Read Jamaican Patois Luuk 12 Bible Online

Luuk 12 - Jamaican Patois bible

Luuk 12

¹ Wen touzn an touzn a piipl staat gyada gyada we Jiizas de, dem did so nof dem aal a tep op tep op pan dem wan aneda. Jiizas taak tu im speshal falara dem fos, im se, “Wach out fi di tuu mout Farisii dem.

² Notn no aid we wi naa go fain out bout, an no siikrit no de we naa go bos out.

³ Wa unu se iina di daak, piipl a-go ier iina die lait, an wa unu wispa tu unu wan aneda wen unu lak we, piipl a-go baal it out fram di ous tap.

⁴ “Mi fren, ier wa mi a se, no fried a uu kyan onggl kil di badi — dat a aal dem kyan du!

⁵ Mek mi tel unu uu unu fi fried a: fried a di wan we kyan kil di badi an av di powa fi fling unu suol dong a el tu. Yes mi a tel unu, a im unu fi fried a.

⁶ No onggl tuu peni faiv bod sel fa? Bot Gad no figet no iivn wan a dem.

⁷ Iivn di ier we de pan evri wan a unu ed im kount op an nuo umoch de de. So no bada fried kaaz tu Gad unu wot muo dan nof nof bod.

⁸ “Mi a tel unu se enibadi we mek piipl nuo se dem a fi mi falara, di Man we Gad Pik wi tel Gad ienjel dem se dem a fi’im.

⁹ Bot enibadi we tel ada piipl se dem no nuo mi an ou dem no mi falara, mi a-go du di sed ting tu dem infronta Gad Ienjel dem.

¹⁰ Yu si ef unu go se notn bad bout di Man we Gad Pik, unu kyan get paadn, bot enibadi we se wikid tingz gens di Uoli Spirit an kliem se a sumadi els du di wok we a di Uoli Spirit du — dem kyaahn get paadn.

¹¹ “Wen dem kyari unu bifuo di Juu dem choch, di ruula dem an di piipl dem we av uol iip a powa fi aal sen piipl go ded, no fret bout ou unu a-go difen unuself, ar wa unu fi se ar ou unu fi se it,

¹² kaaz di Uoli Spirit wi tel unu wa fi se wen da taim de kom.

¹³ Sumadi iina di kroud se tu Jiizas, “Tiicha, tel mi breda fi shier di ded-lef wid mi no.”

¹⁴ Jiizas ansa se, “Man, uu gi mi di rait fi sekl aagiment an shier ded-lef bitwiin di tuu a unu?”

¹⁵ Den im tel dem se, “Wach out! Unu fi gyaad gens aal kain-a red yai, kaaz laif no jos bout umoch sitn wi uon.”

¹⁶ An Jiizas tel dem da tuori ya: “Wan rich man did av wan faam we bier uol iip a fuud.

¹⁷ So di rich man se tu imself se, ‘Wa mi fi du? Mi no av no plies fi kip aal a dem sitn ya.’

¹⁸ “Den im se, ‘Mi nuo wa mi a-go du. Mi a-go tier dong mi stuor ous dem an bil som biga wan, an mi a-go kip mi grien an aal we mi uon iina dem.

¹⁹ An mi a-go se tu miself, maasa yu a wan loki man. Yu av nof sitn an dem a-go laas yu fi wan lang lang taim. Tek laif iizi, nyam, jringk an mek meri.’

²⁰ “Bot Gad tel im se, ‘Yu fuul! Tinait tinait, yu a-go ded. Uu a-go get wa yu put op fi yuself?’

²¹ “Dis a wa apm tu enibadi we siev op fi demself di sitn dem we de pan ort bot no rich iina di sitn dem we Gad kier bout.”

²² So Jiizas tel im speshal falara dem se: “No bada fret bout unu laif, a wori op unuself bout wa unu a-go iit, ar wa unu a-go wier.

²³ Kaaz laif muo impuotant dan fuud an di badi niid muo dan kluoz.

²⁴ Tingk bout di blak bod dem! Dem no plaant, dem no riip, an dem no av no stuor ous niida, bot Gad fiid dem! Unu wot uol iip muo tu Gad dan blak bod!

²⁵ Unu tingk se wen unu wori wori op unuself dat gweehn mek unu liv iivn wan owa langga dan unu fi liv?

²⁶ So ef unu kyaahn du da wan likl sitn ya, wa unu a wori unuself bout di res dem fa?

²⁷ “Tingk bout ou di lili dem gruo. Dem no du no wok an dem no mek dem kluoz, bot Salaman wid aal a im fansi sitn dem no nais laik wan a dem lili ya.

²⁸ Ef dat a ou Gad jres op wail graas, wa de ya tide, an dash iina faiya tumaro, den im naa go mek shuor se unu av kluoz fi wier tu? Luk pan unu, wat a likl bit a chos unu put iina Gad!

²⁹ No kip aan a fret bout wa unu fi nyam ar jringk; no wori op unuself bout dat.

³⁰ Di piipl dem we a no Juu ron aafa dem de sitn de. Unu Faada nuo se unu kyaahn du widout dem.

³¹ Wa unu fi du a put unu main pan Gad kindom an wa im waahn unu fi du, an unu wi get aal a dem sitn de.

³² “So, unu we a fala mi, no bada fried. Unu Faada api fi gi unu im kindom.

³³ Sel wa unu av an elp di puor so unu kyan get moni we kyaahn ron out an stuor op aal kain-a gud sitn fi unuself iina evn. Wa de op de-so no tiif kyaahn kom tek an no mat kyaahn kom nyam nyam op.

³⁴ Kaaz eniwe unu put di sitn dem we wot nof tu unu a de-so unu aat a-go de.”

³⁵ “Fiks op unu kluoz so unu redi fi wok an kip unu lamp a bon tu,

³⁶ jos laik sorvant we a wiet fi dem maasta fi kom bak fram wan wedn, so az im kom nak so, dem kyan uopm op di duor siem taim fi’im.

³⁷ It a-go gud fi di sorvant dem uufa maasta fain dem bizi a wiet fi’im kom bak. Mi a tel unu dis, di maasta imself a-go put aan im wok kluoz, mek dem sidong a di tiebl, an im wi sorv dem.

³⁸ It wuda wok out gud fi di sorvant dem uufa maasta kom weda liet a nait ar orli orli maanin an kom kech dem bizi a wiet fi’im.

³⁹ Bot andastan dis! Ef di uona fi di ous did nuo di taim wen di tiif a kom, im wudn mek di tiif brok iina im ous.

⁴⁰ A siem so unu mos redi, kaaz di Man we Gad Pik naa go kom wen unu tingk im a-go kom.”

⁴¹ Piita aks, “Laad a wi wan yu a tel dis, ar a evribadi?”

⁴² Di Laad ansa im se, “Uu a di manija we di maasta kyan chos an dipen pan? A dat de wan im a-go put inchaaj a im sorvant dem, fi gi dem fi dem shier a di fuud wen di rait taim kom.

⁴³ It a-go gud fi da sorvant de ef im maasta kom fain im a du wa im fi du.

⁴⁴ Mi tel unu dis, an a chuu mi a taak, di maasta a-go put im inchaaj a evriting im uon.

⁴⁵ Supuoz di sorvant se tu imself se, ‘Mi maasta a tek wan lang taim fi kom bak,’ an so im staat biit di ada sorvant dem an iit, jringk an get jongk.

⁴⁶ Bot di maasta a-go kom bak wan die wen di sorvant naa luk fi im, an wan taim wen di sorvant naa chek se im wuda riich bak. Di maasta a-go chap im iina tuu an fling im out mongks di wan dem we no lisn ar fala wa im, di maasta, se.

⁴⁷ “Di sorvant we nuo wa im maasta waahn im fi du, an no get tingz redi ar no du wa im maasta waahn a-go get som big lik.

⁴⁸ Di wan we no nuo se im a du sitn rang jos a-go get wan wan lik. Evribadi we get uol iip, afi go gi uol iip. Enibadi we di maasta chos an lef inchaaj a uol iip a sitn, afi go ansa fi uol iip.”

⁴⁹ “Mi kom fi set faiya pan di ort, an bwai mi wish it did lait aredi.

⁵⁰ Bot mi afi go chuu som siiros sofarieshan, an mi aat evi til it don!

⁵¹ Yu tingk mi kom fi bring piis pan ort? Nuo sa, a separieshan.

⁵² Fram nou aan ef faiv piipl de iina wan fambili, dem a-go fait gens dem wan aneda, chrii gens tuu an tuu gens chrii.

⁵³ Dem a-go fait gens dem wan aneda, faada gens im bwai pikni an bwai pikni gens im faada, mada gens daata an daata gens mada, mada-in-laa gens daata-in-laa an daata-in-laa gens mada-in-laa.”

⁵⁴ Jiizas tel di kroud se, “Az unu si kloud a kom kraas fram di wes, unu se, ‘Rien a-go faal,’ an di rien faal fi chuu.

⁵⁵ Enitaim di sout briiz a bluo, unu se, ‘It a-go at,’ an it at.

⁵⁶ “Ipokrit! Unu kyan tel di weda wen unu luk pan wa gwaan roun unu an wen unu luk op iina di skai bot ou kom unu kyaahn andastan wa a gwaan iina dis ya taim ya?

⁵⁷ “Wa mek unu no joj fi unuself wa rait?

⁵⁸ Enitaim yu a go a kuot wid sumadi, chrai sekl unu aagiment pan di wie, ar di sumadi mait-a jrag yu infronta di joj, an di joj an yu uova tu di poliis an di poliis go lak yu op iina prizn.

⁵⁹ Mi tel yu dis, yu naa go kyan kom out til yu pie op evri laas sent.”