Read Jamaican Patois Maak 1 Bible Online

Maak 1 - Jamaican Patois bible

Maak 1

¹ Dis a ou di Gud Nyuuz bout Jiizas Krais, Gad Bwai Pikni staat.

² It rait dong iina di buk we di prafit Aizaiya rait, se: “Luk, mi wi sen mi mesinja fi gwaan til yu kom, im a-go get piipl redi fi yu.”

³ “Sumadi a shout iina di dezot, ‘Klier di wie fi di Laad kom chuu, mek di chrak we di Laad fi waak pan chriet.’ ”

⁴ So Jan di Baptis staat fi priich iina di dezot an se piipl fi ton we fram dem sin, get baptaiz, an Gad wi paadn dem fi aal di rang we dem du.

⁵ Piipl fram aal uova Judiya an evribadi we liv iina Jeruusilem did a go tu im. Wen dem si se dem a sina, an sari fi di rang we dem du, im baptaiz dem iina di Riva Jaadn.

⁶ Jan kluoz did mek outa kyamil ier wid wan leda belt roun im wies. An fi im fuud im nyam graasapa an oni we im fain iina di dezot.

⁷ Jan tel di piipl dem se, “Sumadi muo powaful dan mi a kom an mi no iivn gud inof fi pul di chrap pan im slipaz.

⁸ Mi baptaiz unu iina waata, bot im a-go baptaiz unu wid di Uoli Spirit.”

⁹ Roun dem taim de, Jiizas did kom fram Nazaret iina Gyalalii an Jan did baptaiz im iina Riva Jaadn.

¹⁰ Siem taim Jiizas a kom op outa di waata, im si evn uopm op an di Spirit a kom dong pan im laik wan dov.

¹¹ An wan vais fram evn se, “Yu a fi mi wan dege-dege Bwai Pikni, mi lov yu an yu mek mi aat glad.”

¹² Siem taim di Uoli Spirit kaaz Jiizas fi go iina di dezot.

¹³ An im did iina di dezot fi faati die. An wen im did out de, Sietan chrai aad aad fi mek im du rang. Im did out de mongks di wail animal dem bot ienjel did a luk aafa im.

¹⁴ Nou afta dem lak op Jan iina prizn, Jiizas go a Gyalalii go priich Gad gud nyuuz.

¹⁵ Im se, “A taim nou! Gad suun ruul iina evri wie! Ton we fram unu sin an ton tu Gad an biliiv di gud nyuuz!”

¹⁶ Wen im did a waak saida Gyalalii sii, im si Saiman an im breda Anju. Dem did a fling out dem net iina di liek fi kech fish kaaz dem a did fishaman.

¹⁷ Jiizas se tu dem se, “Fala mi! An siem laik ou unu kech fish, mi wi tiich unu ou fi kech piipl an mek dem ton mi falara.”

¹⁸ So dem lef dem buot siem taim an fala Jiizas.

¹⁹ Likl dong fram de-so, im si Jiemz an Jan, Zebidii tuu bwai pikni dem iina wan buot a fiks dem net.

²⁰ Jiizas kaal dem an siem taim dem go fala im. Dem lef dem faada Zebidii iina di buot wid di man dem we did a wok fi im.

²¹ Lieta Jiizas an im falara dem lef go a Kyaporniyom. Pan di Sabat im go iina di Juu dem choch an staat fi tiich.

²² Evribadi shak wen dem ier di sitn dem we im did a tiich, kaaz im tiich laik sumadi we av di rait an di powa fi du it. Im neehn tiich laik di Laa tiicha dem.

²³ Siem taim wan man we did iina di Juu dem choch we diiman did tek kanchuol a baal out,

²⁴ “Jiizas a Nazaret, wa yu waahn wid wi? A kom yu kom fi kil wi aaf? Mi nuo uu yu bi! Yu a di Uoli Wan we kom fram Gad!”

²⁵ “Kiba yu mout!” Jiizas se tu di diiman iina wan siiros vais. “Kom outa di man!”

²⁶ Di diiman fling im dong an mek im de de a flata, it baal out loud loud an kom outa im.

²⁷ Di piipl dem did wel shak, so dem aks dem wan aneda, “A wa dis ya? A som powaful nyuu sitn im a tiich! Da man ya aal av di powa an di rait fi aada diiman fi kom outa piipl an dem du wa im se.”

²⁸ Nyuuz bout Jiizas pred faas faas aal uova di ieriya roun Gyalalii.

²⁹ Afta Jiizas lef di Juu dem choch, dem go chriet a Saiman an Anju ous. Jiemz an Jan did go wid dem tu.

³⁰ Saiman mada-in-laa did sik iina bed a ruos wid fiiva. Wen Jiizas riich a di ous, dem tel im bout ar.

³¹ Jiizas go tu ar, uol ar an an tek taim riez ar op. Di fiiva brok an shi staat luk aafa dem.

³² Afta di son go dong an iivnin kom, di piipl dem kyari aal a di sik piipl dem an aal a di piipl dem we diiman did a kanchuol go a Jiizas.

³³ Di uol toun gyada op a di ous duor.

³⁴ So im iil uol iip a dem we did sik wid aal kain-a difrant difrant siknis an ron out diiman outa nof a dem. Bot im neva mek di diiman dem se notn kaaz dem did nuo uu im bi.

³⁵ Orli orli iina di maanin, wen it did stil daak daak, Jiizas get op an go fain wan plies we nobadi no de, so im kuda tan de an prie.

³⁶ So Saiman an im fren dem staat luk fi im.

³⁷ Wen dem fain im, dem se tu im se, “Evribadi a luk fi yu!”

³⁸ So im ansa dem se, “Mek wi go a som ada plies iina di dischrik dem we de nier ya-so, so mi kyan priich tu dem tu, kaaz a dat mi kom out ya fi du.”

³⁹ So im go aal bout Gyalalii go priich iina di Juu dem choch an ron out diiman outa piipl.

⁴⁰ Wan fasi-fasi skin man kom tu Jiizas. Im go dong pan im nii an beg Jiizas fi elp im. Im se, “Ef yu waahn fi kyuor mi an mek mi kliin, yu av di powa fi dwi’it.”

⁴¹ Jiizas fiil sari fi di man, so im chrech out im an an toch im an se, “Mi waahn yu fi get kliin. Gwaan, yu beta nou!”

⁴² Di man get beta siem taim an im skin get kliin kliin.

⁴³ Siem taim Jiizas waan im aaf chrang chrang an sen im we.

⁴⁴ Jiizas tel im se, “Mek shuor se yu no se notn tu nobadi bout dis. Nou dat yu get beta, jos gwaan go shuo yuself tu di priis an kyari di sakrifais we Muoziz Laa se yu fi gi wen yu skin get beta. Dat wi shuo evribadi se yu get kliin.”

⁴⁵ Bot di man lef an staat pred tu evribadi wa Jiizas du fi im. So fram dat Jiizas kudn go iina no toun mek nobadi si im. Im afi tan iina di konchri paat faar faar fram di toun. Bot piipl stil kip aan a kom tu im fram aal bout.