Read Jamaican Patois Luuk 19 Bible Online

Luuk 19 - Jamaican Patois bible

Luuk 19

¹ Jiizas did a go chuu Jeriko,

² wich paat wan man niem Zakiyos did liv. Zakiyos a did wan a di ed taks kalekta dem an im did wel rich.

³ Im did waahn fi si a uu Jiizas bi, bot chuu im did so shaat an kaaz di kroud did so big, im kudn si im.

⁴ So im ron infronta dem an klaim wan taal chrii so im kuda si, kaaz Jiizas did a waak da wie de.

⁵ Wen Jiizas riich di chrii, im luk op an se tu im, “Zakiyos, kom dong nou. Mi afi tan a yu yaad tide.”

⁶ So Zakiyos kom dong siem taim an did glad fi welkom Jiizas iina im ous.

⁷ Di piipl si dis an dem staat grombl, “Im gaan go tan a wan sina man yaad.”

⁸ Zakiyos tan op bifuo evribadi an se tu di Laad, “Luk Laad, aaf a we mi av, mi a-go gi tu di puo, an ef mi rab nobadi, mi wi pie dem bak fuo taim wa mi did tiif.”

⁹ Jiizas se tu im se, “Tide da fambili ya get siev, kaaz da man ya, a wan a Iebriyam pikni tu.

¹⁰ Di Man we Gad Pik kom fi luk fi piipl we laas an siev dem.”

¹¹ Wen dem a lisn tu dis, Jiizas tel dem wan neda tuori, kaaz im did nier Jeruusilem an di piipl dem did tingk se Gad kindom did a-go kom siem taim.

¹² Jiizas se tu dem se, “Wan big impuotant man did go a wan faar plies fi dem mek im King an den fi go baka im yaad.

¹³ Bifuo im lef, im kaal ten a im sorvant dem an gi aal a dem som moni. Im tel dem se, ‘Tek da moni ya an si umoch unu kyan mek til mi kom bak.’

¹⁴ “Bot di piipl dem we liv wich paat im kom fram did iet im. So dem sen piipl baka im fi se, ‘Wi no waahn da man ya fi ton wi King.’

¹⁵ “Bot im ton King siem wie, an wen im riich uom, im kaal fi di sorvant dem we im did gi moni, fi fain out umoch dem mek.

¹⁶ “Di fos wan kom an se, ‘Sa, mi mek ten muo pan tap a we yu gi mi.’

¹⁷ “Im maasta se, ‘Yu du gud mi sorvant! Siek-a ou yu anggl wan sumaal sitn, tek chaaj a ten siti.’

¹⁸ “Di sekan wan kom an se, ‘Sa, mi mek faiv muo pan tap a we yu gi mi.’

¹⁹ “Im maasta ansa, ‘Yu tek chaaj a faiv siti.’

²⁰ “Aneda sorvant kom an se, ‘Sa, si yu moni ya. Mi kip it rap op iina piis a klaat

²¹ chuu mi fried a yu, kaaz yu a wan aad man. Yu tek wa yu no put iin an riip wa yu no plaant.’

²² “Im maasta se, ‘Mi wi tek yu uona wod dem joj yu, yu woklis sorvant! Duo yu se mi a wan aad man we tek out wa mi no put iin, an riip wa mi no plaant?

²³ So wa mek yu neva put mi moni iina di bangk? Da wie de wen mi kom bak, mi wuda did av di moni wid inchres.’

²⁴ “Den im se tu im sorvant dem we weehn a tan op de, ‘Tek di moni fram im an gi it tu di wan we av ten.’

²⁵ “ ‘Bot Sa,’ dem se, ‘im av ten aredi!’

²⁶ “Di King se, ‘Mi a tel unu, di wan we av, wi get muo, bot di wan we no av notn, iivn wa im av dem a-go tek we fram im.

²⁷ Yu si dem we iet mi an neva did waahn mi ton dem king, kyari dem kom kil dem rait ya-so.’ ”

²⁸ Afta Jiizas se dis, im gwaan mek im wie go a Jeruusilem.

²⁹ Siem taim im a kom nier Betpiej an Betani a Mount Aliv, im sen tuu a im falara dem, an se tu dem se,

³⁰ “Go a di dischrik infronta unu, an wen unu go iin, unu wi fain wan yong dangki we nobadi neva raid yet tai op de. Luus it an kyari it kom.

³¹ Ef nobadi aks unu se, ‘Wa mek unu a luus it?’ tel dem se, ‘Di Laad waahn it.’ ”

³² Dem go an fain evriting jos laik ou Jiizas tel dem.

³³ Wen dem a luus di dangki, di uona aks dem se, “Wa unu a luus di dangki fa?”

³⁴ Dem ansa, “Di Laad waahn it.”

³⁵ Dem kyari it go gi Jiizas, put som a dem jakit pan di dangki bak an put Jiizas fi sidong pan di dangki.

³⁶ Siem taim Jiizas a raid go, piipl a pred dem jakit pan di ruod wich paat im a paas.

³⁷ Wen im riich wich paat di ruod staat go dong Mount Aliv, di uol a im falara dem we did a waak baka im did staat fi get api an priez Gad loud loud fi aal a di mirikl dem we dem si.

³⁸ Dem se, “Gad bles di King we im sen kom! Im sen im wid fi’im powa!” “Mek piis ruul iina evn, an priez tu Gad we liv iina evn.”

³⁹ Som Farisii iina di kroud se tu Jiizas, “Tiicha, tel yu falara dem fi kiba dem mout an no du dat.”

⁴⁰ Jiizas se, “Ef dem no mek no naiz, dem stuon ya — dem wi baal out.”

⁴¹ Afta Jiizas kech nier Jeruusilem an si di siti, im staat baal fi dem

⁴² an a se, “Jeruusilem, Ef yu di onggl nuo tide wa wuda gi yu piis — bot di chuut aid fram yu.

⁴³ Di die a-go kom wen yu enimi dem a-go bil op wan waal roun yu so dem kyan atak yu fram evri said an yu kyaahn get we.

⁴⁴ Dem a-go mash yu dong tu di grong an kil aaf aal a yu piipl dem. Dem no iivn a-go lef no rakstuon pan tap a wan aneda, kaaz di taim wen Gad kom fi tan wid yu, yu neva nuo.”

⁴⁵ Jiizas go iina di yaad we Gad ous de an staat jraiv out di piipl we did iin de a sel.

⁴⁶ Im se tu dem se, “It rait dong iina Gad wod se, ‘Fi mi ous a-go bi wan ous we piipl kom fi prie,’ bot unu ton it iina ‘wan aid out fi tiif.’ ””

⁴⁷ Evridie Jiizas tiich iina di yaad we Gad ous de. Di ed priis, di Laa tiicha dem an di liida dem tu, did a set fi kil im.

⁴⁸ Bot dem kudn fain no wie fi du it, kaaz evribadi did a lisn evri wod we Jiizas se.