Read Jamaican Patois Luuk 15 Bible Online

Luuk 15 - Jamaican Patois bible

Luuk 15

¹ Di taks kalekta an di sina dem gyada roun fi ier wa Jiizas av fi se.

² Bot di Farisii an di Laa tiicha dem staat grombl se, “Da man ya a fren op sina an aal a nyam wid dem.”

³ So Jiizas ansa dem wid da tuori ya:

⁴ “Supuoz wan a yu av onjrid shiip an wan a dem laas. Yu naa go lef di nainti-nain iina di fiil an go luk fi di wan we laas til yu fain it?

⁵ Wen yu fain it, yu so glad yu put it pan yu shuolda

⁶ an go a yu yaad. An wen yu riich yu kaal out yu fren an nieba dem an se, ‘Kom selibriet wid mi, mi fain mi shiip we did laas.’ ”

⁷ Jiizas se tu dem se, “Mi a tel unu, a siem wie evn a-go selibriet uova wan sina we ton tu Gad dan uova nainti-nain piipl we du rait an we na’av notn fi sari fa.

⁸ “Ar sopuoz wan uman av ten silva kain an laas wan. Shi naa go lait lamp, swiip out di uol a di ous, an luk evriwe til shi fain it?

⁹ Wen shi fain it, shi kaal out ar fren an nieba dem an se, ‘Mek wi daans an praans, mi fain mi kain.’

¹⁰ Mi a tel yu a siem wie Gad ienjel dem api wen wan sina ton tu Gad.”

¹¹ Den Jiizas se, “Wan man did av tuu bwai pikni.

¹² Di likla wan se tu im faada se, ‘Dadi, gi mi fi mi paat a we yu av fi mi.’ So di faada shier op aal a we im av bitwiin di tuu a dem.

¹³ “Likl afta dat, di likla wan tek aal we im get, go a farin, an wies im moni a liv wail.

¹⁴ Afta im spen aaf evriting im av, staavieshan kom pan di uol konchri, an tingz did bad wid im.

¹⁵ Im go wok fi wan man iina da konchri de an di man sen im fi go fiid im ag dem.

¹⁶ Im did so onggri im did aal waahn nyam di ag fuud, bot nobadi no gi im notn.

¹⁷ “Den im kech imself an se, ‘Bot di man dem we wok fi mi faada av muor fuud dan we dem kyan nyam an mi de ya a ded fi onggri!

¹⁸ Mi a go a mi faada go tel im se: Dadi, mi du rang gens Gad an mi du yu rang tu,

¹⁹ mi no gud fi bi yu pikni agen, bot mek mi wok fi yu.’

²⁰ So im get op an go a im faada. Im did stil faar fram im yaad wen im faada si im an fiil sari fi im. Im faada ron go og im op an kis im.

²¹ “Di pikni se tu im faada se, ‘Dadi, mi du rang gens Gad an mi du yu rang tu. Mi no gud fi bi yu pikni agen.’

²² “Bot di faada tel im sorvant se, ‘Mikies! Kyari di bes kluoz kom put aan pan im. Put wan ring pan im fingga an shuuz pan im fut.

²³ Bring di kyaaf we mi a fatn kom kil it. Mek wi nyam, daans an praans.

²⁴ Mi pikni did ded bot im kom bak alaiv. Im did laas bot mi get im bak.’ So dem staat fi daans an praans.

²⁵ “Di biga bwai pikni did de a grong. Wen im riich nier di ous, im ier myuuzik a plie.

²⁶ So im kaal wan a di sorvant dem an aks im a wa gwaan.

²⁷ Im tel im se ‘No yu breda kom uom an yu faada kil di kyaaf we im did a fatn, kaaz im kom uom sief an soun.’

²⁸ “Di biga breda did so beks, im wudn go iina di ous. So im faada go out go beg im fi kom iin.

²⁹ Bot im se tu im faada se, ‘Aal dem ier ya mi wok laka sliev fi yu an mi du evriting we yu tel mi fi du. Bot aal dem taim de no iivn wan dege-dege yong guot yu no gi mi fi selibriet wid mi fren dem.

³⁰ Bot az da pikni de, we wies aal we yu gi im a bai uman, kom uom, yu kil yu bes kyaaf fi’im!’

³¹ “Di faada se, ‘Pikni, yu aalwiez de ya wid mi, an evriting we mi av a fi yu uon.

³² Bot wi did so glad wi did afi daans an praans, kaaz yu breda we did ded an kom bak alaiv, kom bak uom. Im did laas bot wi get im bak.’ ”