Read Jamaican Patois Maak 11 Bible Online

Maak 11 - Jamaican Patois bible

Maak 11

¹ Jiizas an im falara dem did riich nier Jeruusilem. Wen dem kech a Betpiej an Betani a Mount Aliv, Jiizas sen tuu a im falara dem an

² se, “Go a di dischrik infronta unu. Az unu kech de-so, unu wi fain wan yong dangki we nobadi neva raid yet tai op de. Luus it an kyari it kom.

³ Ef nobadi aks unu ‘Wa mek unu a luus it?’ tel dem se, ‘Di Laad waahn it an im suun sen it bak.’ ”

⁴ Di falara dem lef an fain di yong dangki tai op pan di ruod infronta di duor, so dem luus it.

⁵ Wen dem did a luus di yong dangki, som piipl we did tan op de aks dem se, “Mek unu a luus di yong dangki?”

⁶ Dem ansa ou Jiizas did se dem fi ansa, an di piipl mek dem gwaan wid it.

⁷ So dem kyari di dangki go gi Jiizas, put dem jakit pan im an Jiizas sidong pan im.

⁸ Nof piipl pred dem jakit pan di ruod, an som a dem chap bush an pred dem pan di ruod.

⁹ Di wan dem we go infront an di wan dem we fala baka Jiizas did a kaal out, “Priez Gad!”

¹⁰ “Gad bles di wan we a kom fi ruul iina wi Faada Dievid kindom!” “Priez Gad we de a evn!”

¹¹ Wen Jiizas riich a Jeruusilem, im go iina Gad ous. Afta im luk roun pan evriting, im an im twelv falara dem lef go a Betani kaaz it did liet aredi.

¹² Wen Jiizas an im falara dem lef Betani di neks maanin, im did onggri.

¹³ Jiizas si wan fig chrii likl out fram we dem did de. It did kova op wid liif, so im go fi si ef no fig de pan it. Bot im neva fain non kaaz a neva fig taim yet.

¹⁴ So im se tu di chrii, “Fram nou aan nobadi naa go eva nyam fig fram yu agen!” An im falara dem ier wen im se so.

¹⁵ Afta Jiizas an im falara dem riich Jeruusilem, im go iina Gad ous an staat fling out aal a di piipl dem we did iin de a bai an sel. Di piipl dem we did a chienj out moni, Jiizas pich uova fi dem tiebl an ton uova di chier fi aal uu did de de a sel dov.

¹⁶ An im wudn mek nobadi kyari gudz go iina di yaad we Gad ous de.

¹⁷ Afta dis im staat tiich di piipl dem. Im se, “It no rait dong iina Gad wod se: “ ‘Fi mi ous a-go bi wan ous we piipl fram aal uova di worl kom fi prie’? Bot unu tek it ton ‘wan aid out fi tiif!’ ”

¹⁸ Di ed priis an di Laa tiicha dem ier wa Jiizas se, an dem staat luk fi wan wie fi kil im, kaaz dem did fried a im, kaaz im did a tiich so gud it did shak di uol kroud a piipl.

¹⁹ Iina di iivnin Jiizas an im falara dem lef di siti.

²⁰ Di neks maanin wen Jiizas falara dem paas di fig chrii dem si se it jrai op fram di ruut.

²¹ Piita memba wa Jiizas did se tu di chrii. Den im se, “Tiicha, luk! Di chrii we yu did se nobadi naa go eva nyam fram agen, it jrai op!”

²² Jiizas tel dem se, “Biliiv iina Gad!

²³ Ier wa mi a se, an a chuu mi a taak, ef nobadi se tu da mountn ya, ‘Git op an go fling yuself iina di sii,’ ef im riili biliiv iina im aat an no staat wanda ef it riili a-go apm, it wi apm fi’im fi chuu.

²⁴ A dat mek mi a tel unu se eniting unu prie an aks Gad fa, biliiv se im gi unu, an unu wi get it.

²⁵ So enitaim unu tan op fi prie, ef unu av notn gens nobadi unu fi paadn dem. Da wie de unu faada we iina evn wi paadn unu fi aal a di rang unu du.”

²⁷ Jiizas an im falara dem go baka Jeruusilem. Wen Jiizas did a waak iina di yaad we Gad ous de, di ed priis, Laa tiicha an elda dem kom tu im

²⁸ an aks im se, “Wa rait yu av fi a du dem sitn ya? An uu gi yu di rait fi du dem?”

²⁹ Jiizas se tu dem se, “Mek mi aks unu wan kwestiyan. Ansa mi an mi wi tel unu a uu gi mi di rait fi du dem sitn ya.

³⁰ Wen Jan did a baptaiz piipl, a uu did sen im fi dwi’it, Gad ar man?”

³¹ Dem staat wok it out mongks dem wan aneda. Ier dem no, “Ef wi se a Gad, im a-go aks wi se, ‘Den wa mek unu neva biliiv im.’

³² Bot ef wi se ‘A man’....” (Dem did fried a di piipl dem, kaaz di uol a dem did tingk se Jan a did wan prafit.)

³³ So dem se tu Jiizas se, “Wi no nuo.” So Jiizas se tu dem se, “Den mi naa go tel unu uu gi mi di rait fi du dem sitn ya niida.”