Read Jamaican Patois Luuk 18 Bible Online

Luuk 18 - Jamaican Patois bible

Luuk 18

¹ Den Jiizas tel im speshal falara dem da tuori ya fi shuo dem se dem fi aalwiez prie an no gi op.

² “Iina wan toun, yu did av wan joj we no fried a Gad an we no rispek nobadi.

³ An iina di siem toun de yu did av wan uman we ozban did ded. Shi eva a kom tu im an a beg im se, ‘Mi waahn jostis, protek mi fram mi enimi dem, du!’

⁴ “Fi wan lang taim im a tel ar nuo. Bot afta a wail di joj se tu imself se, ‘Mi no fried a Gad an mi no rispek nobadi,

⁵ bot siek-a ou da uman ya kip aan a bada mi, mi a-go mek shuor se shi get jostis, so shi wi tap kom kom taiyad mi out.’ ”

⁶ Di Laad tel dem se, “Unu ier wa di wikid joj se?

⁷ So unu no tingk se Gad a-go gi di piipl dem we im pik jostis, iihn, di wan dem we baal tu im die an nait? Unu tingk se im wi kip aan a put dem aaf?

⁸ Gad wi mek shuor se dem get jostis kwik kwik. Bot wen di Man we Gad Pik kom baka ort, im a-go fain piipl we biliiv iina im?”

⁹ Jiizas tel dem da tuori ya tu di wan dem we fiil se dem a du rait an a luk dong pan evribadi els:

¹⁰ “Tuu man go op a Gad ous fi go prie. Wan a dem a did wan Farisii an di ada wan a did wan taks kalekta.

¹¹ Di Farisii tan op an prie bout imself se ‘Gad, mi tangk yu dat mi no tan laka ada piipl we tiif, brok di Laa, sliip wid piipl dem no marid tu, ar iivn laik da taks kalekta ya.

¹² Mi faas tuu taim fi di wiik an evriting we mi get mi shier it op iina a ten an gi yu wan.’

¹³ “Bot di taks kalekta tan faar. Im wudn iivn luk op a evn. Im biit im ches an im se, ‘Gad, tek piti pan mi, wan sina.’

¹⁴ “Mi a tel unu da man ya, no di Farisii, bot di taks kalekta, im go a im yaad an evriting rait bitwiin im an Gad. Enibadi we put demself uova ada piipl a-go get pudong, an dem we ombl demself, wi get lif op ai.”

¹⁵ Piipl did a kyari dem biebi go a Jiizas fi im toch dem. Jiizas speshal falara dem si wa a gwaan an staat tel aaf di piipl dem an ron dem.

¹⁶ Bot Jiizas tel dem fi kom wen im se, “Mek di likl pikni dem kom tu mi. No tap dem, kaaz Gad kindom a fi piipl we komiin laik dem likl pikni ya.

¹⁷ Mi tel unu dis ya, an a chuu mi a taak, enibadi we no chos iina Gad an fala im laik wan likl pikni naa go kyan go iina Gad kindom.”

¹⁸ Wan ruula aks Jiizas se, “Mi gud tiicha, wa mi mos du fi liv fi eva?”

¹⁹ Jiizas ansa im se, “Wa mek yu kaal mi gud? Nobadi no gud, onggl Gad wan.

²⁰ Yu nuo di Laa dem: ‘No sliip wid nobadi we yu no marid tu, no kil, no tiif, no tel lai pan piipl an yu fi rispek yu faada an mada.’”

²¹ “Fram mi a likl bwai, mi a fala aal a dem de wid aal a mi aat,” im se.

²² Afta Jiizas ier dis, Jiizas se tu im se, “Yu stil av wan ting lef fi du. Sel evriting we yu av an gi di moni tu di puo piipl dem, an yu wi rich iina evn. Wen yu du dat, kom fala mi.”

²³ Wen di man ier dis, im aat jrap, kaaz im did wel rich.

²⁴ Jiizas luk pan im an se, “A di aadis ting fi rich piipl go iina Gad kindom!

²⁵ It iiziya fi wan kyamil go chuu wan niigl yai dan fi sumadi we rich go iina Gad kindom.”

²⁶ Dem we ier dis aks Jiizas se, “Den a uu kyan get siev?”

²⁷ Jiizas se, “We piipl kyaahn du, Gad kyan du.”

²⁸ Den Piita se, “Wi lef evriting we wi did av fi fala yu!”

²⁹ “Mi a tel unu di chuut,” Jiizas se tu dem, “enibadi we lef fi dem yaad, fi dem waif, breda, mada an faada ar dem pikni siek-a Gad kindom,

³⁰ dem wi get bak uol iip muo iina da taim ya, an dem wi get fi liv fi eva iina evn.”

³¹ Jiizas tek im twelv falara dem wan said an tel dem se, “Wi a go op a Jeruusilem, an evriting di prafit dem rait dong bout di Man we Gad Pik a-go apm.

³² Dem a-go tek im gi di piipl we a no Juu. Dem a-go laaf aafa im an tek mi mek preke, shiem im an pit pan im. Dem a-go biit im wikid wikid an kil im.

³³ Bot chrii die afta dem kil im, im a-go kom bak alaiv.”

³⁴ Jiizas falara dem neva get non a we im se. Di miinin did aid fram dem, so dem kudn andastan wa im a taak bout.

³⁵ Nou, wen Jiizas kech nier Jeriko, wan blain man did sidong a di ruod-said a beg.

³⁶ Di man ier di kroud a paas an aks dem a wa a gwaan.

³⁷ Dem tel im se, “A Jiizas we kom fram Nazaret a kom.”

³⁸ Im baal out loud loud, “Jiizas, Dievid pikni, tek piti pan mi no!”

³⁹ Di wan dem we did a liid di wie tel im fi shet im mout an tap im naiz, bot im shout out louda, “Dievid pikni, du, tek piti pan mi no!”

⁴⁰ Jiizas tap, an tel dem fi bring di man kom. Afta di blain man kom nier, Jiizas aks im se,

⁴¹ “Wa yu waahn mi fi du fi yu?” Im se, “Laad, mek mi si agen.”

⁴² Jiizas tel im se, “Si de, yu kyan si agen. Yu kyan si kaaz yu biliiv.”

⁴³ Siem taim im kuda si an im fala baka Jiizas a priez Gad. Afta di piipl si wa apm, dem priez Gad tu.