Read Jamaican Patois Luuk 20 Bible Online

Luuk 20 - Jamaican Patois bible

Luuk 20

¹ Wan die, Jiizas did a tiich di piipl dem an a priich di Gud Nyuuz iina di yaad we Gad ous de. Di ed priis dem, di Laa tiicha dem an di elda dem kom tu im.

² Dem aks Jiizas se, “Tel wi sopm, wa rait yu av fi a du dem sitn ya? An a uu gi yu da rait de?”

³ Jiizas se tu dem se, “Mi a-go aks unu wan kwestiyan an mi waahn unu fi ansa mi.

⁴ Wen Jan did a baptaiz piipl, a uu did sen im fi dwi’it, Gad ar man?”

⁵ Dem taak mongks demself se, “Ef wi se, ‘Gad,’ im a-go aks wi, ‘a wa mek unu neva biliiv Jan?’

⁶ Bot ef wi se, ‘a man,’ di uol a di piipl dem a-go stuon wi, kaaz dem tingk se Jan a did wan prafit.”

⁷ So dem ansa se, “Wi no nuo a uu sen im.”

⁸ So Jiizas se tu dem se, “Den mi naa go tel unu uu gi mi di rait fi du dem sitn ya niida.”

⁹ Den Jiizas tel di piipl dem da tuori ya: “Yu did av wan man we did plaant op wan griep faam, rent it tu som faama an go we fi wan lang taim.

¹⁰ Wen a did taim fi riip di fuud, im sen wan sorvant go a di tenant dem fi get fi’im shier. Dem biit im op an sen im we wid notn.

¹¹ Im sen wan neda sorvant, dem biit im op tu, shiem im, an sen im we wid im tuu lang an dem.

¹² Im stil sen wan neda sorvant — dat mek chrii. Dem biit im op an chuo im out.

¹³ “Di uona fi di gyaadn se, ‘Wa mi fi du? Mi a-go sen mi bwai pikni, we mi lov. Dem mait-a av rispek fi’im.’

¹⁴ “Wen di tenant dem si di pikni, dem se tu dem wan aneda, ‘A da wan ya a-go get evriting wen im faada ded. Mek wi kil im, so a wi get it.’

¹⁵ Dem chuo im outa di gyaadn an kil im.” Jiizas aks di piipl dem se “So wa unu tingk di uona a di gyaadn a-go du tu dem?

¹⁶ Im a-go kom an kil aaf di tenant dem an tek di faam gi ada piipl.” Wen di piipl dem ier dis, dem se, “Wi uop se dis wi neva apm!”

¹⁷ Jiizas luk chriet iina dem yai an aks dem, “Wa unu tingk it miin wen it rait dong se: “ ‘Di rakstuon di bilda fling we, a it a uol op di bildin nou’?

¹⁸ Evribadi we jrap pan da stuon ya a-go brok op iina piisiz, an uu it jrap pan a-go mash op bad.”

¹⁹ Di Laa tiicha dem an di ed priis dem luk fi wan wie fi lak op Jiizas siem taim, kaaz dem nuo se a dem im did a chat bout. Bot dem did fried a di piipl.

²⁰ Den dem wach Jiizas laik wan aak. Dem aiya som man iina siikrit fi gwaan laik se dem anis, so ef im se notn rang dem kuda kech im an ton im uova tu di Ruoman govana we inchaaj a di ieriya.

²¹ Di infaama dem kwestiyan Jiizas, “Tiicha, wi nuo se yu taak an tiich wa rait. Yu no paashal, bot yu tiich di rait sitn bout wa Gad waahn.

²² It rait fi wi pie taks tu Siiza, di Ruoman ruula, ar wi no fi pie notn?”

²³ Jiizas si chuu dem chrik an se tu dem se,

²⁴ “Shuo mi wan moni. Uufa picha an niem de pan it?” “Siiza,” dem ansa bak.

²⁵ So Jiizas se tu dem se, “Den gi Siiza wa a fi’im, an gi Gad wa a fi’im.”

²⁶ Dem kudn chrap im wid wa im se infronta di piipl dem. An dem so fraitn fi ier ou im ansa, dem kudn se a wod.

²⁷ Som a di Sadyusii dem kom a Jiizas (dem neva biliiv se wen yu ded yu kyan kom bak alaiv).

²⁸ Dem aks se, “Tiicha, Muoziz rait se ef wan man breda ded an lef wan waif bot no pikni, di man fi marid im breda waif an av pikni wid ar fi’im breda.

²⁹ Wan fambili did av sevn breda. Di fos wan marid wan uman an ded bot neva av no pikni.

³⁰ Di neks breda marid ar an ded tu.

³¹ Wan neda wan marid ar an ded, aal sevn a dem marid ar, ded, an no lef ar wid no pikni.

³² Den di uman ded tu.

³³ Sins di sevn a dem marid tu ar, wen a taim fi dem kom bak alaiv a uufa waif shi a-go bi?”

³⁴ Jiizas se, “Di piipl iina da taim ya a marid,

³⁵ bot di piipl dem we fit fi liv iina di taim wen ded piipl kom bak alaiv, dem naa go get marid.

³⁶ An dem naa go kyan ded agen, kaaz dem komiin laik ienjel an dem a Gad pikni. Dem a Gad pikni kaaz Gad mek dem kom bak alaiv.

³⁷ Iivn Muoziz shuo se di ded a-go kom bak alaiv. Wen di bush did a bon, im kaal di Laad ‘Iebriyam Gad, Aizak Gad an Jiekob Gad.’

³⁸ Im a no Gad fi di ded, bot fi uu a liv; kaaz fi Gad, di uol a dem alaiv.”

³⁹ Som a di Laa tiicha dem se, “Chuu wod Tiicha, gud ansa!”

⁴⁰ Fram dat dem fried fi aks Jiizas no muo kwestiyan.

⁴¹ Jiizas aks, “Wa mek dem se di Krais a Dievid pikni?

⁴² A Dievid siem wan se iina di Buk a Saamz: “ ‘Di Laad tel fi mi Laad se: “Sidong a mi rait an

⁴³ til mi tek dem we iet yu ton dem iina stuul fi yu put yu fut pan.” ’

⁴⁴ Dievid kaal im ‘Laad.’ So ou im fi bi Dievid pikni?”

⁴⁵ Evribadi did a lisn wen Jiizas se tu im speshal falara dem

⁴⁶ “Main yuself wid dem Laa tiicha ya. Dem laik waak roun iina lang jakit, an lov wen piipl gi dem speshal oudi iina di maakit an fi get di bes siit dem iina di Juu dem choch wen big dina a kip.

⁴⁷ Dem rab out di uman we ozban ded an prie lang prieya fi shuo aaf. A dem a-go get ponish di muos.”