Read Jamaican Patois Luuk 16 Bible Online

Luuk 16 - Jamaican Patois bible

Luuk 16

¹ Jiizas tel im speshal falara dem se: “Yu did av wan rich man we ier se im manija did a wies im sitn dem.

² Di rich man kaal im an aks im se, ‘Wa dis mi ier bout yu? Rait dong wa yu get an wa yu spen, kaaz yu kyaahn bi mi manija agen.’

³ “Di manija se tu imself, ‘A wa mi fi du nou? Mi maasta a go tek we mi jab. Mi no av di chrent fi dig grong, an mi shiem fi beg.

⁴ Mi nuo wa mi a-go du, so dat wen mi baas faiya mi, piipl wi stil waahn mi kom a dem yaad.’

⁵ “Im kaal iin evri wan a di piipl dem we uo im maasta. Im aks di fos wan se, ‘Umoch yu uo mi maasta?’

⁶ “Im se, ‘Wan onjrid baril a aliv ail.’ “Di manija tel im se, ‘Tek yu bil, sidong kwik, an rait op fifti.’

⁷ “Im aks di sekan wan se, ‘Umoch yu uo?’ “ ‘Wan onjrid bag a wiit,’ im se. “Im tel im se, ‘Tek yu bil an rait ieti.’

⁸ “Iivn duo di manija did tiif, di maasta big im op kaaz im did sumaat. Di piipl we bilang tu da worl ya, sumaata wen dem a diil wid dem wan aneda, dan Gad piipl.

⁹ Mi a tel yu dis, yuuz di moni we yu av fi du gud fi piipl an mek fren, so wen it don, yu wi av wan uom iina evn.

¹⁰ “Enibadi we yu kyan chos wid likl bit, yu kyan chos dem wid uol iip tu, an enibadi we yu kyaahn chos wid likl bit yu kyaahn chos dem wid uol iip niida.

¹¹ Ef piipl kyaahn chos yu wid moni ar di sitn dem iina di worl, uu a-go chos yu wid eniting we riili wot sopm?

¹² Ef dem kyaahn chos yu wid ada piipl tingz, uu a-go gi yu notn fi yuself?

¹³ “No sorvant kyaahn sorv tuu maasta. Yu wi iet wan an lov di ada wan, ar yu wi ron go du eniting we wan waahn bot no tuu bizniz wid di ada wan. Unu kyaahn sorv Gad an moni.”

¹⁴ Di Farisii dem laaf aafa Jiizas wen dem ier dis, kaaz dem lov moni.

¹⁵ Jiizas se tu dem se, “Unu aalwiez mek unuself luk gud tu ada piipl, bot Gad nuo unu aat. Yu si aal dem sitn we piipl lov, Gad naa no yuus fi dem.

¹⁶ “Bifuo Jan kom piipl did afi fala Muoziz Laa an wa di prafit dem rait dong. Bot sins im kom an di gud nyuuz bout Gad kindom a priich siem wie, evribadi a fait fi get iin de.

¹⁷ It wuda kwika fi evn an ort mash op dan fi di liklis leta iina di Laa chienj.

¹⁸ “Wan man we brok op wid im waif an go marid sumadi els, a brok di Laa, an di man we marid wan uman we brok op wid ar ozban a brok di Laa tu.

¹⁹ “Wan taim yu did av wan rich man we yuus tu jres op iina porpl kluoz mek outa fansi an dier klaat an did a liv big laif evridie.

²⁰ Wan bega, niem Lazaros, did de a di rich man giet, an im badi ful op a suor.

²¹ Im did wel waahn fi nyam wa jrap aafa di rich man tiebl. Aal di daag dem did kom a lik aaf di bega-man suor dem.

²² “Di bega ded an di ienjel dem kyari im tu Iebriyam said. Di rich man ded tu an get beri.

²³ An iina el, im did riili a sofa, di rich man luk op an si Iebriyam faar faar, wid Lazaros saida im.

²⁴ So im kaal out, ‘Faada Iebriyam, elp mi, sen Lazaros kom dip di tip a im fingga iina waata fi kuul mi tong. Mi a sofa bad bad iina dis ya faiya ya.’

²⁵ “Iebriyam ansa im an se, ‘Pikni, wen yu did alaiv, a bier gud sitn yu get, an a bier bad sitn riich Lazaros, nou im api an a liv aarait an yu a sofa.

²⁶ An muor dan dat, wan diip diip chrench de bitwiin wi uova ya-so an unu uova de-so, an nobadi fram non a di said dem kyaahn kraas uova.’

²⁷ “Di rich man se, ‘Den mi beg yu faada, du, sen Lazaros go a mi faada ous,

²⁸ beg im waan mi faiv breda dem, so dem no kom dong a da plies ya, we evribadi a sofa.’

²⁹ “Iebriyam ansa se, ‘Dem av Muoziz an di prafit dem. Mek dem lisn dem.’

³⁰ “ ‘Nuo, faada Iebriyam,’ im se, ‘bot ef sumadi we ded go taak tu dem, dem wi sari fi di rang we dem du an ton tu Gad.’

³¹ “Iebriyam se, ‘Ef dem no lisn Muoziz an di prafit dem, no iivn sumadi fram di ded a-go mek dem chienj dem main.’ ”