Read Jamaican Patois Maak 16 Bible Online

Maak 16 - Jamaican Patois bible

Maak 16

¹ Afta di Sabat, Mieri Magdaliin, Mieri Jiemz mada, an Saluomi bai som swiit spais fi go naint Jiizas badi.

² An orli orli iina di maanin, pan di fos die a di wiik az di son kom op, dem ed fi di tuum.

³ Wen dem did a waak dem se tu wan aneda, “A uu a-go ruol we di stuon fram infronta di tuum fi wi?”

⁴ Bot wen dem luk op dem si se di big uol stuon di ruol we aredi.

⁵ Wen dem go iina di tuum, dem shak fi si wan yong man we av aan wan wait jakit sidong pan di rait-an-said.

⁶ Bot im se tu dem se, “No fried. Mi nuo se unu a luk fi Jiizas we kom fram Nazaret, we dem kil pan di kraas. Bot im kom bak alaiv. Im no de ya. Luk, a rait uova de-so dem did put im badi.

⁷ So go tel im falara dem, an Piita tu, se im a go a Gyalalii bifuo dem kom. Unu wi si im de, jos laik wa im did tel unu.”

⁸ Dem lef di tuum an tek fut, kaaz dem did so shak an kanfyuuz. Dem neva se a wod tu nobadi kaaz dem did so fried. [[

⁹ Afta Jiizas kom bak alaiv pan di fos die a di wiik, di fos sumadi we im mek si im a Mieri Magdaliin, di uman we im did ron sevn diiman outa.

¹⁰ Shi go we go tel im falara dem we did a ala an a baal.

¹¹ An wen Mieri tel dem se Jiizas kom bak alaiv an dat shi si im, dem neva biliiv ar.

¹² Afta dat Jiizas shuo imself iina wan difrant wie tu tuu a im falara dem wen dem did a waak iina di konchri.

¹³ Dem go bak go tel di ada wan dem, bot dem neva biliiv dem.

¹⁴ Afta dat Jiizas shuo imself tu im ilevn falara dem wen dem did a nyam. Im taak tu dem aad aad bout ou dem aad-iez an dem aat tof kaaz dem neva biliiv di wan dem we did si im afta im kom bak alaiv.

¹⁵ Im tel dem se, “Go aal uova di worl an priich di Gud Nyuuz tu evribadi.

¹⁶ Ef nobadi biliiv an get baptaiz, a dem a-go get siev, bot di wan dem wa no biliiv, jojment fi dem!

¹⁷ Di wan dem we biliiv a-go get powa fi du dem sitn ya: dem wi yuuz fi mi niem an ron out diiman, dem wi taak som nyuu langwij,

¹⁸ dem wi kyan yuuz dem an pik op siniek, an no paizn we dem jringk naa go du dem notn. Dem wi put dem an pan sik piipl an mek dem get beta.”

¹⁹ Afta di Laad Jiizas don taak tu dem, Gad tek im op iina evn an mek im sidong a im rait-an-said.

²⁰ Im falara dem go aal bout go priich, an di Laad did a wok wid dem, an di sain dem we im mek dem du shuo evribadi se dem mesij a chuu sitn.]]