Read Jamaican Patois Maak 12 Bible Online

Maak 12 - Jamaican Patois bible

Maak 12

¹ Den Jiizas taak tu dem an tel dem da tuori ya: “Yu did av wan man we did plaant wan griep faam. Im put op wan waal aal roun it, dig out wan uol iina di grong fi krosh out di griep fi mek wain, an bil op wan plies pan tap a di waal fi di gyaad wach uova di faam. Den im rent it out tu som faama an go farin.

² Wen a did taim fi gyada op di griep, im sen wan a im sorvant go a di tenant dem fi go get fi im shier.

³ Di tenant dem grab di sorvant, biit im op an sen im we wid im tuu lang an.

⁴ Di uona sen wan neks sorvant, bot di tenant dem biit im op iina im ed an dis im bad bad.

⁵ Di uona stil sen wan neda sorvant, bot dem kil im. Im sen nof muo sorvant, bot dem biit som an kil di res a dem.

⁶ “Di uona did av onggl wan sumadi lef uu im kuda sen — im wan bwai pikni we im lov bad bad. So im sen im tu di tenant dem, kaaz im se, ‘Dem wi rispek mi bwai.’

⁷ “Bot di tenant dem se tu dem wan aneda, ‘A da wan ya a-go get evriting wen im faada ded. Kom mek wi kil im! Da wie de wen im faada ded a wi a-go get evriting we im shuda get.’

⁸ So dem grab im, kil im, an fling im badi aafa di faam.”

⁹ Jiizas aks, “So wa unu tingk di uona fi di faam a-go du? Im a-go kom an kil aaf di tenant dem an tek di faam gi ada piipl.

¹⁰ Unu neva riid wa rait dong iina Gad wod, “ ‘Di rakstuon di bilda fling we a it a uol op di bildin nou.

¹¹ A di Laad du dis, an wi yai uopm op waid wen wi si di sitn we im du.’?”

¹² Di liida dem did waahn fi lak op Jiizas kaaz dem nuo se a riili dem im did a taak bout. Bot dem did fried a di kroud a piipl, so dem go we lef im.

¹³ Di liida dem sen som man fram mongks di Farisii dem an Erad falara dem fi tek Jiizas uona wod chrap im.

¹⁴ Dem go tu im an se, “Tiicha, wi nuo se yu taak di chuut kaaz yu naa luk no fren fram nobadi. Yu no paashal. Yu tiich di rait sitn bout wa Gad waahn piipl fi du. Tel wi, it rait fi wi pie taks tu Siiza, di Ruoman ruula? Wi fi pie it ar wi no fi pie it?”

¹⁵ Bot im nuo se dem did op tu no gud, so im aks dem se, “Wa unu a tes mi fa? Gi mi wan silva kain mek mi si’it!”

¹⁶ So dem gi im wan silva kain, an im aks dem se, “Uufa picha an niem de pan it?” Dem ansa im se, “Siiza.”

¹⁷ Den Jiizas se tu dem se, “Gi Siiza wa a fi’im, an gi Gad wa a fi’im.” An dem did shak fi ier ou im ansa dem.

¹⁸ Som Sadyusii (dem kliem se piipl we ded kyaahn kom bak alaiv) kom tu Jiizas an aks im se,

¹⁹ “Tiicha, Muoziz rait dis fi wi, ‘Ef wan man breda ded lef im waif wid no pikni, di breda mos marid di uman an av pikni wid ar fi’im ded breda.’

²⁰ Wel, wan taim yu did av sevn breda. Di fos wan marid bot ded an neva av no pikni.

²¹ Di sekan breda marid di ded breda waif, bot im ded tu an neva av no pikni. Di siem ting apm tu di tord breda.

²² Di sevn breda dem ded bot non a dem no gi ar no pikni. Den di uman ded tu.

²³ Wen a taim fi dem kom bak alaiv wid aal di ada ded piipl dem, uufa waif shi a-go bi sins di sevn a dem did marid ar?”

²⁴ Jiizas ansa dem se, “Unu nuo se unu wel rang? An unu nuo wai? Kaaz unu no nuo we Gad wod se, an unu no nuo Gad powa.

²⁵ Kaaz wen ded piipl kom bak alaiv, man an uman naa go a get marid, dem a-go komiin laik di ienjel dem iina evn.

²⁶ Bot wen unu a taak bout ded piipl fi kom bak alaiv, unu neva riid wa Muoziz rait dong iina di paat bout di bush ou Gad se, ‘Mi a Iebriyam Gad, Aizak Gad, an Jiekob Gad’?

²⁷ Im a no Gad fi di ded, bot fi uu a liv. So unu wel rang.”

²⁸ Wan Laa tiicha kom an ier Jiizas an di Sadyusii dem a aagyu. Wen im si se Jiizas gi dem wan gud ansa, im aks Jiizas se, “Outa aal a di Laa dem we Gad se wi fi fala, wich wan a di muos impuotant wan?”

²⁹ Jiizas ansa im se, “Di muos impuotant Laa a dis: ‘Piipl a Izrel, lisn, di Laad we a fi wi Gad, im a wan.

³⁰ Yu fi lov di Laad we a yu Gad. Yu fi lov im wid aal a yu aat, yu fi lov im wid aal a yu suol, yu fi lov im wid aal a yu main, an yu fi lov im wid aal a yu chrent.’

³¹ Di sekan muos impuotant Laa a dis: ‘Yu fi lov yu nieba siem laik ou yu lov yuself.’ No ada Laa no muo impuotant laik dem tuu ya.”

³² Di Laa tiicha se tu im se, “A chuu ting dat, tiicha. Yu rait fi se a onggl wan Gad de, an dat no ada gad no de bout, onggl im.

³³ An yu rait fi se di muos impuotant Laa a fi lov im wid aal yu aat, wid aal a yu main an wid aal a yu chrent, an yu fi lov yu nieba siem laik ou yu lov yuself. Yu rait fi se dem tuu laa de muo impuotant dan wen sumadi bon sakrifais gi Gad ar gi op aafrin.”

³⁴ Wen Jiizas si se di man gi wan ansa we mek sens, im se tu im se, “Yu no de faar fram Gad kindom.” Afta dat nobadi els neva iivn tingk fi aks im no muo kwestiyan.

³⁵ Jiizas did a tiich iina di yaad we Gad ous de. Im se, “Ou kom di Laa tiicha dem se di Krais a Dievid pikni?

³⁶ Di Uoli Spirit taak chuu Dievid an se: “ ‘Di Laad se tu fi mi Laad se: “Sidong a mi rait-an-said til mi put yu enimi dem anda yu fut.” ’

³⁷ Ef Dievid kaal im ‘Laad’, ou di Man We Gad sen fi siev piipl fi bi Dievid bwai pikni?” An di big kroud a piipl did api a lisn wa im se.

³⁸ Wen Jiizas did a tiich dem im se, “Unu si dem Laa tiicha de, wach unuself an mek shuor se unu no komiin laik dem! Dem lov waak bout iina lang jakit an get speshal oudi wen dem go a maakit.

³⁹ An wen dem go a di Juu dem choch an go a big dina, dem lov fi sidong iina di bes siit.

⁴⁰ An dem chrik op di uman dem uufa ozban ded an tek we dem ous an lan, wen dem don dem prie lang prieya fi mek demself luk gud. Dem el a-go at.”

⁴¹ Jiizas go sidong kraas fram we di aafrin baks did de an wach di kroud a piipl we did a jrap dem moni iina di baks. Nof a di rich piipl dem put iin uol iip a moni.

⁴² Den im si wan puo uman uufa ozban ded put iin tuu likl red moni we aadli wot notn — bout tuu sent.

⁴³ Jiizas kaal im falara dem an se tu dem se, “Mi a tel unu di chuut, unu si da puo uman ya we ar ozban ded, shi jrap muo iina di aafrin baks dan aal a dem.

⁴⁴ Kaaz aal a dem gi outa di uol iip we dem av, kaaz dem rich. Bot shi, iivn duo shi so puor, shi gi evriting we shi av fi liv aafa.”