Read Jamaican Patois Maak 14 Bible Online

Maak 14 - Jamaican Patois bible

Maak 14

¹ A did tuu die bifuo di Paasuova alidie an di Festival we piipl nyam bred widout yiis. Di ed priis an di Laa tiicha dem did a chrai fain wan wie fi chrik Jiizas so dem kuda ares im an kil im.

² Dem se, “Wi kyaahn dwi’it wen di festival a gwaan, kaaz dat wi rail op di piipl dem.”

³ Jiizas did de a Saiman yaad a Betani. Saiman did av wan siknis we mek im skin fasi-fasi. Jiizas did sidong a di tiebl wen wan uman kom de. Shi did av wan likl stuon jaar ful-a wan dier dier porfyuum wa mek outa wan spais niem naad. Shi brok di jaar an chuo out di porfyuum pan Jiizas ed.

⁴ Som a di ges dem get beks, an staat tu se tu dem wan aneda se, “Wa mek shi a wies da dier dier porfyuum de?

⁵ It kuda did sel fi muo dan chrii onjrid silva kain an tek di moni gi puo piipl!” So dem staat ries ar op.

⁶ Bot Jiizas se tu dem se: “Unu lef ar! Wa unu a chobl ar fa? A sitn gud shi du tu mi.

⁷ Kaaz unu wi aalwiez av puo piipl mongks unu an unu kyan elp dem enitaim unu waahn fi elp dem. Bot unu naa go av mi mongks unu fi eva.

⁸ Shi du wa shi kuda du. Shi naint mi badi bifuo taim fi get mi redi fi dem beri mi.

⁹ Mi a tel unu dis, an mi naa lai, enitaim piipl priich di Gud Nyuuz roun di worl, dem a-go memba ar an taak bout wa shi du.”

¹⁰ Juudas Iskyariyat, wan a di twelv falara dem, go tu di ed priis fi sel out Jiizas an ton im uova tu dem.

¹¹ Wen dem ier dis dem glad-bag bos, so dem pramis fi pie im aaf. Fram da taim de, Juudas staat luk fi wan chaans fi ton Jiizas uova tu dem.

¹² Nou di Paasuova alidie wen piipl nyam bred widout yiis did kom. Pan di fos die a da alidie de wen dem kil di biebi shiip, Jiizas falara dem aks im se, “We yu waahn wi fi luk aafa di Paasuova fuud fi yu nyam?”

¹³ So im sen tuu a im falara dem an tel dem se, “Go a Jeruusilem, an wan man we a kyari wan jog a waata wi miit unu. Fala im.

¹⁴ Wen im go iina wan ous, tel di uona fi di ous se, ‘Di tiicha se fi aks yu se: We di ges ruum de we mi kyan nyam di Paasuova fuud wid mi speshal falara dem?’

¹⁵ Im wi shuo unu wan big ruum opstiez fiks op an redi. A de-so unu fi luk bout di fuud.”

¹⁶ So di tuu a dem lef go a Jeruusilem an fain evriting jos laik ou Jiizas did tel dem. An dem luk bout di Paasuova fuud.

¹⁷ Wen iivnin kom Jiizas an im twelv falara dem kom a di ous.

¹⁸ Wen dem did sidong a di tiebl an did a iit, Jiizas se tu dem se, “Mi a tel unu dis, an a chuu mi a taak, wan a unu we de ya a nyam wid mi a-go sel mi out.”

¹⁹ Wen di falara dem ier wa Jiizas se, dem aat jrap siek-a ou dem sad. An wan afta di ada dem aks Jiizas se, “A kyaahn mi?”

²⁰ Im se, “A wan outa di twelv a unu, wan a unu we a dip unu an iina di boul wid mi.

²¹ Kaaz di Man we Gad Pik mos go siem ou Gad wod se im a-go go, bot yu si di man we sel im out — chobl fi’im a tel yu! Im wuda betaraaf ef im neehn baan.”

²² Wail dem did a nyam, Jiizas tek di bred an afta im gi tangks, im brok it an gi dem an se tu dem se, “Tek dis. Dis a mi badi.”

²³ Den im tek di kop wid di wain an gi tangks. Im gi it tu dem, an aal a dem jringk fram di kop.

²⁴ Den im se tu dem se, “Dis a mi blod we set op di nyuu plan we Gad mek wid unu, mi blod we bliid out fi nof piipl.

²⁵ Mi a tel unu di chuut, mi naa go jringk no muor wain til di die kom wen mi jringk it iina wan nyuu wie iina Gad kindom.”

²⁶ Afta dem sing wan im dem lef go a Mount Aliv.

²⁷ Jiizas se tu im falara dem se, “Aal a unu gweehn ton unu bak pan mi, kaaz it rait dong iina Gad wod se, “ ‘Mi a-go lik dong di shepad, an di shiip dem a-go ron aal bout di plies.’

²⁸ Bot afta mi kom bak alaiv, mi a-go go iina Gyalalii bifuo unu.”

²⁹ Piita se tu im se, “Iivn ef di uol a dem ron we, mi naa go no we!”

³⁰ Jiizas se tu im se, “Mi a tel yu dis an a chuu mi a taak, bifuo di ruusta kruo tuu taim tide — da sed nait ya — yu a-go se yu no nuo mi chrii taim.”

³¹ Bot Piita uol aan pan wa im se an stil se, “Aal ef dem afi kil mi wid yu, mi wi neva se mi no nuo yu!” An aal a dem se di siem ting.

³² Den dem go a wan plies kaal Getsemini, an Jiizas tel dem se, “Sidong ya-so wail mi go prie.”

³³ So im tek Piita, Jiemz an Jan wid im an im did wel sad an im aat did evi.

³⁴ Im se tu dem se, “Mi aat evi so til mi fiil laik da presha ya a-go kil mi. Tan ya-so an kip wach.”

³⁵ Den im go likl forda, jrap imself flat a grong an prie an beg Gad se, “Ef im no afi sofa dem torbl sitn ya, no mek mi sofa.”

³⁶ Im se, “Faada, mi faada, notn no de we yu kyaahn du. Siev mi fram dem torbl sofarieshan ya! Bot ef a so yu waahn it fi go, aarait den.”

³⁷ Wen im go bak we im speshal falara dem de im fain dem a sliip, so im se tu Saiman Piita se, “Yu a sliip? Yu kudn kip wach fi wan owa?

³⁸ No sliip! Kip wach an prie so unu no fies notn we wi kaaz unu fi sin. Kaaz iina unu aat unu waahn du wa rait bot unu a jos piipl an dat mek unu wiik.”

³⁹ Jiizas go bak an prie di siem ting agen.

⁴⁰ Wen im kom bak agen, im fain dem faas a sliip; dem kudn kip dem yai uopm an dem neva nuo wa fi se tu im.

⁴¹ Wen Jiizas kom bak tu dem di tord taim, im aks dem se, “Unu stil a sliip an a res? Inof a dat! Di taim kom nou. Luk! Dem a-go sel out di Man we Gad pik an ton im uova tu di wikid piipl dem.

⁴² Unu git op! Mek wi go nou. Luk! Si di wan we sel mi out a kom de.”

⁴³ Jiizas did stil a taak wen Juudas, wan a im twelv speshal falara dem riich. Wan bag a piipl did a fala im wid suod an big tik. A di ed priis, di Laa tiicha, an di elda dem did sen dem kom.

⁴⁴ (Di wan we sel out Jiizas did gi dem wan sain se, “Di wan we mi kis a im a di man. Ares im, tek im we an gyaad im wen unu a tek im we.”)

⁴⁵ Wen Juudas riich im waak rait op tu Jiizas siem taim an se, “Tiicha!” an kis im.

⁴⁶ Den dem uol aan pan Jiizas an ares im.

⁴⁷ Wan a di falara dem we did a tan op de, tek out im suod an chap wan a di sorvant a di liida fi di priis dem. Im chap aaf im iez.

⁴⁸ Jiizas se tu di kroud se, “A kom unu kom wid suod an big tik fi ares mi laik mi a oul tiif an mordara?

⁴⁹ Die iin die out mi de mongks unu a tiich iina di yaad we Gad ous de, an unu neva ares mi. Bot dem sopm ya afi apm so wa rait dong iina Gad wod kyan kom chuu.”

⁵⁰ Den aal a im speshal falara dem tek fut an ron we lef im.

⁵¹ Wan yong man did a fala baka Jiizas. Im did a wier onggl wan linin klaat rap roun im. Dem chrai fi grab im,

⁵² bot im get we an ron we niekid lef di linin klaat iina dem an.

⁵³ Dem kyari Jiizas go we di liida fi di priis dem, di ed priis dem, di Laa tiicha dem, an di elda dem gyada op.

⁵⁴ An Piita did de likl forda aaf a fala Jiizas aal di wie tu di liida fi di priis dem yaad. So Piita go sidong wich paat di gyaad dem de an did a mek di faiya kip im waam.

⁵⁵ Di ed priis an aal a di Juu liida dem did a chrai fi fain piipl fi taak gens Jiizas, so dem kuda get fi kil im, bot dem kudn fain non.

⁵⁶ Nof piipl mek op tuori gens im, bot wa dem se neva mach op wid wa dem wan aneda se.

⁵⁷ Som a dem tan op a tel da lai ya pan im:

⁵⁸ “Wi ier im se, ‘Mi wi tier dong Gad ous we man mek an bil bak wan iina chrii die we man no mek.’ ”

⁵⁹ Bot aal wen dem a gi da tuori ya, wa dem se neva mach op.

⁶⁰ So di liida fi di priis dem tan op infronta evribadi an aks Jiizas se, “Yu naa notn fi se? Wa kain-a sitn dem ya dem a se bout yu?”

⁶¹ Bot Jiizas kip kwaiyat. Im neva se a wod. So di liida fi di priis dem aks im agen, “Yu a di Krais, di Muos Ai Gad we wi priez Bwai Pikni?”

⁶² “Ye!” Jiizas ansa, “An unu a-go si di Man we Gad Pik a sidong a di rait an a di wan we powaful, an a kom dong pan kloud we kom outa evn.”

⁶³ Den di liida fi di priis dem tier im kluoz an se, “Wa wi waahn muo piipl fi pruuv notn fa?

⁶⁴ Unu ier fi unuself ou im a disrispek Gad. Wa di kuot se?” Aal a dem rait im aaf se im gilti an im fi ded.

⁶⁵ Den som a dem staat pit pan im, som tai piis a klaat uova im yai so im kudn si an staat tomp im op wid dem fis an a se tu im se, “Yu se yu a wan prafit, so tel wi uu lik yu.” An di suoja dem we did a gyaad im biit im op tu.

⁶⁶ Piita did stil de iina di yaad wen wan sliev gyal fi di liida fi di priis dem kom wich paat im de.

⁶⁷ Wen shi si im a waam imself a di faiya-said, shi luk pan im gud gud an se, “Yu did de mongks Jiizas we kom fram Nazaret.”

⁶⁸ Bot im se a lai. Im se, “Mi no iivn nuo ar andastan wa yu a taak bout!” So im get op an go outa di giet. Siem taim wan ruusta kruo.

⁶⁹ Wen di sliev gyal si im, shi staat tel di piipl dem we did tan op de agen se, “Da man ya a wan a dem!”

⁷⁰ Bot Piita stil se im no nuo im. Likl afta dat di piipl dem we did tan op de se tu Piita se, “Yu a mos wan a dem, kaaz yu kom fram Gyalalii tu.”

⁷¹ Den Piita staat kos an kaal dong aal kain-a kraasiz pan imself an se, “Mi se mi no nuo da man ya wa unu a chat bout! Gad ponish mi ef a lai mi a tel! Mi no nuo im!”

⁷² Siem taim wan ruusta kruo, dat mek di sekan taim. Den Piita memba ou Jiizas did tel im se, “Bifuo di ruusta kruo tuu taim, yu a-go se yu no nuo mi chrii taim.” An Piita staat baal, an im baal an baal so til.