Read Jamaican Patois Luuk 2 Bible Online

Luuk 2 - Jamaican Patois bible

Luuk 2

¹ Iina dem die de, di Ruoman ruula, Siiza Agostos, gi aada fi rait dong di niem a evribadi iina im kindom.

² (Dis a di fos taim niem a rait dong sins di taim wen Kiriniyos did a ruul uova Siriya.)

³ Aal im piipl dem did afi go a di toun we dem baan fi get dem niem rait dong, so di govament kyan taks dem.

⁴ So kaaz Juozif did kom fram Dievid fambili an Dievid did baan iina Judiya, im did afi lef fram Nazaret iina Gyalalii an go a Betliyem iina Judiya.

⁵ Juozif go de wid Mieri fi get dem niem rait dong. Di tuu a dem did ingiej fi marid dem wan aneda an shi did av biebi iina beli.

⁶ Wen dem de de, Mieri tek iin fi av biebi,

⁷ an shi av ar fos pikni, wan bwai. Shi rap im op iina biebi blangkit an put im iina di baks we di animal dem nyam outa, kaaz no spies neva iina di ges ous fi dem.

⁸ Da nait de, som shepad did a luk aafa dem shiip iina wan fiil, nier we Mieri dem did de.

⁹ Wan a di Laad ienjel dem kom tu di shepad dem. Wan brait brait lait fram Gad kova dem an it mek dem fraitn so til.

¹⁰ So di ienjel tel dem se, “No fried! Mi av gud nyuuz fi unu. Nyuuz we a-go mek evribadi api.

¹¹ Di wan we a-go siev unu baan tide iina di toun we Dievid kom fram. Im a Krais, di Laad.

¹² Mi a-go tel unu wa unu a-go si, so wen unu si dat unu a-go nuo se a im. Unu a-go si wan biebi rap op iina wan biebi blangkit an a lidong iina di baks we di animal dem nyam outa.”

¹³ Aal av a sodn uol iip a ienjel fram evn, jain im. Dem did a priez di Laad an se,

¹⁴ “Priez Gad we de a evn, an piis fi evribadi we Gad api wid.”

¹⁵ Afta di ienjel dem lef an go baka evn, di shepad dem se tu dem wan aneda, “Mek wi go a Betliyem go si aal a wa di Laad tel wi bout.”

¹⁶ Dem ori an go fain Mieri, Juozif an biebi Jiizas, we did a lai dong iina di bed we mek outa jrai graas.

¹⁷ Wen dem si dem, dem tel evribadi aal a wa di ienjel did se bout di biebi.

¹⁸ An evribadi we ier wa di shepad dem se, shak.

¹⁹ Bot Mieri, shi kip wa dem se iina ar aat an tingk bout dem aal di taim.

²⁰ Di shepad dem go bak tu dem shiip a priez Gad fi aal we dem ier an si, kaaz evriting dem did si an ier a jos laik ou di ienjel did tel dem.

²¹ Iet die afta di biebi baan a did taim fi sorkomsaiz an niem im. Dem kaal im Jiizas. Jos laik ou di ienjel se dem fi kaal im, lang bifuo im baan.

²² Di die kom fi dem gi op sakrifais fi get bak kliin iina Gad yai, laik we Muoziz Laa se dem fi du. So Juozif an Mieri go a Jeruusilem an dem kyari Jiizas wid dem fi gi im tu di Laad,

²³ (kaaz it rait iina Gad Laa se, “Evri bwai biebi we a im mada fos pikni bilang tu di Laad.”)

²⁴ So Mieri an Juozif kyari di sakrifais we Gad Laa se dem fi gi, “tuu dov ar tuu yong pijin.”

²⁵ Nou yu did av wan man iina Jeruusilem niem Simiyan. Simiyan a did wan gud sumadi we riili did a liv fi Gad. Im did a wiet fi Gad frii Izrel fram sofarieshan an di Uoli Spirit did de wid im.

²⁶ Di Uoli Spirit did tel im se im naa go ded bifuo im si di Krais we di Laad pramis fi sen kom.

²⁷ Di Spirit liid Simiyan go iina di yaad we Gad ous de an wen Mieri an Juozif kyari iin Jiizas fi du wa di Laa tel dem fi du,

²⁸ Simiyan tek di biebi an priez Gad a se,

²⁹ “Laad, we yu pramis mi kom chuu, so nou mi kyan ded iina piis.

³⁰ Kaaz wid mi uon tuu yai dem, mi si di sumadi we yu sen fi siev piipl.

³¹ An yu a-go mek evribadi si ou im dwi’it

³² im a di lait we a-go mek piipl we a no Juu nuo yu wiez an bring nof rispek tu yu piipl Izrel.”

³³ Juozif an Mieri kudn biliiv we Simiyan se bout dem pikni.

³⁴ Simiyan bles dem an tel Mieri se, “Dis ya pikni ya baan fi bring dong jojment an fi bles uol iip a piipl iina Izrel tu. Im a-go bi wan sain fram Gad bot piipl a-go fait gens im.

³⁵ Siek-a dat, wa dem tingk iina dem aat a-go kom out iina di uopm. Mieri it a-go komiin laik wan suod a go chuu yu aat.”

³⁶ Wan uol uman niem Ana we a did wan prafit did de de tu. Shi a did Fanyuuwel daata, wan man we kom fram Asha chraib. Shi did marid, bot a onggl sevn ier shi an ar ozban did marid fa bifuo im ded.

³⁷ An shi neva av no ada ozban aal wen shi ieti fuo. Maanin, nuun an nait, shi spen taim iina Gad ous, a faas an a prie.

³⁸ Siem taim Simiyan a taak tu Mieri bout Jiizas, Ana kom tu dem an staat fi priez Gad. Shi tel evribadi we did a luk fi Gad fi frii Jeruusilem, bout di pikni.

³⁹ Afta Juozif an Mieri du wa Gad Laa se dem fi du, dem go baka dem yaad iina Nazaret we de a Gyalalii.

⁴⁰ Jiizas gruo op an get chrang. Im did av sens an im did brait. An Gad did a bles im.

⁴¹ Evri ier, Jiizas mada an faada go a Jeruusilem fi di Paasuova alidie — wan alidie fi memba ou Gad did tek di Izrel piipl dem outa Iijip.

⁴² Wen Jiizas riich twelv, dem kyari im go wid dem.

⁴³ Wen di alidie don, im mada an faada lef fi go baka dem yaad, bot dem neva nuo se Jiizas did stil de a Jeruusilem.

⁴⁴ Dem tek it se im did iina di gruup a fambili an fren we dem did a chravl wid; so dem chravl fi wan uol die bifuo dem staat luk fi im mongks di gruup.

⁴⁵ Wen dem no fain Jiizas, dem go baka Jeruusilem fi go luk fi im.

⁴⁶ Chrii die paas bifuo dem fain Jiizas iina Gad ous, sidong wid di tiicha dem, a lisn tu dem, an a aks dem kwestiyan.

⁴⁷ Evribadi we ier Jiizas taak kudn biliiv di wie ou im ansa kwestiyan an di sitn dem we im andastan.

⁴⁸ Wen Jiizas mada an faada si im, dem shak. Im mada se tu im se, “Si ya! Bwai, mek yu du wi so? Mi an yu faada did a luk fi yu ou lang!”

⁴⁹ Jiizas se, “Wa mek unu a luk fi mi? Unu neva nuo se mi wuda iina mi faada ous?”

⁵⁰ Dem neehn andastan wa im a se tu dem.

⁵¹ Afta dat Jiizas go bak uom a Nazaret wid dem an im du evriting dem tel im fi du. An im mada kip aal a dem sitn de iina ar aat.

⁵² Jiizas gruo op big. Im did brait an av nof sens. Gad did api wid wa im a du an di piipl dem did api tu.