Read Jamaican Patois Maak 15 Bible Online

Maak 15 - Jamaican Patois bible

Maak 15

¹ Orli iina di maanin afta di ed priis dem, di elda dem, Laa tiicha an di ada Juu liida dem mek dem plan, dem tai op Jiizas an liid im we go ton im uova tu Pailat.

² So Pailat aks im se, “Yu a di Juu dem king?” Jiizas ansa im se, “A yu se so.”

³ Den di liida fi di priis dem staat se aal saat a sitn gens im.

⁴ So Pailat aks im agen se, “Yu ier umoch bad sitn dem se yu du? Lisn! Yu no ier aal di torbl sitn dem we dem a se gens yu!”

⁵ Bot Jiizas stil neva se a wod, an da wan de lik Pailat fi siks!

⁶ Evri Paasuova Alidie Pailat wuda frii wan prizna — eni wan we di piipl dem aks fa.

⁷ Nou wan man niem Barabas an som ada kriminal did iina prizn fi morda afta dem did rail op di piipl gens di govament.

⁸ Den di kroud a piipl kom tu Pailat an staat beg im fi frii wan prizna fi dem laik im aalwiez du.

⁹ So im aks dem se, “Unu waahn mi le’go di Juu dem King gi unu?”

¹⁰ (Kaaz im nuo se di liida fi di priis dem did ton im uova tu im siek-a bad main.)

¹¹ Bot di ed priis dem rail op di kroud fi aks Pailat fi let go Barabas.

¹² So Pailat aks dem agen se, “Den wa unu waahn mi fi du wid di wan we unu kaal di Juu dem King?”

¹³ Dem baal out se, “Kil im pan di kraas!”

¹⁴ Pailat aks dem se, “Wa mek? Wa im du rang?” Bot dem baal out louda, “Kil im pan di kraas!”

¹⁵ Pailat did waahn fi mek di kroud a piipl api, so im let go Barabas. Den im mek di suoja dem biit Jiizas. Afta dat im ton im uova tu dem fi dem kil im pan di kraas.

¹⁶ So di suoja dem liid im go iina di palis (dat a di govana yaad) an kaal op di ada suoja dem we iina dem gruup.

¹⁷ Dem put wa lang lang porpl jakit pan Jiizas, an wan kroun mek outa makabush pan im ed.

¹⁸ Dem staat big im op an a se “Manaz an rispek tu di Juu dem King.”

¹⁹ Den dem lik lik im op iina im ed wid wan piis a tik an pit pit op pan im. Den dem go dong pan dem nii an gwaan laik se dem a worship im.

²⁰ Wen dem don mak im an tek im mek preke, dem tek aaf im porpl ruob an put aan bak im uona kluoz. Den dem kyari im go we fi niel im pan di kraas.

²¹ Wan man niem Saiman we kom fram Sairiin did a komiin fram konchri (im a did Aligzanda an Ruufos faada). Di suoja dem fuos im fi kyari Jiizas kraas.

²² Dem kyari Jiizas go a wan plies we niem Golgota, (dat miin Di Skol Plies).

²³ Dem chrai fi gi im wain miks wid wan spais niem mor, bot Jiizas wudn jringk it.

²⁴ Den dem niel im pan di kraas. Di suoja dem chuo dais fi shier op im kluoz an fi fain out uu fi get wich paat.

²⁵ A did nain aklak iina di maanin wen dem kil im pan di kraas.

²⁶ Den dem rait pan wan piis a buod wa im du mek dem kil im. It riid se, “DI JUU DEM KING.”

²⁷ An dem kil tuu tiif siem taim wid im, wan pan im rait-an-said an wan pan im lef-an-said.

²⁹ Di piipl dem we did a paas se som torbl sitn tu Jiizas. Dem shiek dem ed an se, “Aa! Yu, we kyan mash op Gad ous an bil it bak iina chrii die,

³⁰ kum aafa di kraas an siev yuself no!”

³¹ A no dem wan, aal di ed priis dem, plos di Laa tiicha dem an di Juu liida dem laaf aafa Jiizas. Dem se, “Im siev ada piipl, bot im kyaahn siev imself!

³² Mek di Krais, di wan we se im a Izrel king, kom dong aafa di kraas nou mek wi si an wi wi biliiv im!” An di tuu we dem did niel pan di kraas wid im kos im out tu.

³³ Wen it riich migl die, di uol plies get daak til bout chrii aklak di iivnin.

³⁴ Wen it kech chrii aklak, Jiizas baal out loud loud, “Elowi, Elowi, lema sabaktanai?” Dat miin, “Mi Gad, mi Gad, wa mek yu lef mi an gaan?”

³⁵ Wen som a di piipl we did tan op de ier im, dem se, “Lisn, im a kaal fi Ilaija!”

³⁶ Den sumadi ron go dip piis a sponj iina som sowa wain, put it pan wan tik an gi im fi jringk. Den im se, “Lef im! Mek wi si ef Ilaija a-go kom kom tek im dong fram di kraas!”

³⁷ Bot Jiizas baal out loud loud, bluo im bret wan laas taim an den ded.

³⁸ Siem taim di kortn we did eng op iina Gad ous plit iina tuu fram tap tu batam.

³⁹ Wen di ed fi onjrid suoja we did tan op infronta di kraas si ou Jiizas ded, im se, “Fi riil, da man ya a did riili Gad Bwai Pikni fi chuu!”

⁴⁰ Som uman did tan op forda out a wach wa a gwaan. Uman laik Mieri Magdaliin, Mieri we a Jiemz an Juozif mada (Jiemz did yongga dan Juozif), an Saluomi did de de tu.

⁴¹ Wen Jiizas did iina Gyalalii dem did mongks im falara dem an dem yuus tu elp luk aafa im. Nof muo uman we did kom op wid im kom a Jeruusilem did de de tu.

⁴² Da siem iivnin de, a did taim fi luk bout tingz fi di Paasuova alidie (dat miin se a did di die bifuo di Sabat),

⁴³ Juozif we kom fram Arimatiya a did wan a di Juu dem liida we evribadi did wel rispek. Im did a luk fi Gad kindom. Im get briev an go tu Pailat go aks im fi gi im Jiizas badi.

⁴⁴ Pailat did shak fi ier se im ded aredi. Im kaal di ed fi onjrid suoja an aks im ef Jiizas ded aredi.

⁴⁵ Afta im ier we di ed fi onjrid suoja se, Pailat gi Juozif Jiizas badi.

⁴⁶ Juozif bai som linin klaat, tek dong Jiizas badi aafa di kraas, rap im op iina di klaat an put im iina wan tuum we did dig iina wan rak. Den im ruol wan big stuon infronta di tuum.

⁴⁷ Mieri Magdaliin an di ada Mieri, Juozif mada, did si we Juozif did beri Jiizas badi.