Read Jamaican Patois Maak 13 Bible Online

Maak 13 - Jamaican Patois bible

Maak 13

¹ Jiizas did a lef di yaad we Gad ous de wen wan a im falara dem se tu im se, “Tiicha, luk! Yu si ou dem bildin ya big an priti! An luk ou dem stuon ya we dem tek bil dem big!”

² Jiizas ansa im se, “Yu si dem big priti bildin ya? Evri wan a dem a-go get tier dong. No iivn wan a dem stuon ya a-go lef pan tap a dem wan aneda. Di uol a dem a-go lik dong!”

³ So wen Jiizas did a sidong pan Mount Aliv kraas fram Gad ous, Piita, Jiemz, Jan an Anju kom tu im wan a wie an aks im se,

⁴ “Tel wi, a wen aal dem sitn ya a-go apm? An wa sain wi kyan luk fa fi nuo se dem a-go apm?”

⁵ Jiizas se tu dem se, “Wach out, no mek nobadi fuul unu op.

⁶ Kaaz a uol iip a piipl a-go kom yuuz op yuuz op mi niem, an a se, ‘Mi a Krais, a mi Gad sen fi siev piipl,’ an dem a-go fuul op nof piipl.

⁷ Wen unu ier bout waar nier an faar, no bada mek dem sitn de fraitn unu. Dem sitn de boun fi apm, bot dat no miin se a don di worl a don.

⁸ Kaaz wan set a piipl a-go waar gens wan neks set a piipl, an wan kindom a-go fait gens wan neda kindom. Ortkwiek a-go apm iina nof nof plies. Fuud a-go shaat an nof nof piipl a-go staav. An di wie piipl a-go sofa, it a-go komiin laik di fos pien we lik wan uman we tek iin fi av Biebi.

⁹ “Wach out. Chobl a-go riich unu. Dem a-go tek unu an ton unu uova tu di liida dem fi di Juu dem choch, an dem a-go biit unu iina dem choch. An kaaz unu fala mi, unu wi get fi tan op infronta ruula an king an tel dem bout mi.

¹⁰ Bot di Gud Nyuuz afi priich tu di uol worl fos bifuo dem sitn de apm.

¹¹ Wen dem ares unu an ton unu uova tu di joj, no bada fret bout wa unu a-go se ar ou unu a-go se it. Jos se we Gad tel unu fi se da taim de, kaaz a no unu a taak, a di Uoli Spirit a taak chuu unu.

¹² “Breda an sista a-go infaam pan dem uona breda an sista dem an mek di piipl dem we a ruul kil dem. A siem so, wan faada a-go an uova im uona pikni. Pikni a-go ton gens dem faada an mada an mek di ruula dem kil dem.

¹³ An evribadi a-go iet unu kaaz unu fala mi. Bot enibadi we uol aan tait an tan op chrang til di sofarieshan don, Gad a-go siev dem piipl de.

¹⁴ “Bot wen unu si di wikid wikid sitn we go gens Gad tan op iina Gad ous — mek shuor se evribadi we riid dis ya andastan we it miin — den dem we liv iina Judiya fi ron we go iina di mountn dem.

¹⁵ Uu de pan ruuf tap, no fi kom dong ar go bak iina di ous fi notn.

¹⁶ Nobadi we de a dem bush, no fi go bak fi get im jakit.

¹⁷ Wat a sitn iina dem taim de fi uman we av biebi iina beli an fi mada we av yong biebi!

¹⁸ Prie se dem sopm de no apm wen staam a kom ar wen a rieni taim.

¹⁹ Kaaz di wie piipl gweehn sofa iina dem taim de, nobadi neva sofa so fram di taim Gad mek di worl. An nobadi naa go eva sofa so agen.

²⁰ An nobadi wuda neva get siev ef di Laad neva shaatn dem die de. Bot siek-a im speshal piipl dem we im pik, im shaatn di die dem.

²¹ So ef sumadi se tu yu, ‘Luk, si Krais ya!’ ar ‘Luk, si im de!’ No biliiv im.

²² Kaaz piipl a-go kom kom se dem a di wan we Gad sen fi siev piipl, wen notn no go so. An som faalz prafit a-go shuo op tu. Dem piipl de a-go wok aal kain-a mirikl an shuo aal kain-a sain fi chrik op piipl, dong tu aal di piipl dem we Gad pik dem wi chrik op ef dem get di chaans.

²³ Bot wach unuself! Mi a tel unu aal dem sitn ya bifuo dem apm.

²⁴ “Bot iina dem die de, rait afta di torbl sofarieshan, “ ‘Di son a-go daak op, an di muun a-go tap shain;

²⁵ Di staar dem a-go jrap outa di skai, an evriting iina di skai a-go get shiek outa dem plies.’

²⁶ “Den evribadi wi si di Man we Gad Pik a kom iina di kloud dem an im a-go av powa an wan brait brait lait a shain roun im.

²⁷ Den im wi sen im ienjel dem fi gyada op di piipl we im pik fram naat, sout, iis an wes, fram evri kribis an kaana a di ort.

²⁸ “Nou lorn sopm fram di fig chrii. Wen taim unu si dem branch get wel saaf an griin an dem staat sen out nyuu liif, unu nuo se soma suun kom.

²⁹ A siem so wen unu si aal dem sitn ya a apm, unu wi nuo se di Man we Gad sen fi siev piipl suun kom; a laik se im de rait outsaida unu duor.

³⁰ Mi a tel unu dis an a chuu mi a taak, di piipl we a liv iina dem taim ya naa go ded til aal a dem sitn ya apm.

³¹ Evn an ort naa go de bout fi eva, bot fi mi wod a-go laas fi eva.

³² “Nobadi no nuo di die ar di taim wen aal a dem sitn de a-go apm, no iivn di ienjel dem iina evn ar di Faada Bwai Pikni nuo, a onggl Faada Gad wan nuo dat.

³³ So wach out! An kip gyaad kaaz unu no nuo wen di taim a kom.

³⁴ Da taim de komiin laik wan man we a go we pan wan chrip. Im lef im sorvant dem inchaaj a im ous an gi evri wan a dem di wok we dem fi du. An im tel di wan we a gyaad di duor fi kip wach.

³⁵ “So kip wach den, kaaz unu no nuo wen di baas a kom bak — weda iina di iivnin, migl nait, wen di kak kruo, ar wen die a lait —

³⁶ kaaz im mait kom bak wen unu naa luk fi’im kom an im kom fain unu a sliip.

³⁷ Wa mi se tu unu, mi a se tu evribadi: ‘Kip wach!’ ”