Read Jamaican Patois Maak 9 Bible Online

Maak 9 - Jamaican Patois bible

Maak 9

¹ Den im se tu dem se, “Mi a tel unu dis, an a chuu mi a taak, som a unu we tan op ya-so naa go ded bifuo di taim kom wen unu si Gad a ruul iina wan powaful wie.”

² Afta siks die Jiizas tek Piita, Jiemz an Jan wid im an di fuo a dem wan go pan wan ai mountn. Aal av a sodn Jiizas staat fi chienj rait infronta dem,

³ im kluoz ton wait laka lait. It did wel wait. No bliich iina di worl kudn bliich dem wait so.

⁴ Den dem si Ilaija an Muoziz kom tan op infronta im an a taak tu im.

⁵ So Piita se tu Jiizas se, “Tiicha, a gud ting se wi did de ya. Mek wi bil op chrii shed no — wan fi yu, wan fi Muoziz an wan fi Ilaija.”

⁶ (Kaaz dem did so fraitn, im neva nuo wa fi se).

⁷ Den wan kloud kom dong kom kova dem op an dem ier sumadi vais iina di kloud se, “A fi mi Bwai Pikni dis. Unu fi lisn wa im se!”

⁸ Dem ton roun fi luk siem taim, bot wen dem luk dem no si nobadi, onggl dem an Jiizas wan.

⁹ An wen Jiizas an im falara dem did a kom dong di mountn, im gi dem aada se dem no fi se notn tu nobadi bout wa dem did si til afta di Man we Gad Pik ded an kom bak alaiv.

¹⁰ So dem kip it tu demself an taak bout it mongks dem wan aneda an a wanda wa im miin wen im se, “Wen im ded an kom bak alaiv?”

¹¹ Den dem aks im se, “Wa mek di Laa tiicha dem se dat Ilaija mos kom bak fos, bifuo di wan we Gad sen fi siev piipl kom?”

¹² Jiizas ansa dem se, “Ilaija kom fi chuu fi get evriting pan chrak. Bot wa mek unu tingk it rait dong se di Man we Gad Pik gweehn afi go chuu nof sofarieshan an piipl a-go chriit im laik se im a no nobadi?

¹³ Bot mi a tel unu, Ilaija kom aredi, an som piipl du im aal wa dem did waahn fi du im, jos laik ou it rait dong se dem wuda du im.”

¹⁴ Wen Jiizas an im chrii falara dem riich pan di flat, dem si wan big kroud a piipl gyada op roun di ada falara dem, an di Laa tiicha dem did a aagyu wid dem.

¹⁵ Wen di piipl si Jiizas, dem did shak, so dem ron go miit im siem taim.

¹⁶ So im aks dem se, “A wa unu an dem a aagyu bout?”

¹⁷ Wan man iina di kroud ansa se, “Tiicha, mi bring mi bwai pikni tu yu we av wan diiman iina im we mek im dom.

¹⁸ Enitaim di diiman tek kanchuol a im, it mek im fling dong imself a grong, im mout fraat op fraat op, im grain im tiit an tifn op imself. Mi beg yu falara dem fi ron out di spirit, bot dem kudn dwi’it.”

¹⁹ Jiizas se tu dem se, “Unu piipl iina da taim ya! Unu no biliiv! Umoch langga mi afi tan ya wid unu? Umoch langga mi afi put op wid unu? Kyari di bwai kom tu mi.”

²⁰ So dem kyari di bwai tu im. Wen di diiman si Jiizas, im mek di bwai staat shiek aad aad siem taim. Im jrap a grong, staat ruol bout, an im mout staat fraat op fraat op.

²¹ So Jiizas aks di bwai faada, “Ou lang sins im a sofa so?” Im se, “Fram im a likl pikni sa.

²² Uol iip a taim di diiman fling im iina faiya an iina waata fi kil im. Bot ef yu kyan du notn fi’im, tek piti pan wi an elp wi, du.”

²³ Jiizas ansa im se, “ ‘Ef yu kyan du notn fi’im?’ Ef yu biliiv eniting kyan apm.”

²⁴ Siem taim di bwai faada baal out, “Mi biliiv, elp mi fi biliiv muo!”

²⁵ Wen Jiizas si se wan kroud a piipl staat gyada op faas faas, im chat tu di diiman chrang chrang an tel im se, “Yu spirit we mek di bwai kyaahn taak ar ier, mi a tel yu, kom outa im an neva go iina im agen!”

²⁶ Di spirit baal out an shiek di bwai aad aad an kom outa im. Afta im kom out di bwai luk laik wan ded man an nof a di piipl dem se, “Im ded!”

²⁷ Bot Jiizas tek taim uol im an an elp im op, an im tan op.

²⁸ Afta Jiizas go iina di ous, im falara dem aks im se, “Wa mek wi kudn ron out di diiman?”

²⁹ Jiizas ansa dem se, “Ef unu no prie, unu kyaahn ron out dem de kain-a diiman de.”

³⁰ Jiizas an im falara dem lef an paas chuu Gyalalii. Im neva waahn nobadi fi nuo we dem de,

³¹ kaaz im did a tiich im falara dem. Im tel dem se, “Sumadi a-go sel out Di Man we Gad Pik an gi im uova tu piipl we iet im. Dem a-go kil im, bot chrii die afta dat, im a-go kom bak alaiv.”

³² Bot dem neva andastan wa im did miin, an dem did fried fi aks im.

³³ Afta Jiizas an im falara dem riich a Kyaporniyom an go iina di ous im aks dem se, “Wa unu did a taak bout wen unu did a waak?”

³⁴ Bot dem no se notn, kaaz dem did a aagyu bout wich wan a dem a-go get di tap-a-tap pozishan iina di gruup.

³⁵ Afta Jiizas sidong, im kaal im twelv falara dem an se, “Ef non a unu waahn di tap-a-tap pozishan, unu afi sekl fi laas plies an sorv evribadi.”

³⁶ Den im tek wan likl pikni an mek im tan op mongks dem. Im og op di pikni an se tu dem se,

³⁷ “Enibadi we tek iin wan a dem likl pikni ya kaaz im biliiv iina mi tek mi iin tu an enibadi we tek mi iin, a no jos mi dem a tek iin, dem a tek iin di wan we sen mi tu.”

³⁸ Jan se tu Jiizas se, “Tiicha, wi si wan man a yuuz yu niem ron out diiman outa piipl an wi chrai fi tap im kaaz im no bilang tu wi gruup.”

³⁹ Bot Jiizas se tu dem se, “No tap im, kaaz nobadi we yuuz fi mi niem fi wok mirikl kyaahn jos ton roun di neks minit an chat bad bout mi.

⁴⁰ Kaaz enibadi we naa fait gens wi de pan fi wi said.

⁴¹ Mi a tel unu dis, an mi naa lai, enibadi we gi unu wan kop a waata kaaz unu bilang tu mi, boun fi get wa dem fi get.

⁴² “Ef nobadi mek wan a dem likl pikni ya we biliiv iina mi sin, it wuda beta fi dem ef sumadi tai wan big big rakstuon roun dem nek an fling dem iina di sii.

⁴³ So ef unu an mek unu sin, chap it aaf. Kaaz it wuda beta fi unu kripl an liv fi eva wid Gad dan fi av tuu an an get fling dong iina el faiya we kyaahn out!

⁴⁵ Ef unu fut mek unu sin, chap it aaf. Kaaz it wuda beta fi unu ef unu kyaahn waak an liv fi eva wid Gad dan fi av tuu fut an get fling dong a el.

⁴⁷ Ef unu yai kaaz unu fi sin, juk it out. Kaaz unu wuda beta aaf ef unu go iina Gad kindom wid onggl wan yai dan fi av tuu yai an get fling dong a el,

⁴⁸ we “ ‘Di worm dem we a nyam dem kyaahn ded an di faiya we a bon dem kyaahn out.’

⁴⁹ Bot faiya a-go bon an kliin op evribadi.

⁵⁰ “Saalt gud, bot ef di ties gaan, ou yu a-go mek it ties laik saalt agen? Mek di Gud Nyuuz komiin laik saalt mongks unu an kaaz unu fi liv iina piis wid wan aneda.”