Read Jamaican Patois Maak 7 Bible Online

Maak 7 - Jamaican Patois bible

Maak 7

¹ Den som Farisii an som a di Laa tiicha dem we kom fram Jeruusilem gyada op roun Jiizas.

² An dem si se som a Jiizas falara dem nyam dem fuud an dem neva wash dem an.

³ Kaaz di Farisii dem, az a matarafak, aal a di Juu dem, no nyam til dem wash dem an kaaz dem did fala aad aad di wie ou dem faada faada dem yuus tu liv.

⁴ An wen dem komiin fram maakit dem no nyam notn til dem mek demself kliin azkaadn tu wa dem lorn fram dem faada faada dem. An dem kip nof ada uol taim sitn: dem wash kop, pat, kekl an dem siit we dem sidong pan wen dem a go nyam dem fuud.

⁵ Di Farisii dem an di Laa tiicha dem aks Jiizas se, “Mek yu falara dem no du wa wi faada faada dem tiich wi fi du — a nyam an no wash dem an?”

⁶ Jiizas ansa dem se, “Aizaiya di prafit did a taak chuut wen im rait bout unu uol ipokrit. Im rait se, “ ‘Aal dem set a piipl ya du a tek dem mout big mi op, bot iina dem aat dem no waahn av notn fi du wid mi.

⁷ An it no mek sens dem worship mi, wen dem a tiich man-mek ruul laik se dat a fi mi ruul, kaaz dem onggl a tiich di sitn dem wa man mek op laik se a Gad Laa.’

⁸ Unu eng aan tu unu uol taim sitn dem we kom fram unu faada faada dem, bot unu no pie no main tu wa Gad se unu fi du.”

⁹ An im se, “Unu tingk unu so sumaat dat unu ton unu bak pan we Gad se unu fi du an se it no mata, so dat unu kyan fala wa unu faada faada dem se unu fi du.

¹⁰ Kaaz Muoziz se, ‘Rispek unu faada an unu mada,’ an, ‘Enibadi we kos out an disrispek dem faada an mada, kil dem.’

¹¹ Bot unu se dat it aarait ef enibadi tel im faada ar mada se, ‘Di elp mi kuda gi unu mi don gi Gad aredi.’

¹² Da wie de unu tap im fram du wa im shuda du fi’im faada an im mada.

¹³ So unu yuuz di sitn dem we unu faada faada dem se, fi mek Gad wod komiin laik se it no miin notn. An unu du nof muo sitn laik dat.”

¹⁴ Den Jiizas kaal di kroud wan muo taim fi kom wich paat im did de an se tu dem se, “Aal a unu lisn mi, an andastan dis:

¹⁵ Notn we de outsaida sumadi kyaahn mek dem get doti, a wa kom outa dem mout mek dem doti.”

¹⁷ Afta Jiizas lef di kroud an go iina di ous, im falara dem aks im wa di tuori miin.

¹⁸ So im se tu dem se, “Unu miin se unu riili no get wa mi a se? Unu no nuo se notn wa nobadi iit kyaahn mek Gad rait dem aaf se dem doti?

¹⁹ Kaaz wa dem iit no go iina dem aat, it go iina dem tumok an den it go iina di tailit.” (Jiizas se dis fi shuo se aal fuud kliin.)

²⁰ So im se, “A di sitn dem wa kom outa sumadi mek dem doti an no kliin iina Gad yai.

²¹ Kaaz a insaida sumadi aat aal kain-a wikidnis we piipl tingk op kom fram. Piipl du aal kain-a seks sin, tiif, kil piipl,

²² sliip wid ada piipl we dem no marid tu, waahnti-waahnti, wikid, tel lai, no bizniz wid no laa an brok evri wan a dem, red yai, tek dem mout tier dong ada piipl, shuo aaf, an ful op a aal kain-a fuulinish.

²³ Aal a dem sitn de kom outa sumadi aat an mek dem doti an no kliin iina Gad yai.”

²⁴ Afta dat Jiizas lef an go a Taiya ieriya. Im go iina wan ous, an im neva waahn nobadi fi nuo se im de de, bot im kudn aid.

²⁵ Wan uman iina di ieriya did av wan likl gyal pikni we diiman did kanchuol. Siem taim shi ier bout Jiizas, shi go tu im an jrap arself a im fut.

²⁶ Di uman did taak Griik, an shi did bilang tu di Sairofoniisiyan chraib. Shi beg Jiizas fi ron out di diiman outa ar daata.

²⁷ Bot Jiizas ansa ar se, “Mek di pikni dem iit dem beli ful fos. Kaaz it no rait fi tek di pikni dem fuud an gi daag.”

²⁸ So shi ansa im se, “Laad dat a chuu, bot iivn di daag dem anda di tiebl nyam di kromz dem we jrap fram di pikni dem.”

²⁹ Den Jiizas se tu ar se, “Yu si siek-a wa yu se, yu kyan gwaan uom, di diiman gaan outa yu pikni.”

³⁰ Wen shi riich uom shi si ar pikni lai dong pan ar bed an di diiman gaan outa ar.

³¹ Afta dat Jiizas lef di Taiya ieriya an go chuu Saidan go a Liek Gyalalii iina di ieriya niem Dikyapolis.

³² Som piipl kyari wan man we did def an we kuda bieli taak tu Jiizas. Dem beg im fi jos toch im.

³³ Jiizas tek di man wan said, muuv im outa di kroud, put im fingga iina im iez, pit an den toch di man tong.

³⁴ Den im luk op iina di skai, gi out wan sai an se, “Ef - fata!” (Dat miin, “Uopm op!”).

³⁵ Siem taim di man iez uopm op an im tong luus op an im staat taak gud gud.

³⁶ Bot Jiizas aada di piipl dem no fi tel nobadi bout wa apm, bot dem kudn kip kwaiyat, dem pred it muo an muo.

³⁷ An aal uu ier did wel shak. Dem se, “Im du evriting gud! Im aal mek piipl we did def ier, an piipl we did dom taak.”