Read Jamaican Patois Maak 4 Bible Online

Maak 4 - Jamaican Patois bible

Maak 4

¹ Wan neks taim Jiizas did a tiich saida di liek. Wan big big kroud a piipl gyada op roun im. Im did afi go iina wan buot pan di liek go sidong wail di iip a piipl dem tan op a di liek-said.

² An im yuuz som likl tuori an tiich dem uol iip a sitn. Im se tu dem se,

³ “Ier dis! Wan faama did go out fi plaant som siid.

⁴ An wen im did a plaant, som a di siid dem jrap wich paat piipl waak, an di bod dem kom kom nyam dem op.

⁵ Som jrap we bie rakstuon de. Dem neehn av moch dot fi gruo iina. Nou, kaaz no uol iip a dot neehn de de, di ruut kudn go dong diip diip so di plaant dem kom op faas faas.

⁶ Wen di son kom op, it skaach op di plaant dem, an, chuu dem ruut neehn lang inof, dem jrai op an ded.

⁷ Som ada siid jrap mongks makabush, an wen dem pap op di makabush chuok dem. So dem neva bier notn.

⁸ Bot som a di siid dem jrap pan gud grong, an kom bier fuud. Som bier toti an siksti an iivn onjrid taim muo dan wa di faama did plaant.”

⁹ Den Jiizas se, “Enibadi we av iez fi ier — beta lisn gud!”

¹⁰ Afta di kroud lef, di twelv apasl an di ada piipl dem we did de roun Jiizas aks im bout di tuori dem.

¹¹ So im ansa dem se, “Unu get di chaans fi nuo di siikrit sitn dem bout Gad kindom. Bot di piipl dem we de outsaid, mi yuuz tuori tel dem evriting,

¹² so “ ‘Iivn duo dem mait-a a luk an a luk aad aad, dem naa go si notn, an iivn duo dem mait-a a lisn an a lisn gud gud dem naa go andastan wa dem ier, kaaz ef dem did andastan dem wuda ton we fram dem sin an get siev.’ ”

¹³ Den Jiizas aks dem se: “Unu no andastan da tuori de? Den ou unu a-go andastan no ada tuori?

¹⁴ Di faama plaant di mesij.

¹⁵ Di siid we jrap wich paat piipl waak, dem a di piipl we ier di mesij, bot Sietan kom siem taim an tek we di mesij outa dem aat.

¹⁶ Di siid dem we jrap wich paat bie rakstuon de a di piipl dem we wel glad fi Gad wod siem taim dem ier it.

¹⁷ Bot siem laik di plaant uufa ruut no go dong diip iina di grong, dem no mek Gad wod go diip iina dem aat, so dem no laas no taim. Wen tof taim lik dem siek-a Gad wod, dem gi op an ton bak siem taim — siem laik ou di plaant jrai op an ded.

¹⁸ Stil som piipl komiin laka di siid dem we jrap iina makabush. Dem piipl de ier Gad wod,

¹⁹ bot chuu dem a fret bout laif, chuu aal dem kyaahn tingk bout a ou fi mek moni an get rich, an chuu dem waahn muo an muo tingz, dem sitn de blak Gad wod, so it no du notn difrant iina dem laif.

²⁰ Bot som ada siid jrap pan gud grong. Dem a di piipl we ier Gad wod an tek it iin an it bier uol iip a fruut: toti, siksti ar iivn wan onjrid taim muor dan wa di faama did plaant.”

²¹ Den Jiizas tel dem wan neda tuori, im se, “Piipl no lait lamp fi put it anda baaskit ar anda bed, duohn? Dem no put it we piipl kyan si di lait?

²² Kaaz notn no aid we naa go kom out iina uopm, an eniting we aid a-go kom out we evribadi kyan si it.

²³ Enibadi we av iez fi ier, beta lisn gud!”

²⁴ An im se tu dem se, “Tingk gud bout wa unu ier. Eniting we unu dish out gi piipl a dat unu a-go get bak, an get aal muo pan tap a it.

²⁵ Kaaz enibadi we av sopm Gad a-go gi im muor, bot di wan we no av notn, Gad a-go tek we fram dem iivn di likl bit we dem av.”

²⁶ Den Jiizas se tu dem agen se, “Mek mi tel unu ou Gad kindom tan. It komiin laik sumadi we plaant som siid iina im fiil.

²⁷ Di faama go sliip a nait an get op a maanin taim an di siid dem kech an gruo, bot im no nuo ou di siid gruo.

²⁸ Pan it uon di grong mek di siid kech an gruo an bier fuud. Di staak kom fos, den di kaan tik, den di kaan pan di tik.

²⁹ An wen di fuud we di faama plaant redi, im pik dem.”

³⁰ Jiizas aks di piipl dem agen, “Wa wi kyan se Gad kindom tan laik? Ar wa kain-a tuori wi kyan yuuz fi elp piipl andastan it?

³¹ It komiin laik wan likl likl siid we sumadi plaant iina di grong. It likla dan aal ada siid,

³² bot wen it plaant, it gruo an get big, biga dan aal a di plaant dem we iina di gyaadn. It sen out som big big lim an di wail bod dem bil dem nes iina it.”

³³ So Jiizas yuuz nof likl tuori laik dem ya fi tiich dem aal wa dem kuda andastan.

³⁴ Evriting im tel dem im yuuz tuori fi tel dem. Bot wen im de mongks im speshal falara dem, im brok dong evriting tu dem fi mek dem andastan.

³⁵ Da siem die de, wen it kech iivnin, Jiizas se tu im falara dem, “Mek wi go uova di ada saida di liek.”

³⁶ So dem lef di kroud, go iina di buot wid im, an go pan di ada saida di liek. Som ada buot we did de de go wid im tu.

³⁷ Aal av a sodn, som chrang chrang briiz staat bluo, an it bluo op di waata iina di buot til it nieli ful.

³⁸ Aal dem taim de Jiizas did faas a sliip pan wan pila iina di baka di buot. So dem wiek im op an se tu im se, “Tiicha, yu no si se wi out fi ded, yu no kier?”

³⁹ So Jiizas get op an taak chrang tu di briiz, an tel di sii fi sekl dong. So di briiz tap an di wiev dem sekl dong.

⁴⁰ Den Jiizas aks dem se, “Wa mek unu fried so? Unu stil no biliiv iina Gad?”

⁴¹ Dem fried so til dem ton fuul, so dem se tu wan aneda se, “A uu da man ya? Iivn di briiz an di sii dem du wa im tel dem!”