Read Jamaican Patois Luuk 13 Bible Online

Luuk 13 - Jamaican Patois bible

Luuk 13

¹ Bout di siem taim, som piipl did de de we tel Jiizas bout ou Pailat tek di Gyalaliiyan dem blod an mek it miks op wid di blod a di animal dem we dem did kil fi bon sakrifais.

² Jiizas se tu dem se, “Unu tingk se dem de Gyalaliiyan de did wosa dan aal a di ada Gyalaliiyan dem, mek dem sofa so?

³ Nuo! Mi tel unu, bot ef unu no sari fi di rang we unu du an chienj unu wiez, unu a-go ded siem wie laka dem.

⁴ Di ietiin we ded wen di towa iina Sailuom jrap pan dem, unu tingk se dem did wosa dan di res a piipl we liv iina Jeruusilem?

⁵ Nuo, mi tel unu! Bot ef unu no sari fi di rang we unu du an chienj unu wiez, unu a-go ded siem wie laka dem.”

⁶ Den Jiizas tel dem da tuori ya, “Wan man av wan prangganat chrii plaant iina im gyaadn, an im go fi si ef fruut de pan it, bot im no fain non.

⁷ So im se tu im gyaadna se, ‘Fi chrii ier nou mi a kom luk fi prangganat pan da chrii ya, an no fain non. Chap it dong! Wa mek it fi a wies gud dot?’

⁸ “ ‘Sa,’ di man se, ‘lef it fi wan muo ier, an mi wi dig roun it an put manyuor de.

⁹ It mait-a bier neks ier! Ef it no bier, den yu kyan chap it dong.’ ”

¹⁰ Wan Sabat die, Jiizas did a tiich iina wan a di Juu dem choch,

¹¹ an wan uman did de de we wan diiman kaaz fi kripl fi ietiin ier. Ar bak did ben an shi kudn chrietn op.

¹² Wen Jiizas si ar, im kaal ar an se, “Uman, yu beta nou.”

¹³ Im put im an pan ar, an siem taim shi tan op chriet chriet an priez Gad.

¹⁴ Di ed man fi di Juu dem choch did beks kyaahn don, kaaz Jiizas get ar beta pan di Sabat. So im se tu di piipl dem, “Siks die de iina di wiik fi wok. Kom get beta pan wan a dem de die de, no dwi’it pan di Sabat!”

¹⁵ Di Laad tel im se, “Unu tuu-fies! Unu no luus unu kou ar dangki fram di staal an liid dem out fi waata pan di Sabat?

¹⁶ Den dis uman, wan a Iebriyam gyal pikni, we Sietan bain op fi ietiin lang lang ier, so wa, shi no fi get frii pan di Sabat tu?”

¹⁷ Wen Jiizas se dis, aal a dem we gens im shiem, bot di res a piipl dem did api bout di gud gud sitn dem we im did a du.

¹⁸ Jiizas aks dem se, “Ou Gad kindom tan? Wa it komiin laik?

¹⁹ It komiin laik wan likl likl siid, we wan man plaant iina im gyaadn. It gruo an aal ton chrii, an bod bil nes iin de.”

²⁰ An Jiizas se agen, “Ou Gad kindom tan? Wa it komiin laik?

²¹ It komiin laik di yiis we wan uman tek miks iina uol iip a flowa — se fifti poun — an miks it til it swel op.”

²² Jiizas did a go a Jeruusilem an a tiich az im paas chuu di toun an dischrik dem.

²³ Sumadi aks im se, “Laad, a onggl likl bit a piipl a-go get siev?” Jiizas ansa dem se,

²⁴ “Chrai unu bes fi go chuu di naro duor. Nof sumadi a-go chrai fi go iin bot naa go get iin.

²⁵ Di taim a-go kom wen di uona a di ous get op an lak di duor an unu wi tan op outa duor a nak an beg, ‘Sa, uopm di duor fi wi.’ “Bot im wi ansa se, ‘Mi no nuo unu ar wich paat unu kom fram.’

²⁶ “Den unu wi se, ‘Wi yuus tu nyam an jringk wid yu, an yu did tiich pan wi ruod.’

²⁷ Im wi se, ‘Mi no nuo unu an mi no nuo we unu kom fram. Gu we fram mi, unu uol wikid unu.’

²⁸ “Unu a-go a baal an a grain unu tiit, wen unu si Iebriyam, Aizak, Jiekob an aal di prafit dem iina Gad kindom, an unu get lef out.

²⁹ Piipl wi kom fram iis an wes, an naat an sout, an go sidong iit big dina iina Gad kindom.

³⁰ Bot andastan dis, di wan dem we de a front a-go de a bak an di wan dem we de a bak a-go de a front.”

³¹ Siem taim som Farisii kom tu Jiizas an se, “Lef da plies ya an go a wan neda wan. Erad waahn fi kil yu.”

³² Jiizas se, “Go tel da faks de se, ‘Luk, mi wi ron out diiman an mek piipl beta tide an tumaro, an pan di tord die, mi wok wi don.’

³³ Mi afi gwaan we mi a go tide an tumaro an di neks die. Kaaz no prafit kyaahn ded outsaida Jeruusilem!

³⁴ “Ai Jeruusilem, Jeruusilem, yu we kil di prafit dem an stuon di wan dem we Gad sen tu unu, mi lang fi gyada yu piipl roun mi, laik ou foul gyada fi ar pikni dem anda ar wing, bot unu neva waahn mi fi dwi’it!

³⁵ Gad naa go bizniz wid unu ous. Mi a tel unu dis, unu naa go si mi agen til unu se, ‘Gad bles di wan we im sen.’”