Read Jamaican Patois Maak 6 Bible Online

Maak 6 - Jamaican Patois bible

Maak 6

¹ Den Jiizas lef da plies de an im an im falara dem go baka Nazaret we im kom fram.

² Pan di Sabat, im tiich iina di Juu dem choch. Uol iip a piipl we did ier im kudn biliiv dem iez. So dem aks, “A we da man ya get di sitn dem we im a tiich fram? Ou im so waiz? An di mirikl dem we im a wok, a we im get di powa fi du dem?

³ A uu im, no di kyaapinta dis? No Mieri bwai? An wi no nuo im breda dem: Jiemz, Juozif, Juudas an Saiman? An im sista dem no liv ya wid wi?” An so dem did beks an neehn waahn diil wid Jiizas non at aal.

⁴ Bot Jiizas se tu dem se, “Piipl eva rispek an big op prafit yu nuo, onggl di piipl dem we im baan an gruo mongks — im uona fambili an uu im liv wid no shuo im da rispek de.”

⁵ So Jiizas kudn wok no mirikl de, onggl fi toch kopl sik piipl an mek dem beta.

⁶ An im kudn biliiv ou di piipl dem neehn biliiv iina im. Den Jiizas go roun an tiich iina di dischrik dem.

⁷ Im kaal im twelv apasl dem an sen dem out tuu tuu an gi dem di rait fi ron out wikid spirit.

⁸ Im tel dem se, “Wen unu go wich paat mi sen unu, di onggl ting unu fi kyari a unu waakn tik — no bred, no bag, no moni —

⁹ wier unu slipaz, bot no kyari no ada kluoz.”

¹⁰ An im tel dem se, “Enitaim unu go iina wan ous, tan de til unu lef di ieriya.

¹¹ Ef unu go iina wan ieriya an di piipl dem no tek unu iin ar no waahn ier wa unu av fi se, shiek di dos aafa unu fut wen unu a lef fi waan dem an fi shuo dem se Gad no api wid dem an im a-go joj dem.”

¹² So dem lef an staat fi priich se evribadi fi ton we fram dem sin an ton tu Gad.

¹³ Dem ron out nof diiman an naint nof sik piipl wid ail an mek dem get beta.

¹⁴ King Erad did ier bout aal wa Jiizas did a du, kaaz evribadi did nuo bout Jiizas. Som a di piipl dem did a se, “Im a Jan di Baptis kom bak alaiv, so a dat mek im av powa iina im fi wok mirikl.”

¹⁵ Som ada piipl did a se, “Im a Ilaija!” Stil som ada piipl did a se, “Im a wan prafit, laik wan a di prafit dem fram wie bak wen.”

¹⁶ Bot wen Erad ier aal wa di piipl dem did a se bout Jiizas, im se, “A Jan, uufa ed mi did mek dem chap aaf, a im kom bak alaiv!”

¹⁷ Kaaz Erad did mek im suoja dem ares Jan an lak im op iina prizn. Im du dat siek-a Eruodiyas, im breda Filip waif, we im did tek we an marid.

¹⁸ Kaaz Jan did tel im uova an uova se, “It no rait fi yu marid yu breda waif — yu a brok di Laa.”

¹⁹ So Eruodiyas kyari bad beli fi Jan an did waahn kil im. Bot shi neva get di chaans

²⁰ kaaz Erad did wel rispek Jan an protek im, kaaz im nuo se Jan a did wan gud man we aalwiez du wa rait. Erad did lov fi lisn tu Jan, iivn duo evritaim im ier im, wa Jan se kanfyuuz im muor an muor.

²¹ Bot Eruodiyas get ar chaans pan di die wen Erad did a kip op im bortdie paati. Aal a di tap man dem iina di govament, di tap aami piipl dem, an di liida dem fram Gyalalii did de a di paati.

²² Eruodiyas daata daans fi Erad an im ges dem. Dem did wel api wid ou shi daans. So Erad se tu ar se, “Aks mi fi eniting we yu waahn an mi wi gi yu.”

²³ Im pramis ar se, “Eniting yu aks fa mi wi gi yu, op tu aaf a mi kindom.”

²⁴ So shi lef an go aks ar mada, “Mama, wa mi fi aks fa?” Ar mada tel ar se, “Aks fi Jan di Baptis ed.”

²⁵ So shi ron bak tu di king siem taim an tel im wa shi waahn. Shi se, “Mi waahn Jan di Baptis ed pan wan pliet rait nou!”

²⁶ Di king aat staat at im wen im ier wa shi aks fa, bot im kudn tek bak im wod, kaaz im did don pramis ar infronta aal a im ges dem aredi.

²⁷ So im aada im suoja dem siem taim fi go chap aaf Jan ed kyari it kom. So di suoja dem go a di prizn go chap aaf Jan ed.

²⁸ Wan a dem put it pan wan pliet an kyari it go gi di likl gyal an di gyal kyari it go gi ar mada.

²⁹ Wen Jan falara dem ier wa apm, dem go tek im badi an beri im.

³⁰ Den Jiizas apasl dem gyada op roun im an tel im bout aal a wa dem did du an wa dem did tiich.

³¹ Jiizas an im apasl dem kudn iivn get taim fi nyam, kaaz a di uol iip a piipl we did a kom an go, so Jiizas tel im apasl dem se, “Kom mek wi go a wan plies we nobadi no de so wi kyan get we fram di kroud, get sopm fi nyam an res likl.”

³² Den dem lef iina wan buot fi go a wan plies we nobadi no de.

³³ Bot nof piipl si dem wen dem did a lef an figa out we dem did a go. So piipl fram evri toun ron go a di plies we dem did a go an riich de bifuo dem.

³⁴ Wen Jiizas kom outa di buot, im si di big big kroud a piipl pan di sii-said an im fiil sari fi dem, kaaz dem did komiin laik shiip we no av no shepad fi luk aafa dem. So im tiich dem nof sitn.

³⁵ Liet iina di iivnin im speshal falara dem go tu im an se tu im se, “Nobadi no liv out ya-so an it wel liet aredi.

³⁶ Sen we di piipl so dem kyan go a di dischrik an toun dem we nier ya-so, so dem kyan bai sitn fi nyam.”

³⁷ Jiizas ansa dem se, “Unu gi dem sitn fi nyam.” So dem se tu im se, &quot;It wuda tek iet mont wot a pie fi bai fuud fi fiid da kroud a piipl ya! We wi fi get dat de kaina moni?&quot;

³⁸ Den Jiizas aks dem se, “Umoch bred unu av? Gwaan go fain out.” So dem fain out an tel im se, “Wi av faiv bred an tuu fish.”

³⁹ Den Jiizas aada aal di piipl fi sidong pan di griin graas.

⁴⁰ So dem sidong iina som gruup, som gruup did av onjrid, som gruup a fifti.

⁴¹ Den Jiizas tek di faiv bred an tuu fish an luk op iina di skai, gi tangks an brok op di bred dem. Im gi im falara dem, an dem tek it gi di piipl dem. An im du di siem ting wid di fish dem.

⁴² Evribadi nyam til dem beli ful,

⁴³ an Jiizas falara dem pik op twelv baaskit ful-a fish an bred wa di piipl dem nyam an lef.

⁴⁴ An da die de a did bout faiv touzn man did nyam bred.

⁴⁵ Jiizas mek im speshal falara dem go iina di buot siem taim an go bak kraas Betsieda. Bot im tan wich paat im did de til im don sen we di piipl dem.

⁴⁶ Afta im tel di piipl ba-bai, im go op iina di mountn fi prie.

⁴⁷ Wen iivnin kom Jiizas did stil de we im did de, im wan, an di buot did iina di migl a di sii.

⁴⁸ Im kuda si se dem did a chogl aad fi ruo di buot kaaz di briiz did a bluo gens dem. Wen die did suun lait, Jiizas waak pan tap a di waata go out wich paat dem de, kaaz im did waahn paas dem.

⁴⁹ Wen dem si im a waak pan tap a di waata, dem did tingk a wan dopi. So dem baal out,

⁵⁰ kaaz aal a dem did si im an dem did kech dem fried. Bot im taak tu dem siem taim an se, “Unu tek aat! A mi, man. No bada fried.”

⁵¹ Den im go iina di buot wid dem, an di briiz tap. An dem did shak so til,

⁵² kaaz iivn duo dem did si di mirikl we Jiizas did du wid di fish an di bred, dem stil neva andastan di powa we im av, kaaz dem ed did tof.

⁵³ Afta Jiizas an im speshal falara dem kraas di liek, dem tap a wan plies niem Genesaret.

⁵⁴ Wen dem kom outa di buot, siem taim piipl si se a Jiizas.

⁵⁵ So dem ron aal uova di ieriya go fi di sik piipl dem an kyari dem pan dem chrecha go evriwe dem did ier se Jiizas did de.

⁵⁶ Evri dischrik ar konchrisaid, ar maakit plies we Jiizas go, di piipl dem kyari dem sik piipl tu im. Dem beg im fi jos mek dem toch di en a im kluoz, an evribadi we du dat get beta.