Read Jamaican Patois Maak 2 Bible Online

Maak 2 - Jamaican Patois bible

Maak 2

¹ Afta kopl die Jiizas go baka Kyaporniyom an nyuuz pred aal bout se im kom uom.

² So piipl staat fi gyada op a im ous an di plies did ram op so til yu kudn fain no we fi tan op, no iivn a di duor. An Jiizas priich Gad wod tu dem.

³ Som piipl kom de wid wan kripl man fi si Jiizas an fuo a di man dem did a kyari im.

⁴ Bot siek-a di kroud, dem kudn get di man iina di ous we Jiizas de. So di man dem tier aaf paat a di ous tap an let dong di kripl man pan im chrecha.

⁵ Wen Jiizas si ou di man dem biliiv iina im, im se tu di kripl man se, “Mi pikni, mi paadn yu fram aal a yu sin dem.”

⁶ Som a di Laa tiicha dem did sidong de an dem staat tingk aad aad tu demself se,

⁷ “A wa rang wid da man ya duo iihn? Ou im fi se dem sitn de? Im a disrispek Gad! No onggl Gad wan kyan paadn sin?”

⁸ Bot siem taim Jiizas pik op iina im spirit wa dem did a tingk. So im se tu dem se, “Wa mek unu a tingk dem sitn de iina unu aat?

⁹ Wich wan iiziya, fi tel di kripl man, ‘Mi paadn yu sin dem,’ ar fi tel im se, ‘Tan op, pik op yu chrecha, an waak’?

¹⁰ Bot fi mek unu nuo, mi a-go shuo unu se di Man we Gad Pik av di rait an di powa fi paadn sin pan ort.” So im se tu di kripl man se,

¹¹ “Lisn tu mi, tan op, tek op yu chrecha, an go a yu yaad.”

¹² Di man get op siem taim, tek op im chrecha an ed fi im yaad wail evribadi did a wach im. Di piipl did shak an dem priez Gad an se, “Wi neva si notn laik dis bifuo!”

¹³ Jiizas go bak pan di sii-said an uol iip a piipl gyada op roun im, an im tiich dem.

¹⁴ Wen im did de pan im wie im si Liivai, Alfiyos bwai, sidong wich paat piipl kalek taks. Jiizas se tu im se, “Fala mi!” So im get op an fala Jiizas.

¹⁵ Afta dat, Jiizas go nyam a Liivai yaad, an nof taks kalekta an piipl we du rang did kom kom sidong an nyam wid im an im speshal falara dem, kaaz a uol iip a piipl did a fala im.

¹⁶ Wen di Laa tiicha dem an di Farisii dem si se Jiizas did a nyam wid taks kalekta an piipl we du rang, dem aks im falara dem se, “Wa mek im nyam wid di taks kalekta an rang-duwa?”

¹⁷ Wen Jiizas ier wa dem se, im se tu dem se, “Piipl we no sik no niid dakta, a onggl sik piipl niid dakta. Mi neehn kom ya fi tel piipl we du rait fi ton fram dem rang, a piipl we du rang mi kom ya fa.”

¹⁸ Nou Jan di Baptis falara dem an di Farisii dem did a kip we fram fuud. Som piipl kom tu Jiizas an aks im se, “Wa mek Jan falara dem an di Farisii dem a kip we fram fuud an fi yu falara dem naa du dat?”

¹⁹ Jiizas ansa dem se, “Yu tingk se di piipl dem we di braidgruum invait a im wedn fi kip we fram fuud wen im mongks dem? Wen di braidgruum de mongks dem, dem kyaahn kip we fram fuud.

²⁰ Bot di taim a-go kom wen di braidgruum a-go get tek we fram dem. Da taim de dem wi kip we fram fuud.

²¹ “Nobadi no yuuz piis a nyuu klaat fi pach op uol kluoz. Ef dem du dat, wen dem wash di kluoz, di nyuu klaat a-go tier we fram di uol wan an lef wan biga uol dan wa did de de bifuo.

²² Nobadi no chuo nyuu wain iina uol wain bakl. Ef dem du dat, di wain a-go bos op di bakl. Di bakl a-go mash op an di wain a-go wies. Wa piipl du a put nyuu wain iina nyuu wain bakl.”

²³ Wan Sabat, Jiizas an im speshal falara dem did a go chuu wan wiit fiil. Im falara dem staat pik som a di wiit dem wen dem did a paas chuu.

²⁴ So som Farisii aks Jiizas se, “Luk ya, wa mek dem a du wa di Laa se dem no fi du pan di Sabat?”

²⁵ Jiizas ansa dem se, “Unu neva riid wa Dievid did du wen im an im fren dem did onggri?

²⁶ Ou im go iina Gad ous wen taim Abaiyataar a did liida fi di priis dem, nyam di uoli bred we di Laa se onggl di priis dem fi get, an aal gi im fren dem som?”

²⁷ Den Jiizas se tu dem se, “Di Sabat did mek fi piipl, piipl neva mek fi di Sabat.

²⁸ Kaaz a dat di Man we Gad Pik, a im ruul. An im ruul aal uova di Sabat.”