Read Jamaican Patois Maak 5 Bible Online

Maak 5 - Jamaican Patois bible

Maak 5

¹ Jiizas an im falara dem riich di neks saida Liek Gyalalii, iina di konchri we di Girasiinz piipl dem liv.

² Siem taim Jiizas kom outa di buot, wan man we did av wan diiman, kom fram di beriyin grong an kom op tu im.

³ Di man did liv a di beriyin grong, an nobadi kudn tai im op no muor, no iivn wid chien.

⁴ Kaaz a nof taim piipl tai op im an an im fut dem wid chien an aiyan chrap, bot im aalwiez bos aaf di chien dem an brok op di aiyan chrap dem. Nobadi neva chrang inof fi kanchuol im.

⁵ Nait an die im did de iina di griev yaad an op iina di mountn a baal out an kot kot op imself wid stuon.

⁶ Wen di man spat Jiizas fram faar, im ron go jrap dong pan im nii infronta im.

⁷ Den im baal out pan tap a im vais se, “Lef mi no Jiizas, di Muos Ai Gad Bwai Pikni! Mi a beg yu, fi Gad siek, no mek mi sofa!”

⁸ Im se dat kaaz Jiizas did tel im se, “Kum outa da man ya, yu diiman yu!”

⁹ So Jiizas aks im se, “Wa yu niem?” An im ansa bak, “Mi niem ‘Uol-iip’, kaaz a nof a wi de ya.”

¹⁰ Den im beg an beg Jiizas nof fi sen dem outa di ieriya.

¹¹ Pan di il-said, yu did av wan uol iip a ag a nyam.

¹² So di diiman dem beg im se, “Sen wi go iina di ag dem. Mek wi go iina dem.”

¹³ Jiizas mek dem gwaan. So di diiman dem kom outa di man, an go chriet iina di ag dem. Den di uol a di ag dem, bout tuu touzn a dem, tek aaf dong di stiip stiip il-said an joun iina di liek.

¹⁴ Wen dat apm, di man dem we luk aafa di ag dem ron go pred di nyuuz iina di toun an di plies dem we de nier di toun. So di piipl dem kom out fi si wa apm.

¹⁵ An wen dem riich we Jiizas de, dem si di man we did av iin diiman. Im did a sidong de, av aan kluoz an iina im rait main. An di piipl dem kech dem fried.

¹⁶ Di wan dem we did si wa apm tu di man we did av iin di diiman, tel evribadi wa did apm, an dem taak bout di ag dem tu.

¹⁷ Den di piipl dem beg Jiizas fi lef dem ieriya.

¹⁸ Wen Jiizas did a go iina di buot, di man we did av iin di diiman did a beg fi go wid im.

¹⁹ Bot Jiizas neva mek im go wid im. Insted-a dat, im se tu im se, “Go a yu yaad, go tu yu uona piipl dem an tel dem aal wa di Laad du fi yu. Tel dem ou im gud an kain tu yu.”

²⁰ So di man lef an staat pred di nyuuz aal uova di ten siti dem we dem kaal Dikyapolis. Im tel dem aal wa Jiizas du fi im, an evribadi did shak wen dem ier.

²¹ Afta dat Jiizas go bak kraas Liek Gyalalii iina wan buot. Wen im riich, wan big kroud gyada op roun im pan di sii-said.

²² Den wan man niem Jairos we did inchaaj a wan a di Juu dem choch, kom wich paat Jiizas de. Wen im si im, im go dong pan im nii infronta im.

²³ Im beg Jiizas, “Du, mi likl daata a-go ded! Du, mi a beg yu, kom put yu an pan ar an shi wi get beta an liv.”

²⁴ So Jiizas go wid im. Wan big kroud go wid im tu an dem did a pres aad gens Jiizas.

²⁵ Wan uman we did a sofa did iina di kroud. Fi twelv ier shi kudn tap bliid.

²⁶ Shi go wan uol iip a dakta, bot non a dem kudn elp ar. Shi spen aaf aal ar moni pan dakta bil, an insted-a shi get beta, shi onggl get wosa.

²⁷ Di uman did ier wa piipl did a se bout Jiizas, so shi kom op baka im iina di kroud an toch im kluoz.

²⁸ Kaaz shi did a se tu arself se, “Ef mi kuda jos toch im kluoz, mi wuda get beta.”

²⁹ Wen shi toch im, shi tap bliid siem taim, an shi fiil iina ar badi se shi get beta.

³⁰ Siem taim Jiizas nuo se di powa we im av did mek sumadi beta. So im ton roun iina di kroud an did a aks, “A uu toch mi kluoz?”

³¹ Im falara dem se tu im se, “Yu no si di kroud a piipl we a pres gens yu? So ou yu fi aks a uu toch yu?”

³² Bot Jiizas ton roun an stil a luk fi si a uu did toch im.

³³ Di uman did fried an a chrimbl, kaaz shi nuo wa did apm tu ar. So shi jrap arself a im fut an tel im evriting.

³⁴ So Jiizas se tu ar se, “Daata, kaaz yu biliiv iina mi, yu aarait nou. Gwaan wid piis iina yu aat, kaaz yu beta nou.”

³⁵ Jiizas did stil a taak wen som piipl fram Jairos yaad kom tu Jairos — di ed fi di Juu dem choch. Dem tel im se, “Yu gyal pikni ded! Wa mek yu stil a bada di tiicha?”

³⁶ Bot Jiizas neva pie dem no main. Im se tu di ed fi di Juu dem choch, “No bada fried, jos biliiv.”

³⁷ Jiizas neva mek nobadi go wid im, onggl Piita, Jiemz an Jiemz breda, Jan.

³⁸ Wen dem riich Jairos yaad, im si di piipl dem a mek wan bag a naiz an a pudong wan piis a loud baalin.

³⁹ Wen Jiizas go iin im se tu dem se, “Wa unu a baal an a gwaan so fa? Di pikni no ded; a sliip shi a sliip.”

⁴⁰ An dem staat laaf aafa im. Bot Jiizas sen evribadi outa di ous. Den im tek di likl gyal mada an faada an im chrii falara dem an go iina di ruum we di likl gyal did de.

⁴¹ Den Jiizas tek taim uol di likl gyal an an se tu ar se, “Taliita kum!” Dat miin, “Likl gyal, git op!”

⁴² Di likl gyal get op siem taim an staat waak roun (shi a did bout twelv ier uol). Dem we si wa apm did shak so til.

⁴³ Bot Jiizas aada dem chrang chrang no fi tel nobadi wa apm. Den im tel dem fi gi ar sopm fi nyam.