Read Jamaican Patois Maak 3 Bible Online

Maak 3 - Jamaican Patois bible

Maak 3

¹ Wan neda die Jiizas go baka di Juu dem choch an wan man wid wan kripl an did de de.

² Di Farisii dem wach Jiizas laik wan aak fi si ef im did a go mek di man beta pan di Sabat, so dem kuda av sopm fi se gens im.

³ So Jiizas se tu di man wid di kripl an se, “Tan op infronta evribadi.”

⁴ Den im aks di piipl, “Wich wan di Laa se wi kyan du pan di Sabat: fi du gud ar fi du bad, fi siev sumadi laif ar fi kaaz sumadi fi ded?” Bot nobadi neva se a wod.

⁵ Jiizas luk roun pan dem an im did wel beks an it bon im fi si ou dem aad-iez. So im se tu di man se, “Chrech out yu an.” Di man chrech out im an, an im an get beta.

⁶ So siem taim di Farisii dem lef out an go staat plan wid Erad falara dem fi kil Jiizas.

⁷ Den Jiizas an im falara dem lef out an go dong a di sii, an wan uol iip a piipl fram Gyalalii fala im. An fram Judiya,

⁸ Jeruusilem, Iduomiya, uova di ada saida Riva Jaadn, an roun Taiya an Saidan uol iip muo piipl kom tu im wen dem ier bout di sitn dem we im did du.

⁹ Siek-a di kroud, Jiizas tel im falara dem fi get wan likl buot redi fi im, so dat di kroud wudn push aad gens im.

¹⁰ Kaaz chuu im did iil nof a dem, aal a di sik piipl dem did a push an a chrai fi get kluos so dem kuda toch im.

¹¹ An piipl we av diiman iina dem, enitaim di diiman dem si Jiizas, dem fling dong demself an baal out se, “Yu a Gad Bwai Pikni!”

¹² Bot Jiizas wuda waan di diiman dem se dem mosn tel nobadi bout im.

¹³ Nou Jiizas go op pan wan il an kaal aal uu im did waahn an dem kom tu im.

¹⁴ Im pik out twelv man we im kaal im apasl, so dat dem kuda tan wid im an dat im kuda sen dem fi go priich,

¹⁵ an dat im kuda gi dem di rait an di powa fi ron out diiman outa piipl.

¹⁶ Di twelv we im pik a did Saiman we im kaal Piita,

¹⁷ Jiemz an im breda Jan, Zebidii tuu bwai dem, we im kaal Buowanojiiz (dat miin man we komiin laik tonda);

¹⁸ Anju, Filip, Bartalimyuu, Matyu, Tamas, Jiemz Alfiyos bwai, Tadiyos, Saiman di Zelat,

¹⁹ an Juudas Iskyariyat, di wan we sel out Jiizas.

²⁰ Nou Jiizas go baka di ous wich paat im did a stie an wan kroud a piipl did gyada op de, so im an im falara dem kudn get fi iit.

²¹ Wen im fambili ier dis, dem go fi im fi go tek chaaj a im, kaaz dem se, “Im a luuz im ed.”

²² Di Laa tiicha dem we did kom dong fram Jeruusilem se, “Im av Belzibul, di diiman ruula, iina im. A Belzibul gi im powa fi ron out diiman.”

²³ So Jiizas kaal di piipl dem an tel dem wan likl tuori fi tiich dem sitn. Im aks dem se, “Ou Sietan fi ron out imself, iihn?

²⁴ Ef di piipl a wan kindom a iet dem wan aneda an a fait gens dem wan aneda, da kindom de kyaahn laas lang.

²⁵ Ef di piipl iina wan fambili a iet dem wan aneda an a fait gens dem wan aneda, da fambili de kyaahn laas lang.

²⁶ An ef Sietan iet imself an a fait imself, im no wuda luuz im powa, im kindom no wuda mash op an no don im wuda don fa?

²⁷ An nobadi kyaahn brok iina wan chrang man ous an tiif out im sitn dem. Dem wuda afi tai im op fos. Wen dem tai im op, a da taim de dem kyan tek we evriting.

²⁸ Mi a tel unu di chuut, piipl wi get paadn fi aal kain-a sin, iivn fi aal a di torbl sitn dem we dem se gens Gad.

²⁹ Bot nobadi we se torbl sitn gens di Uoli Spirit kyaahn get paadn fi dat, kaaz dem wuda sin wan sin we nobadi kyaahn get paadn fa non at aal.”

³⁰ Jiizas se dat kaaz dem did se, “Im av wan diiman iina im.”

³¹ Den Jiizas mada an im breda dem kom fi si im. Dem tan op outa duor an sen sumadi go kaal im.

³² Di kroud a piipl we did sidong roun im se tu im se, “Yu mada, yu breda, an sista dem outa duor fi si yu.”

³³ Im ansa dem se, “Uu a mi mada an uu a mi breda dem?”

³⁴ Den im luk roun pan di piipl dem we did a sidong roun im an se, “Si mi mada an mi breda dem ya!

³⁵ Enibadi we du wa Gad se dem fi du a mi breda, sista, an mada dat.”