Read Jamaican Patois Luuk 10 Bible Online

Luuk 10 - Jamaican Patois bible

Luuk 10

¹ Afta dis, di Laad pik sevnti-tuu a im ada falara dem an sen dem out tuu tuu, fi go evriwe im plan fi go.

² Im se tu dem se, “Nof fuud de out de iina di fiil fi pik, bot nof piipl no de de fi gyada dem. Aks di Laad we uon di fuud fi sen out piipl fi pik dem.

³ Mi a sen unu go out bot unu a-go komiin laik biebi shiip we de mongks wulf. Gwaan!

⁴ No kyari no moni, no pak no bag, no waak wid no ada slipaz an wen unu de pan unu wie no tel nobadi oudi.

⁵ “Wen taim unu go a nobadi yaad, di fos ting unu fi du a se, ‘Gad, mek yu piis kom dong pan da yaad ya.’

⁶ Ef di ed a di ous lov piis, di piis we unu kaal dong wi tan wid im, bot ef im no lov piis, di piis we unu kaal dong naa go tan wid im.

⁷ Di man we lov piis an tek unu iin, a fi’im yaad unu fi tan. Nyam an jringk wa dem gi unu, kaaz ef sumadi wok dem fi get pie. Unu fi tan a wan yaad an no muuv fram yaad tu yaad.

⁸ “Enitaim unu go iina wan toun an di piipl dem tek unu iin, nyam we dem gi unu.

⁹ Kyuor di wan dem we sik an se tu dem, ‘Gad kindom kom wich paat unu de.’

¹⁰ Bot ef unu go iina wan toun an dem no waahn tek unu iin, go iina di ruod an tel dem dis,

¹¹ ‘Wi a waip aaf di dos aafa wi fut fi shuo unu se Gad no api wid unu — im a-go joj unu. Bot memba se Gad kindom kom wich paat unu de.’

¹² Mi a tel unu dis, wen jojment die kom, it a-go iiziya fi Sadam dan fi di piipl dem iina dat de toun.

¹³ “Chobl fi yu, Korazin! Chobl fi yu Betsieda! Ef di piipl we liv iina Taiya an Saidan did si di mirikl dem we unu si mi du mongks unu, dem wuda sari fi dem rang an chienj dem wiez lang taim. Dem wuda sidong iina ashiz an wier krokos bag fi shuo se dem miin it.

¹⁴ It a-go iiziya fi Taiya an Saidan pan jojment die dan fi unu.

¹⁵ Aal laka yu Kyaporniyom, yu tingk se Gad a-go lif yu op go a evn an ana yu? Nuo, im a-go fling yu dong a el.”

¹⁶ Fi don we im a se, Jiizas se tu im sevnti-tuu falara dem, “Enibadi we lisn tu unu lisn tu mi. Enibadi we ton dem bak pan unu, ton dem bak pan mi. Dem we ton dem bak pan mi ton dem bak pan di wan we sen mi.”

¹⁷ Di sevnti-tuu falara dem kom bak glad an dem se, “Laad, wen wi yuuz yu niem, aal di diiman dem du wa wi tel dem fi du.”

¹⁸ Jiizas tel dem se, “Mi did si Sietan jrap outa evn laik ou laitnin flash iina di skai.

¹⁹ Mi gi unu di powa fi waak pan siniek an skaapiyan. Mi gi unu powa, muor powa dan we di enimi av. Notn bad kyaahn du unu.

²⁰ No bada glad se diiman du we unu tel dem fi du. Wa unu fi glad bout a se unu niem rait dong iina evn.”

²¹ Dat de taim, di Uoli Spirit kaaz Jiizas fi get api an im se, “Faada, yu ron evriting iina evn an pan ort, mi priez yu. Mi priez yu kaaz yu a shuo dem sitn ya tu likl pikni bot yu aid dem fram piipl we tingk se dem brait an av nof sens. Yes Faada, a dat yu did waahn fi apm.

²² “Mi Faada gi mi evriting. A onggl di Faada wan riili nuo di Bwai Pikni. An nobadi no riili nuo di Faada, onggl di Bwai Pikni wan an enibadi els we di pikni waahn fi mek nuo di Faada.”

²³ Jiizas kyari im speshal falara dem wan said an se tu dem se, “Gad bles di piipl dem we si we unu si.

²⁴ Kaaz mi a tel unu se a nof a Gad prafit dem an uol iip a king did waahn fi si wa unu si, an ier wa unu ier, bot dem neehn si ar ier it.”

²⁵ Wan Laa tiicha tan op fi tes Jiizas. “Tiicha,” im aks, “Wa mi fi du fi liv fi eva?”

²⁶ Jiizas aks im, “Wa di Laa se? Wa yu get fram it?”

²⁷ Di man se, “ ‘Yu fi lov di Laad we a fi yu Gad. Yu fi lov im wid aal a yu aat, lov im wid di uol a yu suol, lov im wid aal a yu chrent an wid di uol a yu main,’ an, ‘yu fi lov yu nieba siem laik ou yu lov yuself.’”

²⁸ Jiizas se tu im se, “Yu ansa rait. Du dat an yu wi liv.”

²⁹ Fi mek imself fiil gud di man aks Jiizas wan neks kwestiyan, “So, a uu a mi nieba?”

³⁰ Jiizas ansa im se, “Wan man lef Jeruusilem an did a go a Jeriko. Pan di wie som tiif uol im op. Dem tek we aal we im av, biit im nieli kil im an lef im de fi ded.

³¹ Wan priis did a go dong di siem ruod an wen im bok op pan di man, im kraas an go waak pan di neks said.

³² Wan man we elp tek kier a Gad ous kom a di siem plies an si di man, bot im kraas go waak pan di neks said tu.

³³ Bot wan man we kom fram Samieriya did a chravl pan di siem ruod. Wen im riich wich paat di man de an si im, im fiil sari fi im.

³⁴ So, im gu uova tu di man, chuo aliv ail an wain pan im kot dem an ban dem op. Den im put di man pan im uona dangki, kyari im go a wan ges ous an tek kier a im.

³⁵ Di neks maanin im gi di uona fi di ges ous tuu silva kain, an se, ‘Tek kier a im, an wen mi kom bak, mi wi gi yu bak eni moni we yu spen fi luk aafa im.’ ”

³⁶ Den Jiizas aks di Laa tiicha se, “Yu si di man we di tiif dem biit op, wich wan a di chrii piipl dem yu tingk a did im nieba?”

³⁷ Im se, “Di wan we did elp im.” So Jiizas se, “Gwaan go du di siem ting.”

³⁸ Wen Jiizas an im speshal falara dem did a chravl go a Jeruusilem, dem waak chuu wan dischrik we wan uman niem Maata did liv. Wen Maata si dem, shi tek dem iina ar ous.

³⁹ Nou, Maata did av wan sista niem Mieri. Fram Jiizas riich a di ous, Mieri go sidong a im fut an no muuv. Shi sidong a lisn aal we im av fi se.

⁴⁰ Bot Maata, shi did a ron roun a du aal we shi niid fi du fi mek ar ges dem aarait. Shi go tu Jiizas an aks im se, “Laad, yu no si ou mi sista lef mi wan fi du aal a di wok? Yu no kier? Tel ar fi kom elp mi no!”

⁴¹ Di Laad ansa ar se, “Maata, Maata, yu a bada bada yuself bout uol iip a sitn,

⁴² bot a onggl wan sitn yu fi bada yuself bout. Mieri mek op ar main fi pik da wan de an nobadi naa go tap ar.”