Read Jamaican Patois Luuk 17 Bible Online

Luuk 17 - Jamaican Patois bible

Luuk 17

¹ Jiizas se tu im speshal falara dem se, “Unu aalwiez a-go av sitn we mek piipl du rang, bot chobl fi di wan we mek sumadi els du di rang.

² Dem wuda betaraaf ef wan big big rakstuon did tai roun dem nek an dem get fling iina sii, dan fi dem kaaz wan a dem likl wan ya fi sin.

³ So wach unuself! Ef yu breda ar yu sista du yu sopm rang, taak tu dem bout di rang we dem du an ef dem sari, paadn dem.

⁴ Ef sevn taim iina wan die, dem du yu rang, an evritaim kom bak an se, ‘Mi sari,’ yu fi paadn dem.”

⁵ Di apasl dem se tu di Laad se, “Laad, elp wi fi chos iina yu muor!”

⁶ Jiizas se, “Ef unu did chos iina mi likl bit, iivn laka wan likl likl siid, unu kuda se tu da big bredfruut chrii ya, ‘Ruut op yuself fram ya-so an go plaant yuself iina di sii,’ an it wuda du wa unu tel it fi du.

⁷ “Wich wan a unu wuda se tu unu sorvant we kom bak fram di fiil ar jos don luk aafa di shiip, ‘Kom, kom sidong an nyam’?

⁸ Unu naa go kwika fi se, ‘Gwaan go luk bout mi sopa, an fiks op yuself an kom sorv mi mi fuud. Wen mi don nyam an jringk, yu kyan go nyam an jringk tu.’

⁹ An unu tingk di maasta wuda tel di sorvant tangks kaaz im du wa im tel im fi du?

¹⁰ A siem so, wen unu du evriting we unu sopuoz fi du, unu fi se, “Wi a onggl sorvant, wi no fi ekspek no big op ar notn speshal niida, kaaz wi onggl a du wa wi sopuoz fi du.”

¹¹ Jiizas did de pan im wie a go a Jeruusilem wen im paas chuu di paat we Samieriya an Gyalalii miit op.

¹² Siem taim Jiizas a go iina wan dischrik, ten man we did av wan siknis we mek dem skin fasi-fasi, kom op tu im. Dem neehn kom tuu kluos, bot tan likl wie fram im

¹³ an ala out se, “Jiizas, Tiicha, elp wi, du!”

¹⁴ Wen Jiizas si dem, im se, “Gwaan go mek di priis dem luk pan unu.” Wen dem de pan dem wie, dem get beta.

¹⁵ Wan a dem si se im get beta an ton baka priez Gad loud loud.

¹⁶ Im chuo imself a Jiizas fut an tangk im. An im a did wan Samaritan.

¹⁷ Jiizas aks im se, “A no ten a unu did get beta? So we di ada nain de?

¹⁸ Nobadi els no kom bak kom priez Gad? A onggl da farina ya wan?”

¹⁹ Den Jiizas se tu di man se, “Git op an go a yu yaad, yu biliiv an a dat mek yu get beta.”

²⁰ Di Farisii dem aks Jiizas fi tel dem a wen di taim a-go kom wen Gad wi ruul iina evri wie. Jiizas se tu dem se, “Notn no de we kyan tel unu a wen Gad a-go ruul iina evri wie,

²¹ an piipl naa go kyan se, ‘Luk, si Gad a ruul ya!’ ar ‘Luk, si Gad a ruul de,’ kaaz Gad a ruul mongks unu aredi.”

²² Den Jiizas se tu im speshal falara dem se, “Di taim a-go kom wen unu wi lang fi di Man we Gad Pik kom bak, iivn fi wan die.

²³ Piipl wi tel unu se, ‘Luk, si im de!’ ar ‘Luk, si im ya!’ Bot no go, no fala dem.

²⁴ Di die di Man we Gad Pik kom bak, a-go komiin laik wen laitnin flash kraas di skai an lait op di uol worl.

²⁵ Bot mi afi sofa uol iip a sitn fos an di piipl dem fram da taim ya a-go ton dem bak pan mi.

²⁶ “Jos laik ou piipl yuus tu gwaan iina Nowa taim, a siem so piipl a-go gwaan wen di Man we Gad Pik kom bak.

²⁷ Piipl did a nyam, jringk, an a get marid op tu di die wen Nowa go iina di aak. Den di flod kom an kil aaf di uol a dem.

²⁸ “A di siem wie di piipl dem iina Lat taim did a gwaan. Dem did a nyam an jringk, bai an sel, plaant an bil.

²⁹ Bot di die Lat lef Sadam, faiya an brimstuon kom dong laik rien fram evn an kil di uol a dem.

³⁰ “A siem so it a-go apm pan di die di Man we Gad Pik kom bak.

³¹ Pan da die de, uu de pan ruuf tap an av gudz iina di ous, no fi go dong fi get dem. An uu de iina di fiil no fi go bak fi notn.

³² Memba Lat waif!

³³ Di wan we a chrai fi kip im laif, wi luuz it, bot di wan we wi gi op im laif, wi siev it.

³⁴ Mi tel unu, pan da nait de, tuu piipl wi iina di siem bed, wan a-go get tek we an di ada wan a-go get lef bak.

³⁵ Tuu uman wi a grain grien, wan a-go get tek we an di ada wan a-go get lef bak.”

³⁷ Dem aks im, “Wich paat Laad?” Im se, “Eniwe yu av ded badi, a de-so jangkro a-go gyada.”