Read Jamaican Patois Maak 10 Bible Online

Maak 10 - Jamaican Patois bible

Maak 10

¹ Afta Jiizas lef we im did de, im go paas Riva Jaadn an go iina di Judiya ieriya. Nof piipl kom tu im agen. An laik im aalwiez du, im tiich dem.

² Som Farisii did waahn fi tes im. So dem kom tu im an aks im se, “Di Laa gi no man di rait fi brok op wid im waif?”

³ Jiizas aks dem se, “Wa Muoziz tel unu fi du?”

⁴ Dem ansa se, “Muoziz lou di man dem fi rait wan piepa gi dem waif fi shuo se dem no marid no muor.”

⁵ Bot Jiizas se tu dem se, “Muoziz lou unu fi du dat kaaz unu no av no aat.

⁶ Bot fram Gad mek di worl, im ‘mek man an uman.’

⁷ ‘A dat mek wan man wi lef im faada an mada, jain op wid im waif,

⁸ an di tuu a dem wi ton wan sumadi.’ So dem a no tuu agen, dem ton wan.

⁹ So ef Gad mek wan man an im waif wan, nobadi no fi plit dem op.”

¹⁰ Wen dem go bak iina di ous, Jiizas falara dem aks im bout wa im did se.

¹¹ So im tel dem se, “Ef nobadi brok op wid dem waif an go marid sumadi els, im du rang gens im waif. Im komiin jos laik sumadi we a gi im waif bon.

¹² An ef di waif brok op wid ar ozban an marid sumadi els, a bon shi a gi ar ozban.”

¹³ Som piipl did bring dem pikni tu Jiizas fi im toch dem. Bot Jiizas speshal falara dem staat tel aaf di piipl dem we bring di pikni dem kom an staat ron dem.

¹⁴ Wen Jiizas si dis, im get beks an se, “Lou di pikni dem mek dem kom! No chrai tap dem, kaaz Gad kindom a fi piipl we komiin laik dem likl pikni ya.

¹⁵ Mi a tel unu dis ya, an a chuu mi a taak, enibadi we no chos iina Gad an fala im laik wan likl pikni naa go kyan go iina Gad kindom.”

¹⁶ Den Jiizas tek di pikni dem, put im an pan dem an bles dem.

¹⁷ Wen Jiizas did bout fi lef out wan man ron op tu im, go dong pan im nii an aks im se, “Gud tiicha, wa mi mos du ef mi waahn liv fi eva?”

¹⁸ Jiizas aks im se, “Wa mek yu kaal mi gud? Nobadi no gud, onggl Gad wan.

¹⁹ Yu nuo wa Muoziz Laa se, ‘No kil, no sliip wid nobadi we yu no marid tu, no tiif, no tel lai pan piipl, no chrik piipl fi tek we wa dem av, rispek yu faada an mada an du wa dem se.’ ”

²⁰ Di man ansa im se, “Tiicha, fram mi a likl bwai mi fala aal a dem de wid aal a mi aat.”

²¹ Jiizas luk pan im an lov im, an se tu im se, “A onggl wan sitn yu shaat a. Go sel evriting we yu av an gi di moni tu di puo piipl dem, an yu wi rich iina evn. Wen yu du dat, kom fala mi.”

²² Wen di man ier wa Jiizas se, im aat jrap an im go we sad kaaz im did wel rich.

²³ Den Jiizas luk roun an se tu im falara dem se, “A di aadis ting fi rich piipl go iina Gad kindom!”

²⁴ Im falara dem shak wen dem ier dat. So Jiizas se tu dem agen, “Pikni, it riili aad fi go iina Gad kindom.

²⁵ It iiziya fi wan kyamil go chuu wan niigl yai dan fi sumadi we rich go iina Gad kindom.”

²⁶ Dis shak dem iivn muor, so dem se tu wan aneda se, “Den a uu kyan get siev?”

²⁷ Jiizas luk pan dem an se, “Wa piipl kyaahn du, Gad kyan du, kaaz notn no de we Gad kyaahn du.”

²⁸ Den Piita taak op an se, “Luk, wi lef evriting we wi av fi fala yu!”

²⁹ Jiizas se, “Mi a tel unu di chuut, nobadi no de bout we lef dem ous, breda, sista, mada, faada, pikni, ar ous an lan fi mi an di Gud Nyuuz

³⁰ we naa go get bak iina dem taim ya ous an lan, breda, sista, mada an pikni. Dem a-go get bak onjrid taim muor, an dem a-go get sofarieshan wid dem tu. An iina di taim we a-go kom, dem wi get fi liv fi eva.

³¹ Bot nof a uu de a front nou a-go de a bak, an uu de a bak a-go de a front.”

³² Jiizas an im falara dem did a go op a Jeruusilem. Jiizas did infronta dem an dem did shak, bot di piipl we did a fala dem did fried. Jiizas tek di twelv wan said agen an staat tel dem wa a-go apm tu im.

³³ Im se, “Luk ya no, wi a go op a Jeruusilem an dem a-go tek di Man we Gad Pik an ton im uova tu di ed priis an di Laa tiicha dem. Dem a-go joj im an se im gilti an fi ded, an dem a-go ton im uova tu di piipl we a no Juu.

³⁴ Dem a-go laaf aafa im an tek im ton preke, dem a-go pit pan im, biit im wikid wikid, an afta dat dem a-go kil im pan wan kraas. Bot chrii die afta dem kil im, im a-go kom bak alaiv.”

³⁵ Jiemz an Jan, Zebidii tuu bwai dem go tu Jiizas an se tu im se, “Tiicha, wi a-go aks yu sopm an wi uop se yu wi du wa wi aks yu.”

³⁶ So Jiizas aks dem se, “Wa unu waahn mi fi du fi unu?”

³⁷ Dem se, “Wen yu kom iina yu brait brait lait fi ruul, mek wan a wi sidong a yu rait-an-said an di ada wan pan yu lef-an-said.”

³⁸ Bot Jiizas tel dem se, “Unu no nuo wa unu riili a aks! Unu kyan jringk wa mi bout fi jringk ar get baptaiz laik ou mi a-go get baptaiz, a sofa mi a-go sofa yu nuo?”

³⁹ Dem se, “Ye, wi kyan du dat.” Den Jiizas se tu dem se, “Fi riil, unu a-go jringk fram di kop we mi jringk fram an baptaiz di siem wie mi get baptaiz,

⁴⁰ bot fi sidong pan mi rait-an-said ar mi lef-an-said, a no fi mi fi gi we, kaaz dem pozishan de don put op fi di wan dem uu fi get dem aredi.”

⁴¹ Nou wen di ada ten falara dem ier dis, dem get mad wid Jiemz an Jan.

⁴² Bot Jiizas kaal dem an se tu dem se, “Unu nuo se di ruula dem fi di piipl we a no Juu baas dem op an di wan dem we iina tap-a-tap pozishan eva a tel dem wa fi du.

⁴³ Bot a no so it go mongks unu. Insted-a dat, ef nobadi waahn av tap pozishan mongks unu, dem afi sorv unu,

⁴⁴ an ef non a unu waahn kom fos, unu mos ton evribadi sliev.

⁴⁵ Jos laik ou di Di Man we Gad Pik neehn kom ya fi nobadi sorv im, a kom im kom ya fi sorv piipl an fi gi op im laif so piipl kyan get frii fram dem sin.”

⁴⁶ Jiizas an im falara dem riich a Jeriko. Wen Jiizas an im falara dem an wan big kroud a piipl did a lef, wan blain man niem Baatimiyos, Timiyos bwai, did sidong a di ruod-said a beg.

⁴⁷ Wen im ier se a Jiizas fram Nazaret a paas, im staat fi baal out, “Jiizas, Dievid bwai pikni, tek piti pan mi!”

⁴⁸ Nof piipl tel im fi shot im mout an tap im naiz, bot im baal out louda an louda, “Dievid bwai pikni, tek piti pan mi!”

⁴⁹ So Jiizas tap an se, “Kaal im.” So dem kaal di blain man an tel im se, “Tek aat! Git op! Im a kaal yu.”

⁵⁰ Di man fling aaf im jakit, jomp op an go tu Jiizas.

⁵¹ Jiizas aks im se, “Wa yu waahn mi fi du fi yu?” Di blain man ansa im se, “Tiicha, mi waahn fi si.”

⁵² Jiizas tel im se, “Gwaan, kaaz yu biliiv yu get beta nou.” Siem taim di man yai dem uopm op an im kuda si, an im fala Jiizas dong di ruod.