Read Jamaican Patois Maak 8 Bible Online

Maak 8 - Jamaican Patois bible

Maak 8

¹ Roun dem taim de wan neda big kroud did gyada op roun Jiizas. Dem neva av notn fi nyam, so Jiizas kaal im falara dem tugeda an se,

² “Mi sari fi dem piipl ya. A uol a chrii die nou dem de ya wid mi, an dem naa notn fi nyam.

³ Som a dem liv faar faar fram ya-so. Ef mi sen dem we onggri dem mait-a jrap dong a ruod.”

⁴ Jiizas falara dem se, “We paat nobadi fi get inof fuud iina dis ya dezot plies ya fi ful aal a dem piipl ya beli?”

⁵ Jiizas aks dem se, “Umoch bred unu av?” “Sevn,” dem se.

⁶ Jiizas tel di kroud a piipl fi sidong pan di grong. Afta dat im tek di sevn bred, gi tangks, an brok dem op gi im falara dem fi fiid di piipl dem.

⁷ Dem did av kopl sumaal fish tu. Jiizas tek dem, gi Gad tangks an gi im falara dem fi fiid di piipl dem.

⁸ Evribadi nyam til dem beli ful, an wen dem pik op wa did lef bak, it ful sevn baaskit.

⁹ A bout fuo touzn piipl did de de an afta dem don iit, Jiizas sen dem we.

¹⁰ Rait afta im du dat, im an im falara dem go iina wan buot an kraas go Dalmanyuuta.

¹¹ Di Farisii dem kom out an staat aagyu wid Jiizas. Dem did waahn fi tes im, so dem aks im fi wan sain fi pruuv se a Gad sen im.

¹² So Jiizas gi out wan evi evi sai an se, “Wa mek di piipl iina da taim ya aalwiez a luk fi wan sain? Mi a tel unu di chuut, unu naa go get no sain.”

¹³ Den im lef dem, go bak iina di buot, an go uova di ada saida di liek.

¹⁴ Nou Jiizas falara dem did onggl av wan bred iina di buot kaaz dem neva memba fi kyari som wid dem.

¹⁵ So Jiizas tel dem se, “Wach out! Gyaad unuself gens di Farisii dem an Erad yiis.”

¹⁶ So dem se tu wan aneda, “A chuu wi no av no bred mek im se dat.”

¹⁷ Jiizas nuo wa dem did a taak bout, so im aks dem se, “Wa mek unu a taak bout ou a chuu unu naa no bred? Unu stil no si an andastan? A aad unu aad fi lorn so?

¹⁸ Unu av yai, so ou unu kyaahn si? Unu av iez, so ou unu kyaahn ier? A memba unu no memba?

¹⁹ Wen mi did brok di faiv bred dem an fiid di faiv touzn piipl dem, umoch baaskit a nyam-an-lef unu did pik op afta dat?” Dem se, “Twelv.”

²⁰ “An wen mi did brok di sevn bred an fiid di fuo touzn piipl dem, umoch baaskit a nyam-an-lef unu did pik op?” Dem se, “Sevn.”

²¹ So Jiizas se tu dem se, “So a andastan unu stil no andastan?”

²² Jiizas an im falara dem riich a Betsieda. Som piipl kyari wan blain man tu Jiizas an beg im fi toch im.

²³ So Jiizas uol di man an an kyari im go outa di toun. Den im pit pan di man yai dem, put im an pan dem an aks di man se, “Yu kyan si notn?”

²⁴ Di man luk op an se, “Mi si piipl, bot dem luk laik chrii a waak roun.”

²⁵ So Jiizas put im an pan di man yai dem agen. Wen im uopm op im yai dem da taim de, im kuda si, an im si evriting gud gud.

²⁶ Jiizas tel im fi go a im yaad, im se, “No iivn go bak iina di toun.”

²⁷ Afta dat Jiizas an im falara dem go a wan toun niem Sesuriiya Filipai. Wen dem did de pan dem wie im aks dem se, “Uu piipl se mi bi?”

²⁸ Dem se, “Som se yu a Jan di Baptis, som se Ilaija, an som se yu a wan a di prafit dem.”

²⁹ Den Jiizas aks dem se, “Bot wa bout unu, uu unu tingk mi bi?” Piita ansa im se, “Yu a di Krais.”

³⁰ Den Jiizas waan dem no fi tel nobadi bout im.

³¹ Den Jiizas staat tel im falara dem se, “Di Man we Gad Pik a-go afi go chuu nof nof sofarieshan, an di elda dem, di ed priis dem, an di Laa tiicha dem a-go ton dem bak pan im, an dem a-go kil im. Bot chrii die afta dat, im a-go kom bak alaiv.”

³² Im mek dem andastan evriting we im did a tel dem. So Piita tek im wan said an staat ries im op fi se sitn laka dat.

³³ Bot Jiizas ton roun an luk pan im ada falara dem, den im taak aad aad tu Piita an se, “Gu we fram mi Sietan! Yu naa tingk bout di sitn dem we Gad waahn, a onggl wa piipl waahn de pan fi yu main!”

³⁴ Den Jiizas kaal di kroud a piipl an im falara dem an se tu dem se, “Ef sumadi waahn fi ton wan a mi falara dem, dem afi figet bout wa dem waahn, tek op dem kraas, an fala mi.

³⁵ Sumadi we waahn siev dem laif a-go luuz it, bot enibadi we luuz dem laif siek-a mi an kaaz dem tan op chrang fi di Gud Nyuuz, dem a-go siev dem laif.

³⁶ Kaaz wa gud it wuda du sumadi ef dem get evriting iina di worl bot dem luuz dem laif?

³⁷ An wa sumadi kyan gi fi get bak dem laif?

³⁸ Kaaz ef nobadi shiem a mi an fi mi mesij iina da worl ya we ful op a sin an piipl we ton dem main gens Gad, di Man we Gad Pik naa go av notn fi du wid dem wen im kom iina im Faada brait brait lait wid im uoli ienjel dem.”