Read Jamaican Patois Luuk 1 Bible Online

Luuk 1 - Jamaican Patois bible

Luuk 1

¹ Tiyafilas Sa, Uol iip a piipl chrai fi rait dong di sitn dem wa apm mongks wi.

² Dem rait it dong siem wie ou dem ier it fram di piipl dem we did de de fram di staat, si di sitn dem wa apm an we priich di wod.

³ Anarebl Tiyafilas, mi stodi evriting fram di staat an mek op mi main fi rait an tel yu wa apm,

⁴ so yu wi nuo se wa yu ier a chuu sitn.

⁵ Wen taim Erad a did King iina Judiya, wan priis did de de niem Zakaraiya. Im did bilang tu di Abija gruup a priis dem, an im waif Ilizibet a did wan a Ieran fambili.

⁶ Gad si se di tuu a dem a did gud sumadi. Kaaz dem liv ou im waahn dem fi liv, dem du aal a wa im tel dem fi du an nobadi kudn paint no fingga pan dem.

⁷ Bot dem neva av no pikni, kaaz Ilizibet kudn av non. Plos di tuu a dem did wel uol.

⁸ Wan die, Zakaraiya did a du priis wok iina Gad ous, kaaz fi im gruup a priis did de pan dyuuti.

⁹ Iina dem die de di priis dem yuus tu kom tugeda an jraa niem fi si wich wan a dem fi go bon insens iina Gad ous. Dis ya taim ya a Zakaraiya niem get pik.

¹⁰ Wen a did taim an Zakaraiya go iina Gad ous, di piipl dem we did gyada outa duor did a prie.

¹¹ Wan a di Laad ienjel dem kom tu Zakaraiya an tan op pan di rait-an-said a di insens alta.

¹² Wen Zakaraiya si im, im fraitn so til.

¹³ Di ienjel tel im se, “No fried! Gad ier yu prieya. Ilizibet a-go av wan pikni fi yu, an yu fi kaal im Jan.

¹⁴ Im a-go mek yu wel api, an nof piipl a-go glad wen im baan.

¹⁵ Yu bwai pikni a-go speshal iina Gad yai. Im no fi jringk no wain ar no ada chrang jringk. Di Uoli Spirit a-go kanchuol im fram im iina im mada beli.

¹⁶ Im a-go bring bak uol iip a Izrel piipl tu di Laad, we a dem Gad.

¹⁷ Im a-go go bifuo Gad, wid di siem Spirit an powa laik wa Ilaija did av. Im aal a-go mek faada kom bak kom lov dem pikni. An di piipl dem we neva did a ier Gad, a-go staat tingk laik gud sumadi an du wa rait. An da wie de im a-go mek piipl redi fi di Laad.”

¹⁸ Zakaraiya go aks di ienjel, “Ou mi a-go nuo se a chuu sitn yu a taak? Mi a wan uol man, an mi waif no yong niida.”

¹⁹ Di ienjel tel im se, “Mi a Giebrel. Mi tan op bifuo Gad an im sen mi fi taak tu yu an fi tel yu di gud nyuuz.

²⁰ Bot chuu yu no biliiv mi, yu naa go kyan taak til wa mi tel yu bout apm.”

²¹ Siem taim dis a gwaan, di piipl outa duor did a wanda wa mek im a tek so lang fi kom outa Gad ous.

²² Zakaraiya kom out bot im kudn tel dem notn. Dem nuo se im si wan vijan iina Gad ous, kaaz dem si se im kudn taak an onggl a mek sain tu dem.

²³ Wen Zakaraiya don du im priis wok iina Gad ous, im go baka im yaad.

²⁴ Afta dat im waif get biebi, so shi tan a ar yaad fi faiv mont.

²⁵ Shi se, “Di Laad du dis fi mi. Dem die ya, Gad shuo mi gud fies, so mi na’afi shiem wen mi de mongks ada piipl agen.”

²⁶ Wen Ilizibet did av biebi iina beli fi siks mont, Gad sen ienjel Giebrel go a wan toun iina Gyalalii niem Nazaret,

²⁷ fi kyari wan mesij go gi wan yong uman niem Mieri we neva sliip wid no man yet. Mieri did ingiej fi marid Juozif, we kom fram di siem fambili we King Dievid did bilang tu.

²⁸ Di ienjel go tu Mieri an se tu ar se, “Mieri, mi av nyuuz we a-go mek yu wel api. Gad riili riili bles yu an im a waak wid yu aal di taim.”

²⁹ Wa Giebrel se kanfyuuz Mieri an shi staat fi wanda wa im miin.

³⁰ So di ienjel se tu ar se, “No fried Mieri, kaaz Gad riili riili bles yu.

³¹ Yu a-go get biebi, wan bwai pikni, an yu fi kaal im Jiizas.

³² Im a-go ton wan griet man an dem a-go se im a di pikni fi di Muos Ai Gad. Di Laad Gad gweehn gi im di chuon wa im faada Dievid did av.

³³ An im aalwiez a-go ruul uova Jiekob piipl, Izrel; an im a-go ruul fi eva an eva.”

³⁴ Mieri aks di ienjel se, “Ou mi fi av biebi wen mi neva eva go a bed wid no man?”

³⁵ Di ienjel ansa ar se, “Di Uoli Spirit a-go kom tu yu an di powa a di Muos Ai a-go toch yu. Im a-go bi Gad uoli pikni.

³⁶ Yu si yu fambili Ilizibet? Piipl tingk se shi kudn av pikni bot shi a-go av pikni iina ar uol iej. A siks mont nou shi av biebi iina beli.

³⁷ Notn no de wa Gad kyaahn du.”

³⁸ Mieri se, “Mi de ya fi sorv di Laad. So mek it apm ou yu se it a-go go.” Den di ienjel go we lef Mieri.

³⁹ Mieri get redi an mikies go a wan toun iina di ili paat a Juuda.

⁴⁰ Wen shi riich, shi go a Zakaraiya ous an go iin go tel Ilizibet oudi.

⁴¹ Az Ilizibet ier Mieri se oudi so, di biebi iina ar beli jomp. An di Uoli Spirit tek kanchuol a Ilizibet

⁴² an shi baal out loud loud, “Yu bles muo dan aal ada uman an di pikni iina yu beli bles tu.

⁴³ Ou mi bles so, dat di mada a mi Laad kom luk fi mi?

⁴⁴ Az yu taak so, braps! mi biebi jomp iina mi beli kaaz im api.

⁴⁵ Yu bles kaaz yu biliiv wa di Laad se a-go apm.”

⁴⁶ Mieri se: “Mi priez di Laad wid aal mi aat,

⁴⁷ mi suol priez Gad we siev mi;

⁴⁸ kaaz im si an memba mi im puo sorvant. Fram nou aan, evri jinarieshan a-go se mi a Gad-bles uman,

⁴⁹ kaaz di Muos Powaful Gad du da mirikl ya fi mi — im uoli!

⁵⁰ Gad gud kyaahn don, an kain tu evribadi iina evri jinarieshan we rispek an priez im.

⁵¹ Im tek im an du som powaful sitn; im skyata skyata buosi piipl.

⁵² Gad aal dong ruula aafa dem ai chuon an lif op piipl we nobadi neva tingk se mata.

⁵³ Im gi onggri piipl uol iip a gud sitn, bot rich piipl im sen we wid dem tuu lang an.

⁵⁴ Gad elp im sorvant dem, Izrel. Im memba fi bi gud an kain tu dem

⁵⁵ jos laik ou im did pramis Iebriyam an im pikni dem, fi bi gud an kain tu dem fi eva.”

⁵⁶ Mieri tan wid Ilizibet bout chrii mont an den go baka ar yaad.

⁵⁷ Wen a taim fi Ilizibet av ar biebi, shi did av wan bwai.

⁵⁸ Ilizibet nieba an fambili dem ier ou di Laad did gud tu ar an dem glad fi ar.

⁵⁹ Wen Jan kech iet die uol, dem kyari im go a Gad ous fi sorkomsaiz im. Dem nieba an fambili did waahn niem im afta im faada, Zakaraiya, bot

⁶⁰ im mada se, “Nuo! A Jan im fi niem.”

⁶¹ Dem se, “Afta non a yu fambili dem no niem so?”

⁶² Den dem mek sain tu im faada fi fain out wa niem im waahn gi im pikni.

⁶³ So Zakaraiya aks fi wan sliet fi rait pan. Dem shak wen im rait se, “A Jan im niem.”

⁶⁴ Siem taim Zakaraiya mout uopm op an im tong luus op, an im staat fi priez Gad.

⁶⁵ Di nieba dem kudn biliiv we did a gwaan, an di nyuuz bout wa apm pred aal uova di ili paat a Judiya.

⁶⁶ Dem did si se di Laad powa de pan im so evribadi we ier bout it wanda an aks, “A wa da pikni ya a-go ton out tu?”

⁶⁷ Di Uoli Spirit tek kanchuol a Jan faada so im staat fi se:

⁶⁸ “Priez di Laad, Izrel Gad, kaaz im kom an frii im piipl.

⁶⁹ Im sen wan powaful sumadi fi siev wi. Da powaful sumadi ya kom fram di fambili a Gad sorvant Dievid.

⁷⁰ Jos laik ou im did taak chuu im uoli prafit dem wie bak wen an se:

⁷¹ im a-go siev wi fram wi enimi dem an fram di wan dem we iet wi an av powa fi ort wi.

⁷² Im se im wuda gud tu wi faada faada dem an im memba im uoli pramis;

⁷³ Di pramis im mek tu wi faada Iebriyam,

⁷⁴ fi siev wi fram dem we iet wi. So wi kyan du we im waahn wi fi du an no fried;

⁷⁵ So wi kyan liv wan gud an kliin laif til wi ded.

⁷⁶ Mi pikni Jan, piipl a-go kaal yu wan prafit fi di Muos Ai, kaaz yu a-go gwaan bifuo im til im kom an get im piipl redi fi’im;

⁷⁷ Yu a-go mek Gad piipl nuo se di Laad a kom fi siev dem; Im a-go paadn dem so dem kyan get siev.

⁷⁸ Siek-a ou Gad gud an kain tu wi, di maanin son a-go shain dong pan wi.

⁷⁹ It a-go shain pan di wan dem we a liv iina di daak an we fried fi ded. An im a-go shuo wi ou fi liv iina piis.”

⁸⁰ Di pikni gruo op an get chrang iina spirit, an im did liv iina di dezot til di die im shuo imself tu Izrel.