - Jamaican Patois bible

Matyu 9

¹ Afta Jiizas go iina di buot, im siel go kraas di neks said, an riich a fi im uona toun.

² Siem taim som piipl bring wan kripl man kom tu im pan wan chrecha. Wen Jiizas si umoch dem biliiv iina im, im se tu di kripl man se, “No wori mi bwai! Mi paadn yu fram aal a yu sin dem.”

³ Den som a di Laa tiicha dem se tu demself se, “Bot wiet, a uu da man ya riili tingk im bi — a dis im a disrispek Gad!”

⁴ Jiizas did si wa dem a tingk se, so im se tu dem se, “Wa mek unu tingk dem wikid sitn de iina unu aat?

⁵ Tel mi sopm, wich wan iiziya, fi se, ‘Mi paadn yu sin dem’ ar ‘Git op an waak’?

⁶ Bot fi mek unu nuo, mi a-go shuo unu se di Man we Gad Pik av di rait an di powa fi paadn sin pan ort,” den im ton tu di kripl man an se, “Git op, tek op yu chrecha an gwaan a yu yaad.”

⁷ An di kripl man tan op, an gwaan a im yaad.

⁸ Wen di kroud a piipl si dis ya, dem kech dem fried an staat big op Gad, kaa a im gi piipl di rait an powa fi du dem sitn ya.

⁹ Wen Jiizas a lef de-so, im si wan man we niem Matyu a sidong a di staal wich paat piipl kalek taks. “Fala mi,” im se tu Matyu. An Matyu get op an fala Jiizas.

¹⁰ Afta dat, Jiizas go nyam a Matyu yaad, an wan uol iip a taks kalekta an piipl we du rang did kom kom sidong an a nyam wid im an im speshal falara dem.

¹¹ Wen di Farisii piipl dem si dis ya, dem ton tu im speshal falara dem an se, “Wa mek unu tiicha nyam wid taks kalekta an rang-duwa?”

¹² Wen Jiizas ier wa dem se, im se, “Piipl we no sik no niid no dakta, a onggl sik piipl niid dakta.

¹³ Gwaan go fain out a wa dis miin: ‘Mi waahn piipl fi gud an kain tu piipl, no fi dem kom kom bon sakrifais gi mi.’ Kaaz mi neehn kom ya fi tel piipl we du rait fi ton fram dem rang, a piipl we du rang mi kom ya fa.”

¹⁴ Den Jan falara dem kom aks Jiizas se, “Ou kom wi an di Farisii dem kip we fram fuud fi worship Gad, bot fi yu falara dem no du dat?”

¹⁵ Jiizas se tu dem se, “Yu tingk se di piipl dem we di braidgruum invait kyan a lang dong dem fies an sad sad op demself wen di braidgruum de mongks dem? Di taim a kom wen di braidgruum a-go gaan fram dem. A da taim de, dem wi kip we fram fuud.

¹⁶ “Nobadi no tek nyuu klaat an suo pan uol kluoz yu no, kaa di pach a-go tier aafa di kluoz an den di fos tier a-go wosaraaf.

¹⁷ An nobadi no put nyuu wain iina uol wain bakl niida. Ef a so, di wain bakl dem a-go bos op, di wain a-go dash we, an di wain bakl dem a-go mash op. Wa piipl du a put nyuu wain iina nyuu wain bakl, an di tuu a dem — di bakl an di wain, wi aarait.”

¹⁸ Wen Jiizas de de-so a se dem sitn de, aal av a sodn, wan liida fi di Juu dem choch go dong pan im nii infronta im. Im se tu Jiizas se, “Mi daata ded jos a wail ago, bot kom put yu an pan ar an shi wi kom bak alaiv.”

¹⁹ An Jiizas an im falara dem get op an fala im.

²⁰ Nou wan uman we did a sofa an a bliid fi twelv ier kom op baka im an toch di tiel a im kluoz.

²¹ Shi did a se tu arself se, “Ef a kuda onggl toch im kluoz, mi wi get beta.”

²² Bot wen Jiizas ton roun an si ar, im se, “No fret daata! Kaaz yu biliiv iina mi, yu aarait nou.” An fram da taim de di uman did beta.

²³ Wen Jiizas go iina di liida ous an si di piipl dem we plie di fluut, an di kroud a piipl dem a ala an a gwaan,

²⁴ im se tu dem se, “Di uol a unu kum out! Kum out! Di pikni no ded; a sliip shi a sliip.” An di piipl dem staat laaf aafa im.

²⁵ Bot wen dem mek di kroud a piipl go outa duor, Jiizas go insaid an im tek di pikni an, an di gyal pikni get op.

²⁶ An da nyuuz de pred aal uova da ieriya de.

²⁷ Wen Jiizas did a lef de-so, tuu blain man did staat fala im an did a baal out, “Dievid pikni! Tek piti pan wi!”

²⁸ Wen Jiizas go iina di ous, di tuu blain man kom tu im, Jiizas se tu dem se, “Unu biliiv se mi kyan du dis?” Dem ansa bak, “Yes, Laad.”

²⁹ Den Jiizas toch dem yai an se, “Kaaz unu biliiv se mi kyan mek unu si agen, unu a-go si agen.”

³⁰ An dem yai uopm op. Den Jiizas waan dem aaf gud an prapa. Im se, “Luk ya nou, mek shuor se, nobadi no nuo bout dis.”

³¹ Bot dem lef an tel evribadi iina da konchri de, bout wa Jiizas du fi dem.

³² Wen Jiizas an im falara dem did a go we, piipl kyari wan man kom we did av wan diiman iina im an we kudn chat.

³³ Wen Jiizas ron di diiman fram outa di man, di man staat chat! An di piipl dem fraitn! Dem se, “Nobadi neva yet si notn laka dis apm iina Izrel!”

³⁴ Bot di Farisii dem se, “A di liida fi diiman gi im powa fi ron out diiman.”

³⁵ Den Jiizas go bout iina aal a di toun an dischrik dem a tiich iina di Juu dem choch, a priich di gud nyuuz bout Gad kindom an a get piipl beta we av aal kain-a siknis an a sofa fram aal saat a kraasiz.

³⁶ Wen im si di kroud a piipl dem, im did sari fi dem, kaa aal saat a sitn did a bada dem, dem did kanfyuuz an dem kudn elp demself. Dem did komiin laik shiip we naa nobadi fi tek kier a dem.

³⁷ Den im ton tu im falara dem an se, “A uol iip a fuud out de iina di fiil fi pik, bot nof piipl no de de fi gyada dem op.

³⁸ So aks di Laad we uon di fuud fi sen out piipl fi pik dem.”