Read Jamaican Patois Luuk 11 Bible Online

Luuk 11 - Jamaican Patois bible

Luuk 11

¹ Wan die Jiizas did de somwe a prie. Afta im don, wan a im speshal falara dem se tu im se, “Laad, shuo wi ou fi prie, laik ou Jan shuo fi im falara dem ou fi prie.”

² Jiizas tel dem se, “Wen unu prie, unu fi se: “ ‘Faada, mek piipl av nof rispek fi yu an yu niem, Mek di taim kom wen yu ruul iina evri wie.

³ Evridie gi wi di fuud we wi niid

⁴ Paadn wi fi aal a di rang we wi du, kaa wi paadn piipl we du wi rang tu. An no mek wi fies notn we wi kaaz wi fi sin.’ ”

⁵ Den Jiizas se tu dem se, “Supuoz wan a unu av wan fren, an unu go tu im iina migl nait an se, ‘Brejrin len mi chrii bred de,

⁶ kaaz wan a mi fren dem we a paas chuu di ieriya tap a mi yaad, an mi no av notn at aal fi’im nyam.’

⁷ “An wa ef im fren tan iina im ous an se, ‘No bada mi man. Mi duor lak aredi, an mi an mi pikni dem gaan a bed. Mi kyaahn get op an gi yu notn nou.’

⁸ Mi a tel unu, im naa get op jos kaaz di tuu a dem a fren, im wi get op an gi im evriting im aks fa kaaz im fren naa go tap nak.

⁹ “So, mi a tel unu. Aks fi wa unu waahn an unu wi get it, luk fi wa unu waahn an unu wi fain it; nak pan di duor an it wi uopm op.

¹⁰ Kaaz enibadi we aks wi get wa dem aks fa, di wan dem we luk wi fain wa dem a luk fa, an di duor wi uopm fi di wan dem we nak.

¹¹ “Wich wan a unu we a faada, wuda gi unu pikni wan siniek wen dem aks unu fi wan fish?

¹² Ar wich wan a unu wi gi unu pikni skaapiyan, wen dem aks fi eg?

¹³ Ef unu so wikid an stil nuo ou fi gi unu pikni nais sitn, unu no tingk se unu Faada op iina evn wi iivn muo dan redi fi gi di Uoli Spirit tu enibadi we aks im!”

¹⁴ Wan taim Jiizas did a ron wan diiman outa wan man. Nou, di man kudn taak kaaz di diiman did mek im dom. Afta Jiizas ron out di diiman, di man staat chat, an evribadi we si wa apm jaa jrap uopm.

¹⁵ Bot som a dem se, “A Belzibob, di diiman ruula, gi im powa fi ron out diiman.”

¹⁶ Som ada piipl iina di kroud did waahn fi tes Jiizas fi si ef a riili Gad sen im. So dem aks im fi wan sain fi pruuv se a Gad sen im.

¹⁷ Jiizas did nuo wa did de iina dem main, so im se tu dem se: “Wan kindom naa go laas ef di piipl dem we liv iina it a fait gens dem wan aneda, it a-go mash op. Eni fambili we a fait gens dem wan aneda mos mash op.

¹⁸ So, ef Sietan a fait gens imself, ou im kindom fi laas? Mi a aks unu dis sins unu se a Belzibob gi mi powa fi ron out diiman.

¹⁹ Nou, ef a Belzibob gi mi powa fi ron out diiman, den a uu gi fu’unu piipl powa fi ron dem out? Unu uona piipl a-go se unu rang bout mi.

²⁰ Bot ef a Gad gi mi powa fi ron out diiman, dat miin se Gad a ruul mongks unu aredi.

²¹ “Wen wan chrang man we av wepan, a gyaad im ous, evriting we im uon sief.

²² Bot ef sumadi we chrangga dan im atak im an win im, di chrangga wan a-go tek we di wepan dem wa di man did tingk se wuda kip im sief, an shier op shier op aal a wa im tek.

²³ “Enibadi we no de pan fi mi said, gens mi, an aal a uu naa elp mi gyada, a skyata.

²⁴ “Wen wan wikid spirit kom outa sumadi, it go chuu dezot, a luk plies fi res. Wen it no fain no we, it se, ‘Mi a ton bak go a di ous we mi lef.’

²⁵ Wen it kech bak, it fain se di ous swiip kliin an evriting niit an taidi.

²⁶ Di diiman si dat, an go fain sevn muor spirit we wosa dan im an di uol a dem go liv de. Iina di lang ron, di man a-go wosa aaf dan bifuo.”

²⁷ Siem taim Jiizas a taak, wan uman iina di kroud baal out, “Di uman we bring yu iina di worl an we tek kier a yu, riili bles.”

²⁸ Jiizas ansa ar an se, “Di piipl dem we ier Gad wod an du we it se, a dem riili bles.”

²⁹ Wen muor an muor piipl staat fi kroud roun Jiizas, im se, “Di piipl dem iina da taim ya, a wan wikid set a piipl. Dem aks fi wan sain we wuda pruuv se a Gad sen mi. Dem naa get non! Di onggl sain dem a-go get a sopm laik wa did apm wid Juona.

³⁰ Jos laik ou Juona did a wan sain fi di Ninive piipl dem, a siem so di Man we Gad Pik a-go bi wan sain fi di piipl dem iina da taim ya.

³¹ Di kwiin we kom fram Shiiba iina di sout, shi a-go kom bak alaiv wid di piipl dem fram da taim ya. Shi a-go shuo se dem rang, kaaz shi did kom fram faar faar jos fi ier di waiz sitn dem we Salaman did av fi se. Bot luk ya, sumadi we biga dan Salaman de rait ya-so.

³² Di piipl fram Ninive, a-go tan op pan jojment die wid di piipl dem fram da taim ya an shuo dem se dem rang. Kaaz wen Juona did waan di Ninive piipl, dem did sari fi we dem du an chienj dem wiez. Bot luk ya, sumadi we biga dan Juona de rait ya-so.

³³ “Nobadi no lait lamp an put it wich paat nobadi kyaahn si it ar kova it wid bokit. Lamp pudong we piipl kyan si di lait wen dem kom iin.

³⁴ Yu yai dem a laik lamp, a dem gi yu badi lait. Wen yu yai dem gud, yu uol badi ful-a lait. Ef dem bad, yu badi ful-a daaknis.

³⁵ Mek shuor di lait we iina yu a riili lait.

³⁶ Ef yu uol badi ful-a lait, an no paat a it no daak, it a-go lait op laik wen lamp lait a shain pan yu.”

³⁷ Afta Jiizas don taak, wan Farisii invait im a im yaad fi kom nyam wid im. So Jiizas go wid im an wen im riich im sidong a di tiebl.

³⁸ Di Farisii shak fi si se Jiizas no wash im an dem bifuo im staat iit (kaaz dis a sitn we di Farisii dem du kaaz dem tingk dat wi mek dem rait wid Gad).

³⁹ Di Laad se tu di Farisii, “Nou unu Farisii, unu wash di outsaida kop an pliet, bot iina unu aat, unu griidi an wikid.

⁴⁰ Di uol a unu a fuul! No di siem wan we mek di badi mek di aat tu?

⁴¹ Gi tu di puor an du it fram unu aat, an den dat wi shuo se evriwe kliin.

⁴² “Aal unu Farisii — Chobl fi unu, kaaz outa evri ten bongl a mint, tii bush an di sitn dem we unu gruo iina unu gyaadn, unu gi Gad wan. Bot stil unu no diil wid piipl fier an unu no lov Gad niida. Wa unu fi du a diil wid piipl fier, lov Gad an gi Gad di wan outa evri ten we unu av siem wie.

⁴³ “Unu Farisii — chobl fi unu! Kaaz unu lov fi sidong iina di bes siit iina di Juu dem choch. An unu lov wen piipl gi unu speshal oudi wen unu go a maakit.

⁴⁴ “Chobl fi unu, kaaz unu komiin laik griev wa piipl waak pan an no nuo se it de de, chuu dem no av no maak pan dem.”

⁴⁵ Wan Laa tiicha ansa Jiizas se, “Tiicha, wen yu se dem sitn ya, yu a disrispek wi tu.”

⁴⁶ Jiizas se, “Unu si aal unu we tiich di Laa — chobl fi unu! Kaaz unu pak op piipl wid luod we dem kyan bieli manij, an unu, unu no iivn lif wan fingga fi elp dem.

⁴⁷ “Chobl fi unu, kaaz unu bil tuum fi di prafit dem, an a di siem piipl we unu kom fram kil dem.

⁴⁸ Wen unu bil tuum fi di prafit dem we unu piipl dem kil, wa unu a se a dat unu piipl did rait.

⁴⁹ Siek-a dis, Gad we waiz iina evri wie se, ‘Mi wi sen prafit an apasl gi dem, bot dem wi kil som, an dem a-go mek som a dem sofa.’

⁵⁰ Di piipl dem fram da taim ya afi go ansa fi aal a di blod a di prafit dem we dem kil fram di worl staat;

⁵¹ fram Iebl go rait dong tu Zakaraiya we dem kil bitwiin di alta wich paat dem bon sakrifais iina Gad ous. Yes mi a tel unu, di piipl dem fram da taim ya afi go ansa fi aal a dem.

⁵² “Chobl fi unu we tiich di Laa, kaaz unu tek we di kii we uopm di wie fi piipl andastan an nuo Gad wod. Unu neva go iin an unu a tap ada piipl fram go iin tu.”

⁵³ Wen Jiizas lef de-so di Farisii an di Laa tiicha dem staat fi chriit im wikid. Dem aks im wan bag a chriki kwestiyan,

⁵⁴ so dem kuda kech im an yuuz wa im se gens im.