Read Jamaican Patois Luuk 14 Bible Online

Luuk 14 - Jamaican Patois bible

Luuk 14

¹ Wan Sabat, wen Jiizas did go fi nyam a wan impuotant Farisii yaad, di ges dem did a wach im laik aak.

² Wan man we a sofa wid swel op an an fut did infronta Jiizas.

³ Jiizas aks di Laa tiicha dem an di Farisii dem se, “Ef yu get piipl beta pan di Sabat, yu a brok di laa?”

⁴ Dem no ansa im. Jiizas uol di man an an mek im beta, den sen im we.

⁵ Jiizas aks dem se, “Wich wan a unu ef unu av wan bwai pikni ar wan kou we jrap iina wan wel pan di Sabat, naa go jraa dem out siem taim?”

⁶ Dem kudn ansa dat niida.

⁷ Jiizas si ou di ges dem a chrai fi sidong nier di ed a di tiebl, so im tel dem da likl tuori ya:

⁸ “Wen sumadi invait yu fi go a wan wedn, no sidong iina di bes siit, kaaz dem mait-a did invait sumadi muo speshal dan yu.

⁹ Di wan we invait di tuu a unu wi kom tel yu se, ‘Gi da man ya yu siit.’ Shiem wi tek yu an yu wi afi tek di luowis siit.

¹⁰ So wen dem invait yu, tek di luowis plies, da wie de di sumadi we invait yu wi kom se tu yu, ‘Fren, muuv op go tek wan beta plies.’ Den yu wi get big op infronta di ada ges dem.

¹¹ Evribadi we put demself uova ada piipl, wi get pudong, bot ef yu ombl yuself, yu wi get big op.”

¹² Den Jiizas se tu di sumadi we invait im se, “Wen yu gi wan lonch ar wan dina, no invait yu fren, breda, yu fambili, ar yu rich nieba dem niida kaaz dem mait-a invait yu an pie yu bak.

¹³ Wen yu av wan dina, invait puor, kripl, liem an blain piipl

¹⁴ an den Gad wi bles yu. Dem kyaahn pie yu bak, bot yu wi get pie bak wen aal a di ded dem we du rait kom bak alaiv.”

¹⁵ Wan a dem we de a di tiebl an ier we Jiizas se, se tu im, “Di wan we a-go nyam a Gad tiebl, a im bles.”

¹⁶ Jiizas se, “Wan man did a luk bout wan big dina, an im tel nof sumadi fi kom.

¹⁷ Wen di taim kom fi di dina im sen im sorvant fi tel aal a uu im invait se, ‘Kom, evriting redi nou.’

¹⁸ “Aal a dem staat mek ekskyuuz. Di fos wan se, ‘Mi jos bai piis a lan, an mi afi go luk pan it. So mi beg yu paadn.’

¹⁹ “Aneda wan se, ‘Mi jos bai ten kou, an mi a go chek dem out an si ou dem wok. Mi beg yu paadn.’

²⁰ “Aneda wan se, ‘Mi jos marid, so mi kyaahn kom.’

²¹ “Di sorvant kom bak an tel im maasta wa dem se. Den di maasta fi di ous get beks an se, ‘Mikies go outa ruod an kyari di puo, di kripl, di blain an di liem piipl dem kom.’

²² “Di sorvant se, ‘Mi du wa yu aada mi fi du Sa, bot ruum de ya fi muo piipl.’

²³ “Di maasta tel im sorvant se, ‘Go out pan di aiwie an iina di konchrisaid an mek piipl kom, so mi ous wi ful.

²⁴ Kaaz yu si aal a dem piipl de we mi did invait, no iivn wan a dem a-go ties mi fuud.’ ”

²⁵ Wan big big kroud did a waak wid Jiizas. Im ton tu dem an se,

²⁶ “Ef sumadi kom tu mi an no lov mi muo dan ou dem lov dem faada an mada, waif an pikni, breda an sista, iivn dem uona laif, dem kyaahn fala mi.

²⁷ Enibadi we no kyari fi’im kraas an kom wid mi, kyaahn ton wan a mi falara dem.

²⁸ “Supuoz wan a unu waahn fi bil wan towa. Yu no wi sidong fos an chek out umoch it a-go kaas yu, so yu wi nuo ef yu av inof moni fi bil it.

²⁹ Ef yu bil di foundieshan an kyaahn don bil di towa, evribadi we si’it a-go laaf aafa yu.

³⁰ Dem wi se, ‘Yu staat bil bot yu kyaahn don it.’

³¹ “Supuoz wan King waahn fi go waar gens aneda King. Im naa go sidong fos an tingk ef fi’im ten touzn man, kyan go gens twenti touzn?

³² Ef im kyaahn win, wen di ada King stil de faar fram im, im wi sen mesinja fi fain out ou dem kyan mek piis.

³³ So, ef yu no gi op evriting, yu kyaahn ton wan a mi falara dem.

³⁴ “Saalt gud, bot ef di ties gaan, ou it fi ties bak laik saalt?

³⁵ It no gud fi di sail ar di manyuor pail niida, it fi dash we. Ef yu av iez fi ier, ier we mi a se.”